ހުޅުމާލޭގައި ފެންވަރާނެ ތަންތަން ގާއިމްކުރުމަށް އިއުލާންކޮށްފި

އާންމުންނަށް ބޭނުންކުރެވޭނެގޮތަށް ހުޅުމާލޭގެ ހަ ސަރަހައްދެއްގައި ފެންވަރާނެ ތަންތަން ގާއިމްކުރުމަށް އިއުލާންކޮށްފިއެވެ.

މިކަމަށް އިއުލާންކޮށްފައިވަނީ ޕްލޭނިންގް މިނިސްްޓްރީގެ ފަރާތުންނެވެ.

އެ އިއުލާނުގައި ބުނެފައިވަނީ މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓަރަކްޗަރއަށް ހުޅުމާލޭގެ 6 ސަރަޙައްދެއްގައި ފެންމާގަނޑު ހަރުކޮށްދިނުމުގެ މަސައްކަތްކޮށްދޭނެ ފަރާތެއް ހޯދުމަށް ކުރި އިޢުލާނާއި ގުޅިގެން މިނިސްޓްރީއިން ދެވިފައިވާ މަޢުލޫމާތު ކަރުދާހާއި، ބީ.އޯ.ކިއު ބަދަލުވެފައިވާތީ، އެ އިޢުލާން ބާޠިލްކޮށް، ހުޅުމާލެ 6 ސަރަޙައްދެއްގައި ޕަބްލިކް ޝަވަރ އޭރިއާތަކެއް ހަދައިދޭނެ ފަރާތެއް ހޯދުމަށް އަލުން އިއުލާންކުރާކަމަށެވެ.

މި މަސައްކަތަށް ޝައުޤުވެރިވެވަޑައިގަންނަވާ ފަރާތްތަކުން 2019 ފެބުރުވަރީ 10 ވާ އާދީއްތަ ދުވަހުގެ 12:00 އަށް މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ އަމީނީމަގަށް ވަޑައިގެން މަޢުލޫމާތު ސާފުކުރެއްވުމަށް މިނިސްޓްރީން ވަނީ އެދިފައެވެ.

މި މަސައްކަތުގެ ބީލަން ހުޅުވުން އޮންނާނީ 2019 ފެބުރުވަރީ 14 ވާ ބުރާސްފަތި ދުވަހުގެ 12:00 ގައި މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރގައެވެ.

މި މިނިސްޓްރީއިން މަޢުލޫމާތު ކަރުދާހުގައި އަންގަވާފައިވާގޮތަށް ބީލަން ހުށަހަޅުއްވާއިރު، ބިލަމާއިއެކު ބިޑް ސެކިއުރިޓީ ހުށަހަޅުއްވަންވާނެ ކަމަށް ވެސް މިނިސްޓްރީން މައުލޫމާތުދެއެވެ.