ރާއްޖެއަށް އަންނަ ޗައިނާ ފަތުރުވެރިންގެ އަދަދަށް %45ގެ ކުރިއެރުމެއް!

މިއަހަރުގެ މިހާތަނަށް ޗައިނާއިން ރާއްޖެއަށް އައު ފަތުރުވެރިންގެ ނިސްބަތް މިދިޔަ އަހަރު އައި ނިސްބަތާއަޅާބަލާއިރު %45 އިތުރުވެއްޖެއެވެ.

ފަތުރުވެރިކަމާއި ބެހޭ ވުޒާރާއިން އެންމެ ފަހުން ނެރެފައިވާ ޓޫރިޒަމް އަޕްޑޭޓު ރިޕޯޓުގައިވާގޮތުން އަހަރުގެ މިހާތަނަށް ޗައިނާގެ 233،332 ފަތުރުވެރިން ވަނީ ރާއްޖެ ޒިޔާރަތް ކޮށްފައެވެ. އަދި ރާއްޖޭގައި ޗައިނާ މާކެޓްގެ ހިއްސާ %14.8 އަށް ވަނީ އަރާފައެވެ.

ޗައިނާއަށްފަހު، ރާއްޖެއަށް 2ވަނައަށް އެންމެ ގިނަ އަދަދަކަށް ފަތުރުވެރިން އަންނަ ގައުމެއްގެ ގޮތުގައި އޮތީ ރަޝިއާއެވެ. އެ ގައުމުން، އަހަރުގެ މިހާތަނަށް  172،142 ފަތުރުވެރިން ވަނީ ރާއްޖެއައިސްފައެވެ.

ތިންވަނަ އަށް އެންމެ ގިނަ ފަތުރުވެރިން ރާއްޖެ އައިސްފައިވަނީ އިނގިރޭސި ވިލާތުން ކަމަށް ވާއިރު، އެގައުމުން ރާއްޖެއަށް 132،228 ފަތުރުވެރިން ވަނީ ޒިޔާރަތްކޮށްފައެވެ. އެއަށްފަހު ޖަރުމަނުވިލާތާއި އިޓަލީ އޮތް އިރު، އަވަށްޓެރި އިންޑިޔާ އޮތީ 6 ވަނާގައެވެ.

ފަތުރުވެރިކަމުގެ ތަފާސްހިސާބުތަކުން، ދައްކާގޮތުން އަހަރުގެ މިހާތަނަށް ރާއްޖެއަށް ޖުމްލަ 1،573،991 ފަތުރުވެރިން ވަނީ ޒިޔާރަތްކޮށްފައެވެ. މިއަދަދަކީ މިދިޔަ އަހަރުގެ މި މުއްދަތުގައި ރާއްޖެއަށް އައިސްފައިވާ 1،437،220 ފަތުރުވެރިންނާއި އަޅާ ބަލާއިރު %9.5 އިތުރު އަދަދެކެވެ.

މި އަހަރު ނިމުމުގެ ކުރިން 2 މިލިއަން ފަތުރުވެރިން ރާއްޖެ އަށް ގެނައުމަކީ ސަރުކާރުގެ އަމާޒެއްކަން ފާހަގަކޮށްލަން ޖެހެއެވެ.