އެތެރޭގެ އިންތިހާބަށް ފަހު ބައިބައިވުމެއް އައިސްގެން ނުވާނެ: ރައީސް

ޕީއެންސީގެ ކޮންގްރެސްގައި އެތެރޭގެ އިންތިހާބަށް ފަހު އެއްވެސް ކަހަލަ ބައިބައިވުމެއް އައިސްގެން ނުވާނެ ކަމަށް އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ޕީއެންސީގެ ކޮންގްރެސް ފެށުމުގެ ޖަލްސާގައި ވާހަކަފުޅު ދައްކަވަމުންނެވެ. ކޮންގްރެސްގައި އިންތިހާބު ކުރާ މަގާމުތަކަށް މެންބަރުން ހޮވުުން މާދަމާ އެވެ. ބައެއް މަގާމުތަކަށް ވަރަށް ބޮޑު ވާދައެއް އެބަ އޮތެވެ.

އެގޮތުން އެންމެ އިސް އެއް މަގާމު ކަމަށްވާ ޕާޓީގެ ނާއިބު ރައީސުންގެ ހަ މަގާމަށް އަށް ބޭފުޅަކު ވާދަކުރެ އެވެ. އަދި މެންބަރުންގެ މަޖިލީހަށް އިންތިހާބުކުރާ އަންހެން މެންބަރުކަމުގެ 10 މަގާމަށް 22 މެންބަރަކު ޒުވާނުންގެ މެންބަރުކަމުގެ ހަތް މަގާމަށް 13 މެންބަރަކު ކުރިމަތިލާފައިވެއެވެ.

މެންބަރުންގެ މަޖިލީހަށް އިންތިހާބުކުރާ އާންމު މެންބަރުންގެ 18 މަގާމަށް 73 މެންބަރުން ކުރިމަތިލާފައިވެ އެވެ.

އިންތިހާބާއި ގުޅޭގޮތުން ރައީސް ވިދާޅުވީ ކޮންމެ އިންތިހާބެއްގައި މޮޅުވާ ބަޔަކާއި ބަލިވާ ބައެއް ތިބޭނެ ކަމަށެވެ. އަދި ކާމިޔާބުވީ މީހުންނާއި ނާކާމިޔާބުވީ މީހުން ސަލާންގަލާންކޮށްލާފައި ކުރިއަށް ދިއުން އެއީ އެންމެ ރީތި މިސާލު ކަމުގައި ވިދާޅުވި އެވެ.

"އަޅުގަނޑުމެންގެ ތެރޭގައި އެއްވެސް ކަހަލަ ބައިބައިވުމެއް އިންތިޚާބު ނިމޭ ހިސާބުން އައިސްގެން ނުވާނެ. އަޅުގަނޑުމެން މި ތިބީ ވަރަށް މާތް، ވަރަށް މަތިވެރި މަޤްސަދެއްގައި ނިކުމެ،" ރައީސް ވިދާޅުވި އެވެ.