ޔުނައިޓެޑު އިސްލާމިކް ސޮސައިޓީގެ އޮފީސް ޢިމާރާތަށް ޚާއްޞަ ވެބްސައިޓެއް އިފްތިތާޙުކޮށްފި
ލިޔުންތެރިޔާ
ސްޓާފް ރައިޓަރ
ދ. ކުޑަހުވަދޫގައި ދީނީ، އިޖުތިމާޢީ އަދި ޢިލްމީ ގިނަ ޙަރަކާތްތަކެއް ހިންގަމުން އަންނަ ޔުނައިޓެޑު އިސްލާމިކް ސޮސައިޓީ (ޔޫ.އައި.އެސް) އިން އަޅާ އައު އޮފީސް ޢިމާރާތުގެ މަސައްކަތަށް ޚާއްޞަ ވެބްސައިޓެއް އިފްތިތާޙުކޮށްފިއެވެ.
މި ވެބްސައިޓު އިފްތިތާޙު ކޮށްދެއްވާފައިވަނީ އިންޓަރނޭޝަނަލް އެއިޑް ކެމްޕޭން (އައި.އޭ.ސީ) ގެ ޗެއާމަން އަޙްމަދު އިޤްބާލް އަދި ޑިރެކްޓަރު އަޒުހަދު އަޙްމަދެވެ. މި ވެބްސައިޓުގެ ބޭނުމަކީ ޢިމާރާތުގެ މަސައްކަތް ކުރިއަށްދާ ގޮތް އާންމުންނަށް ދެއްކުމާއި، މި ޚައިރާތު މަސައްކަތުގައި އެހީތެރިވާން ބޭނުންވާ ފަރާތްތަކަށް އެ ފުރުޞަތު ފަހިކޮށްދިނުމެވެ.
ކުޑަހުވަދޫ ކައުންސިލުން ޖަމްޢިއްޔާތަކަށް ދޫކުރާ ބިންތަކަށް ޕްރޮޕޯސަލް ހުށަހަޅައިގެން ލިބުނު ބިމުގައި ބިނާކުރާ މި ޢިމާރާތަކީ ދެ ބުރީގެ ޢިމާރާތެކެވެ. މި ޢިމާރާތް ފަރުމާކުރެވިފައިވަނީ ޒަމާނީ 2 ކުލާސް ރޫމަކާއި، ސްޓޫޑިއޯއެއްގެ އިތުރުން އިދާރީ މަސައްކަތްތަކާއި ބައްދަލުވުންތައް ބޭއްވޭނެ އިންތިޒާމުތަކާއެކުގައެވެ.
މި ޢިމާރާތަކީ "ޞަދަޤަ ޖާރިއާ" އެއްގެ ގޮތުގައި ކުރިއަށްގެންދާ ވަޤުފް މަޝްރޫޢެކެވެ. މި މަސައްކަތަށް އެހީތެރިވާން ބޭނުންވާ ފަރާތްތަކަށް މިހާރު ވަނީ އެ ފުރުޞަތު ހުޅުވާލާފައެވެ. އެގޮތުން އަކަފޫޓަކަށް 1320 ރުފިޔާ އިންވެސްޓް ކުރުމުގެ ފުރުޞަތުގެ އިތުރުން، އެއަށްވުރެ މަދުން ވެސް ޞަދަޤާތްކޮށް މި އިމާރާތް އެޅުމަށް އެހީތެރިކަން ފޯރުކޮށްދެވޭނެއެވެ.
ޔުނައިޓެޑު އިސްލާމިކް ސޮސައިޓީން ހާމަކުރި ގޮތުގައި، މި އައު އޮފީސް ޢިމާރާތުގެ ސަބަބުން ކުޑަހުވަދޫގައި އެ ޖަމްޢިއްޔާއިން ކުރަމުން އަންނަ ދީނީ އަދި އިޖުތިމާޢީ މަސައްކަތްތަކަށް ބޮޑު ކުރިއެރުމެއް ލިބި، ދެވޭ ޚިދުމަތްތައް އިތުރަށް ފުޅާވެގެންދާނެއެވެ. މިއީ މުޅި ރަށަށް ވެސް އޭގެ ފައިދާ ކުރާނެ މުހިންމު ބިނާއެއް ކަމަށް އެ ޖަމްޢިއްޔާއިން ދެކެއެވެ.
މިފަދަ ދެމިގެންވާ ޞަދަޤާތެއްގެ މަސައްކަތުގައި ބައިވެރިވުމަކީ އާޚިރަތަށްޓަކައި ކުރެވޭނެ އަގުހުރި އިންވެސްޓްމަންޓެއްކަން ފާހަގަކޮށް، ވީހާވެސް ގިނަ ފަރާތްތަކުން މި މަސައްކަތުގައި އެހީތެރިކަން ފޯރުކޮށްދިނުމަށް ޖަމްޢިއްޔާއިން ވަނީ އެދިފައެވެ. އަލަށް އިފްތިތާޙު ކުރި ވެބްސައިޓު މެދުވެރިކޮށް، މަސައްކަތް ކުރިއަށްދާ މިންވަރުގެ ތަފްޞީލުތައް ކޮންމެ ވަގުތަކުވެސް ބަލާލެވޭނެއެވެ.
ވެބްސައިޓުގެ ލިންކް:
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
