އިންޖީނުގޭ އަލިފާނުގެ ހާދިސާގައި ފިހިގެން ފަރުވާދެމުންދިޔަ ސްޓެލްކޯ މުވައްޒަފު ނިޔާވެއްޖެ

އިންޖީނުގޭ އަލިފާނުގެ ހާދިސާގައި ފިހިގެން ފަރުވާދެމުންދިޔަ ސްޓެލްކޯ މުވައްޒަފު ނިޔާވެއްޖެއެވެ.

ސްޓެލްކޯއިން ވަނީ ”ވޮއިސް“ އަށް މިކަން ކަށަވަރުކޮށްދީފައެވެ. އެ މުވައްވަޒަފު ނިޔާވެފައިވަނީ ތައިލެންޑްގެ ބެންކޮކު ހޮސްޕިޓަލުގައި ފަރުވާދެމުންދަނިކޮށް މިއަދުގެ ވަގުތެއްގައެވެ.

ހުޅުމާލޭގެ ބައު އިންޖީނުގޭގެ ސްވިޗް ގިއަރ އަކަށް ދިމާވި މައްސަލައެއް ހައްލު ކުރަމުން ދަނިކޮށް، އަލިފާނުގެ ހާދިސާއެއް ހިނގައި މިދިޔަ މަހު 26 ވަނަ ދުވަހު ސްޓެލްކޯގެ އެ މުއައްޒަފު ވަނީ ވަރަށްބޮޑަށް ފިހިފައެވެ.

މި ހާދިސާގައި ފިހިފައިވަނީ ސްޓެލްކޯގައި މަސައްކަތްކުރަމުންދިޔަ 43 އަހަރުގެ ދިވެހި ފިރިހެނެކެވެ.

މި ހާދިސާގައި ފިހުނު މުއައްޒަފަށް އެންމެ ފުރަތަމަ ފަރުވާދީފައިވަނީ ހުޅުމާލޭ ހޮސްޕިޓަލުންނެވެ. އެފަހުން އޭޑީކޭއަށް ބަދަލުކުރުމަށްފަހު އިތުރު ފަރުވާއަށް ތައިލެންޑަށް ގެންގޮސް ބެންކޮކު ހޮސްޕިޓަލުގައި ފަރުވާ ދޭންފެށިއެވެ.

މި ހާދިސާއާ ގުޅޭ މައުލޫމާތު ދެމުން މީގެކުރިން ސްޓެލްކޯއިން މީގެކުރިން ނެރުނު ބަޔާނެއްގައި ބުނީ، ސްވިޗްގިއަރއަކަށް ދިމާވި މައްސަލައެއް ޙައްލުކުރުމުގެ މަސައްކަތް ކުރަމުން ދަނިކޮށް، ހިނގައިދިޔަ ހާދިސާއެއްގައި އަނިޔާވި މުއައްޒަފުގެ ހަށިގަނޑުގެ އެކި ތަންތަން ފިހި، ސީރިއަސް އަނިޔާތަކެއް ލިބިފައިވާކަމަށެވެ.

އަދި މިހާދިސާ ހިނގުމާއެކު އެތަނުގައި ތިބި އެހެން މުވައްޒަފުންގެ އެހީތެރިކަމާއެކު އެމުވައްޒަފަށް ވަގުތުން ފަރުވާ ދިނުމުގެ އިންތިޒާމް ހަމަޖައްސައި، އެހީތެރިކަން ވަނީ ފޯރުކޮށްދީފައިވާކަަމަށް ސްޓެލްކޯއިން ބުންޏެވެ.