ފަނޑިޔާރު އަބްދުﷲ ދީދީ ޖޭއެސްސީއަށް ޖަވާބުދާރީވެވަޑައިގެންފި
ސުޕްރީމް ކޯޓުގެ ފަނޑިޔާރު އަބްދުﷲ ދީދީގެ މައްޗަށް ހުށަހަޅާފައިވާ ސުލޫކީ މައްސަލަ ފުލުހުން ތަހުގީގު ކުރާކަމަށް ބުނެފައިވަނިކޮށް، ފަނޑިޔާރު ދީދީ މިއަދު ޖޭއެސްސީއަށް ޖަވާބުދާރީވެވަޑައިގެންފައިވާކަމަށް ޖޭއެސްސީން ބުނެފިއެވެ.
ޖޭއެސްސީން ކުރި ޓުވީޓެއްގައިވާ ގޮތުން ފަނޑިޔާރު ދީދީ ޖަވާބުދާރީވެވަޑައިގަތީ ލިޔުމުންނެވެ. އެކަމާ ގުޅޭގޮތުން ޖޭއެސްސީން އިތުރު ތަފްސީލެއް ހާމައެއް ނުކުރެއެވެ.
ފަނޑިޔާރު ދީދީގެ މައްޗަށް ސުލޫކީ މައްސަލައެއް ހުށަހަޅާފައިވަނީ މަޖިލީހުގެ ރައީސް މުހައްމަދު ނަޝީދެވެ. އެމަނިކުފާނު ހުށަހަޅުއްވާފައިވާ މައްސަލައަކީ އެމްއެމްޕީއާރުސީގެ މައްސަލަ ބަލަމުން ދިޔައިރު އެމައްސަލައިގެ ތުހުމަތުކުރެވޭ މީހަކަށް ވަކި ގޮތަކަށް ހުކުމް ނެރުމަށް ފަނޑިޔާރުންނަށް ރިޝްވަތު ދިންކަމަށް ބުނާ މައްސަލައިގައި ފަނޑިޔާރު ދީދީގެ އަނބިކަނބަލުންގެ ނަމުގައި މެލޭޝިޔާގައި ހުޅުވާފައި ހުރި އެކައުންޓަކަށް ފައިސާ ޖަމާކުރި ކަމުގެ ތުހުމަތުގައެވެ.
އެމައްސަލަ ޖޭއެސްސީން ބަލަމުން ދަނިކޮށް، ޖޭއެސްސީން ބޭއްވި ތަހުގީގުގައި ބުނެފައިވަނީ ފަނޑިޔާރު ދީދީގެ މައްސަލައެއް ފުލުހުންވެސް ބަލަމުންދާ ކަމަށެވެ. ނަމަވެސް ފަނޑިޔާރު ދީދީ އެކަން ދޮގު ކުރައްވައެވެ. ފަނޑިޔާރު ދީދީ ވަނީ ރިޝްވަތުގެ އެއްވެސް އަމަލެއް އަދި ޖިނާއީ އެއްވެސް އަމަލެއް ދުވަހަކު ވެސް ހިންގަވާފައި ނުވާނެ ކަމަށް ވިދާޅުވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
