ގަމުން ދޫކުރު ގޯތިތައް ބޮޑުކުރުމުގެ ހުއްދަ ދޭނަން - ރައީސް މުޢިއްޒު

ލ. ގަމުން 2019 ވަނަ އަހަރު ދޫކުރި ގޯތިތަކުގެ ސައިޒް ބޮޑުކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ. މުޙައްމަދު މުޢިއްޒު ލ.އަތޮޅަށް ކުރެއްވި ދަތުރުފުޅުގައި، ލ.ގަމުގައި ހުންނަ ޙަމަދު ބިން ޚަލީފާ އަލް ޘާނީ ސްކޫލުގައި ގަމު ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން، ވިދާޅުވީ 2019 ވަނަ އަހަރު ދޫކޮށްފަައިވާ ގޯތިތަކުގެ ޖާގަ ކުޑަވުމަކީ ގަމުގެ ރައްޔިތުންގެ ކަންބޮޑުވުމެއް ކަމަށެވެ. އެހެންކަމުން އެގޯތިތަކުގެ ޖާގަ ބޮޑުކޮށް ރައްޔިތުން ބޭނުންވާ ގޮތަށް ބަދަލު ގެނެސްދެއްވާނެ ކަމަށް ރައީސް ވިދާޅުވިއެވެ.

މިދިޔަ ސަރުކާރުން ވަނީ ބޯހިޔާވަހިކަމުގެ މަޝްރޫޢުގެ ދަށުން ލ. ގަމުގެ ހުސްބިންތަކުން 2،000 އަކަފޫޓުގެ 400 ގޯތި ދޫކޮށްފައެވެ. ގޯތި ލިބުނު ގިނަ މީހުން، ގޯތި ކުޑަކަމަށް ބުނެ ކައުންސިލަށް ޝަކުވާ ހުށަހެޅުމުން، ގޯތި ބޮޑުކޮށްދިނުމަށް އެދި ޕްލޭނިން މިނިސްޓްރީއަށްވެސް ހުށަހެޅިއެވެ. ނަމަވެސް މައްސަލައަށް ޙައްލެއް ނުލިބި، ލ.ގަމު ރައްޔިތުންވަނީ މިދިޔަ އަހަރުގެ ސެޕްޓެމްބަރު މަހުގައި މުޒާހަރާވެސް ކޮށްފައެވެ.

"އެންމެ މުހިންމު ކަމަކީ ހަމަ ހުރިހާ ރައްޔިތުންނަށްވެސް ގެދޮރުވެރިކަން. މިހާރު ފެށިފައިވާ މަޝްރޫއަކުންނެއް ނުފުދޭނެ. ސަތޭކަ ހައުސިން ޔުނިޓު ނޫނިއްޔާމު ސަތޭކަ ގެއަކީ އެއީ އެއްވެސް ވަރަކަށް ފުދޭ މިންވަރެއް ނޫން. އެހެންވީމަ އަޅުގަނޑު ވަޢުދު ވީ ފަދައިން ހަމަ އެކަން ކުރިއަށް ގެންދާނަން."

ރައީސް ވިދާޅުވިއެވެ.

މީގެ އިތުރުން ޖަލްސާގައި ރައީސް ވިދާޅުވީ ހައްދުންމައްޗަކީ އެންމެކުރީންސުރެވެސް ތަރައްގީ ނުވެ އޮތް ތަނެއްގެ ގޮތުގައި އޮތް އޮތުން ބަދަލު ކުރައްވާނެ ކަމަށެވެ. އެގޮތުން ރިޔާސީ ވަޢުދުފުޅުގައި ހިމެނޭ އިންޓަރނޭޝަނަލް މެންޓަލް ހޮސްޕިޓަލް ގަމުގައި ޤާއިމްކުރައްވާނެކަމަށާއި، ގަން ރީޖަނަލް ހޮސްޕިޓަލް އަޕްގްރޭޑުކުރުމާއެކު ގަމަކީ ޞިއްޙީގޮތުން ވަރުގަދަ ނާރެހަކަށް ހައްދަވާނެކަމަށްވެސް ރައީސް ވިދާޅުވިއެވެ.