އަފްރާޝީމް، ޔާމީންގެ މަރާއި ރިޟުވާން ގެއްލުވާލި މައްސަލަ ހަރުކަށި ދީނީ މީހުނާ ދިމާލަށް

މާލޭގައި މަރާލެވިފައިވާ މީހުންގެ ތެރެއިން ރައްޔިތުންގެ މަޖިލީހުގެ އުނގޫފާރުދާއިރާގެ ކުރީގެ މެމްބަރ ޑޮކްޓަރ އަފްރާޝީމާއި، ނޫސްވެރިޔާ އަދި ބްލޮގާ ރިޟުވާނާއި ޔާމީން ރަޝީދުގެ މަރުގެ މައްސަލާގައި އެއްގޮތްކަންތައްތަކެއް ހުރިކަމާއި އެއްމަރު އަނެއްމަރާއި ގުޅިފައިވާކަމަށް ރިޔާސީ ކޮމިޝަންގެ ރައީސް ހުސްނުއް ސުއޫދު ވިދާޅުވުމުން ކުރިން މިމައްސަލަތަކުގެ ތަހްގީގުން ފެނިފައިވާ ކަންކަމަށްވުރެ ތަފާތު އާކަމެއް ކޮމިޝަނަށް ލިބިފައިނުވާކަން ދޭހަވެއެވެ.

ތިން މައްސަލައާއިބެހޭގޮތުން ސުއޫދު ފާހަގަކުރެއްވީ "އެއް ޕެޓާނަކަށް، އެކަތި އަނެކައްޗާ ގުޅުން ހުރި ކަމަށް އަޅުގަނޑުމެން މި ބަލަނީ. ތިން މައްސަލަ ވެސް ގުޅިފައި އޮތް ކަމަށް"

ޑޮކްޓަރ އަފްރާޝީމްގެ މައްސަލާގައި ފުލުހުންނަށް ހޯދައިނުގަނެވިފައިވަނީ އަފްރާޝީމް އަވަހާރަކޮށްލަން އޯޑަރުނެރުނު ނުވަތަ ފަންޑުކުރި މީހުންނެވެ. ސުއޫދުގެ ވާހަކައިން ދޭހަވަނީ ޔާމީނާއި ރިޟުވާން މަރާލަން އޯޑަރުނެރުނު މީހުންނާއި ފަންޑުކުރި މީހުންނާއި އަފްރާޝީމްގެ މައްސަލައިގެ އަޑީގައި ތިބި މީހުންނަކީ ދާދި އެއްބަޔެއްކަމެވެ. އެނޫންގޮތަކަށް އެއްގޮތްވާނެގޮތެއް ނެތެވެ. އެއީ މިތިން ހާދިސާގައި އަމަލީގޮތުން ބައިވެރިވެފައިވަނީ ތިންބަޔެއްކަމަށްވާތީއެވެ. ނޭގެނީ މުލުގައި ތިބި ނުވަތަ ފަނޑުކުރިމީހުންނެވެ. އެއްޕެޓާނަކީ އެތިން މީހުންވެސް ދިރިއުޅުނު ގޭދޮށަށްގޮސް ގަތުލު ހިންގާފައިވުމެވެ. ބެލެވިފައިވަނީ ރިޟުވާނަށް އެކުރިކަމެއް ކުރީ އޭނާ ގެއިން ނެރެގެންގެންގޮހެވެ.

ޑޮކްޓަރ އަފްރާޝީމް އަވަހާރަކޮށްލުމުގެ މައްސަލައިގެ ފަންޑުކުރި މީހުންނަކީ ނުވަތަ އޯޑަރުނެރުނު މީހުންނަކީ ސިޔާސީ ބައެއްކަމަށް ކުރިން ތުހުމަތުކުރެވުނެވެ. އެތުހުމަތު ކުރެވުނީ އަފްރާޝީމް މަރާލުމުގައި އަމަލީގޮތުން ބައިވެރިވި މީހުން އެމީހުންނާ އެމައްސަލާގައި މުއާމަލާތްކުރިމީހުންގެ ގޮތުގައި ދެއްކި ބަޔަކީ ސިޔާސީގޮތުން ހަރަކާތްތެރިވަމުންދިޔަ ބަޔަކަށްވާތީއެވެ. އެމީހުން އޭރު ނިސްބަތްވީ އިދިކޮޅު ޕާޓީގެ ގޮތުގައި އޭރު އޮތް އެމްޑީޕީގެ އެކްޓިވިސްޓުންތަކަކަށެވެ. އެކަމަކު އޭގެ ދުވަސްތަކެއްފަހުން ތުންތުންމަތިން ފަތުރަމުންދިޔަ ވާހަކަތަކެއް ފެތުރެމުންގޮސް އަފްރާޝީމްގެ ޕާޓީގައި ތިބި ބަޔެއްގެ ބޮލަށް ބިންދައިލެވުނެވެ.

އަދީބުންގޮސް ރައީސް އަބްދުﷲ ޔާމީނާއިހަމައަށް ތުހުމަތުގެ އިނގިލިދިއްކޮށް މިއަދު ރިޔާސީ ކޮމިޝަނުން ހަގީގަތުގައި އެބަލަނީ ރައީސް އަބްދުﷲ ޔާމީންއާއި ލިންކެއް އޮތްކަން ހޯދޭތޯއެވެ. ރިޟުވާންގެ މައްސަލާގައިވެސް ދިއްގަރު ދާއިރާގެ ކުރީގެ މެމްބަރު އަހުމަދު ނާޒިމް ރިޟުވާނަށް ފޯރުކޮށްދިން ލިޔުންތަކެކޭ މަރުގެ ސަބަބަކީ އެޔޭ ކިޔައިގެން ފަތުރާ ވާހަކަތަކެއްވެސް އޮވެއެވެ. މިއީވެސް އަދީބަށް ތުހުމަތުކުރެވޭ ކަމެކެވެ. އަދީބަށް ތުހުމަތުކުރެވޭ ކަންކަން ދަނީ ޔާމީނާއިހަމައަށެވެ.

އެހެންނަމަވެސް ޔާމީނުގެ ވެރިކަމުގައި ކޮރަޕްޝަން މައްސަލަތަކަކާއި ރިޔާސީ ލޯންޗްކޮޅުގައި ބޮންގޮއްވި މައްސަލަތައް ޝަރީއަތަށް ސާބިތުވެ އުމުރުދުވަހަށްވުރެވެސް ދިގު މުއްދަތެއް ޖަލުހުކުމްތަކެއް އައިސްފައިވުމާއެކުވެސް މިއިން މައްސަލައެއްގައި ޔާމީނަށް ނިސްބަތްކޮށް އެއްވެސް އެއްޗެއް އަދީބު ބުނެފައިނުވާކަން ފާހަގަކުރެވެއެވެ. އޭނާދަނީ މުތުލަގަށް މިމަރުގެ މައްސަލަތަކަށް އިންކާރު ކުރަމުންނެވެ.

ދީނީ ހަރުކަށި މީހުންނަށް ކުރެވޭ ތުހުމަތު

ކޮމިޝަންގެ ރައީސް ސުއޫދުގެ ވާހަކަ އެނަލައިޒްކޮށްލުމުން މިނޫން އެހެންދިމާއަކަށް އިގިލިދިއްކުރެވޭކަމަށް ފެނެއެވެ. އެއަށް ބާރުލިބިދޭ ކަންކަން އެބަހުއްޓެވެ. ފުލުހުންގެ އިންޓެލިޖެންސްގައި ކުރިން ހަރަކާތްތެރިވެފައިވާ އިސްބޭފުޅަކު ވިދާޅުވެފައިވާގޮތުގައި ފުލުހުންގެ ތަހްގީގުން ބޮޑަށް ބާރުލިބެނީ ސިޔާސީ މަރުތަކަކަށްވުރެ ބޮޑަށް އެހެންގޮތަކަށް ހިގާފައިވާކަންތައްތަކެއްގެ ގޮތުގައެވެ. ހައްދުފަހަނައަޅާފައިވާ ދީނީ ފިކުރުގެ ބައެއްގެ ކަމެއްކަމަށެވެ. އަފްރާޝީމާއިގުޅޭ ބެކްގްރައުންޑެއް ފާހަގަކުރެވިފައިވެއެވެ. އެއީ ހަރުކަށި ހައްދުފަހަނައަޅާފައިވާ މީހުންގެ އަމާޒަކަށް އޭނާވެ، އޭނާއަށް ހަމަލާދެވިފައިވުމެވެ. އިބްރާހިމީ މިސްކިތުން ފައިބަނިކޮށް ހިގައިދިޔަ ކަންކަން އެއީ ރޯމާދުވާލު މާލޭގެ އާއްމުތަނެއްގައި ހިގި އާދައިގެ ކަމެއްނޫނެވެ. ދަރިފުޅުގެ ކުރިމަތީގައި އަފްރާޝީމަށް ހަމަލާދިނެވެ. ރާއްޖޭގައި ދީނީ މިނިވަންކަމަށް ގޮވައި މުޒާހަރާކުރި މީހުންގެ އިސްމީހަކަށްހުރި ހިއްލަތަށްވެސް ވަޅީގެ ހަމަލާއެއް އަމާޒުވިއެވެ. އެކަމަކު އެހަމަލާގެ ފަހަތުގައިވަނީ ދީނީފިކުރުގެ ބައެއްކަމެއް ނުވަތަ އޭނާ ބައިވެރިވި މަސްތުވާތަކެތީގެ މައްސަލައާއިގުޅޭކަމެއްކަމެއް ފުލުހުން ހާމަކޮށްފައިނުވެއެވެ. ރައީސް މުހައްމަދު ވަހީދުގެ ދުވަސްވަރު މާލޭގައި ހައްދުފަހަނައަޅާފައިވާ ބަޔަކު މީހަކު ރަހީންކުރިކަމަށް ބުނެ އެމްޑީޕީން ބަޔާނެއް ނެރެފައިވެއެވެ. ފަހުން އެމީހާ ސަލާމަތުން ދޫކޮށްލެވުނެވެ. ރިޟުވާނަކީ ދީނީފިކުރުގެ ބައެއްގެތެރޭގައި ހުރުމަށްފަހު އެމީހުންނާއިވަކިވެ ބައެއް މައްސަލަތަކުގައި ހަރުކަށި މީހުންނާއި ގުޅޭ ބައެއް ލިޔުންތައް ޝާއިއުކުރަމުންދިޔަ މީހެކެވެ. ހަމައެހެން ޔާމީން ރަޝީދަކީވެސް ސިޔާސީވާހަކަތަކާއެކު ހަރުކަށި ހައްދުފަހަނައަޅައިދިއުމާއި ތައާރަޟްވާ ޚިޔާލުތައް އަދި އޭނާ ގަބޫލުކުރާ ރިލިޖަސް ފިލޯސަފީއެއްސޯޝަލް މީޑިއާގައި ފާޅުކުރަމުންދިޔަ ފަރާތެކެވެ.

ރާއްޖޭގައި މިތިން މީހުންނަށްވުރެ މާބޮޑަށް ސިޔާސީގޮތުން ފުރައްސާރަކޮށް ހުތުރުއެއްޗެހި ގޮވާމީހުން އެބަތިއްބެވެ. އެމީހުން ވަރަށް މިނިވަންކަމާއެކު އުޅެއެވެ. އެކިމީހުންނަށް ބިރުދެއްކުމުގެ އިންޒާރުތައް ނުދޭ ވާހަކައެއްނޫނެވެ.

އެކަމަކު ރާއްޖޭގައި ހައްދުފަހަނައަޅާފައިވާ މީހުންގެ ހަރަކާތްތައް ދިރާސާކުރާ އަދި އެމީހުންނާ ދީނީ އެކިމައްސަލަތަކުގައި ބަހުސްކުރެވޭ ބައެއް ޢިލްމުވެރިންގެ ނަޒަރުގައި ހައްދުފަހަނައަޅާފައިވާ މީހުންނަކީ އާއްމު މީހާ ހިތަށްވެސް ނުގެނެވޭހާ ނުރައްކާތެރި ބައެކެވެ. އެމީހުންގެ ހަރަކާތްތަކާމެދު ގިނަމީހުންވަނީ ޖާހިލު އަދިރިކަމެއްގެތެރޭގައެވެ. އެމީހުން ގޮތަކަށް ހުކުމްޖަހައިފިނަމަ އެނިމުނީއެވެ. ގައުމީ ސަލާމަތާއިބެހޭ މަޖިލީހުގެ އިސްވެރިޔަކު ވިދާޅުވިގޮތުގައި ހައްދުފަހަނައަޅާފައިވާ މީހުންނާއިބެހޭ މައުލޫމާތު ފުލުހުންނާ ސިފައިންގެ އިންޓެލިޖެންސަށް ފޯރުކޮށްދޭފަރާތްތަކަށް މަރުގެ ހަމަލާއަތުވެދާނެކަމުގެ ބިރު އޮވެއެވެ. އެފަދަ ކިތަންމެ ކަމެއް ސީރިއަސް މައްސަލަތަކެއްގެ ގޮތުގައި ބަލައި އަޅަންޖެހޭ ފިޔަވަޅުތައް އެޅިފައިވެއެވެ.

އަފްރާޝީމް މަރާލުމުގައި އަމަލީގޮތުން ބައިވެރިވިކަމަށް ތުހުމަތުކުރެވޭ މީހުންގެތެރެއިން އަޒްލިފް ރައޫފް އޭނާގެ ހައްދުފަހަނައަޅާފައިވާ ޚިޔާލުގައި ސީރިޔާއަށްފިލައިގެންގޮސް ސީރިޔާގެ ޓެރަރިސްޓް ޖަމާއަތެއްގައި ހަގުރާމަކުރަމުންދަނިކޮށް މަރުވެފައިވާކަމަށް ވެއެވެ.

ކޮންމެއަކަސް ކޮމިޝަންގެ ރައީސް ހުސްނުއްސުއޫދުގެ ވާހަކަތައް ބިނާކުރުމުގައި ފުލުހުންގެ ތަހްގީގީ ހޯދުންތަކަށް ރިއާޔަތްކުރާނަމަ ނުވަދިހަ ނުވަ އިންސައްތަ މިސްރާބް އެހެރީ ދީނީ ހަރުކަށި މީހުންނާ ދިމާއަށެވެ. އެކަމަކު ސިޔާސީގޮތުން ކައްކާދީފައިވާ އެއްޗަކަށް ރިއާޔަތްކުރާނަމަ ސިޔާސީ ފަރާތަކަށް އަމާޒުނުކުރާނެ ވާހަކައެއްނޫނެވެ. ސިޔާސީގޮތުން އިގިލިދިއްކުރެވޭ އަދީބާއި ސުވާލުނުކުރަނީ ކީއްވެގެންތޯ ނޫސްވެރިޔަކު އެހުމުން ސުވާލުކުރަންޖެހިއްޖެނަމަ ސުވާލުކުރާނެ ވާހަކަ އޭނާ ވިދާޅުވީ އެހެންވެގެންނެވެ. އާއްމުންގެތެރެއިންވެސް ލައްކަ ގިނަމީހުން މައުލޫމާތުދިނުމުންވެސް އަދީބާއި ސުވާލުކުރަންޖެހޭފަދަ ސައްހަ ހެކިތަކެއް ހިމެނޭ މައުލޫމާތުތަކެއް ކޮމިޝަނަށް އަދި ނުލިބެނީއެވެ.