އެމްއެމްޕީއާރްސީގެ ޚިޔާނާތާއި ގުޅޭ ބައެއް މެންބަރުން މަޖިލީހުގެ މާލިއްޔަތު ކޮމެޓީގައި ތިބިކަމުގެ ތުހުމަތު!

ދިވެހިރާއްޖޭގައި ފަހުގެ ތާރީޚެއްގައި ހިނގި އެންމެ ބޮޑު ޚިޔާނާތްކަމުގައިވާ އެމްއެމްޕީއާރްސީގެ ޚިޔާނާތާއި ގުޅުންހުރި ބައެއް ފަރާތްތައް ރައްޔިތުންގެ މަޖިލީހުގެ މާލިއްޔަތު ކޮމެޓީގައި ތިބިކަމުގެ ތުހުމަތުކޮށްފިއެވެ.

މި ތުހުމަތުތައްކޮށްފައިވަނީ މިއަދު އޮތް ރައްޔިތުންގެ މަޖިލީހުގެ މާލިއްޔަތު ކޮމެޓީގެ ބައްދަލުވުމުގައި ވާހަކަފުޅު ދައްކަވަމުން ޕްެރޮސެކިއުޓަރ ޖެނެރަލް އައިޝަތު ބިޝާމެވެ.

ބިޝާމް ވިދާޅުވީ އެމްއެމްޕީއާރްސީގެ ޚިޔާނާތާއި ގުޅިގެން އެފަރާތްތަކުގެ މައްޗަށް ތަހުގީގު ހިނގަމުން އަންނަ ބައެއް މެންބަރުން މާލިއްޔަތު ކޮމެޓީގައި އެބަތިއްބެވި ކަމަށާއި، އެފަރާތްތަކަކީ ކޮބައިކަން އެކަމަނާއަށް އެނގިވަޑައިގަންނަވާކަމަށެވެ.

އެހެންކަމުން އެ މައްސަލައިގެ ތަހުގީގަށް ހުރަސްއެޅިދާނެކަމަށް ވިދާޅުވެ، ކޮމެޓީގެ ބައްދަލުވުުން ސިއްރުކޮށްގެން ކުރިއަށް ގެންދިއުމަށް އެކަމަނާ ވަނީ އެދިފައެވެ.

މިކަމާއި ގުޅިގެން ދާންދޫ ދާއިރާގެ މެންބަރު ޔައުގޫބް އަބްދުﷲ ހުށައެޅި ފަދައިން، އެ ބައްދަލުވުން ސިއްރުކޮށްގެން ކުރިއަށް ގެންދިއުމަށް ކޮމެޓީގެ ހުރިހާ މެންބަރުންގެ އަހުލަބިއްޔަތުން ވަނީ ފާސްކޮށްފައެވެ.

ޔައުގޫބް ހުށައެޅުއްވީ ކޮމިޓީ ސިއްރުކުރުމުގެ އިތުރުން، ތަހުގީގު ކުރަމުން އަންނަނީ އެ ކޮމިޓީގެ މެމްބަރުންތަކެއްގެ މައްސަލަކަން އެނގުމުން، އެ މެންބަރުންނާއި ނުލައި ކޮމިޓީ ކުރިއަށް ގެންދިއުމަށެވެ.

މާލިއްޔަތު ކޮމެޓީގައި ތިއްބަވާ މެންބަރުންނަކީ ކިނބިދޫ ދާއިރާގެ މެންބަރު މުހައްމަދު ނާޝިޒް، ތިމަރަފުށީ ދާއިރާާގެ މެންބަރު އަބްދުﷲ ރިޔާޒް، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ، ކުުޅުދުއްފުށި އުތުރު ދާއިރާގެ މެންބަރު ޔާސިރު ޢަބްދުއްލަޠީފް، ކޮމަންޑޫ ދާއިރާގެ މެންބަރު ޙުސައިން ވަޙީދު، އޭދަފުށީ ދާއިރާގެ މެންބަރު އަޙްމަދު ސަލީމް، ފެލިދޫ ދާއިރާގެ މެންބަރު އިބްރާހީމް ފަޟުލް ރަޝީދު، ކުޑަހުވަދޫ ދާއިރާގެ މެންބަރު އަޙްމަދު ޢާމިރު، ވިލުފުށި ދާއިރާގެ މެންބަރު ޙަސަން ޢަފީފު، ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ، ފަރެސްމާތޮޑާ ދާާއިރާގެ މެންބަރު ޙުސައިން މުޙައްމަދު ލަޠީފް، ހުޅުދޫ ދާއިރާާގެ މެންބަރު އިލްޔާސް ލަބީބު، މަރަދޫ ދާއިރާގެ މެންބަރު އިބްރާހީމް ޝަރީފްގެ އިތުރުން ހިތަދޫ އުތުރު ދާއިރާގެ މެންބަރު މުޙައްމަދު އަސްލަމެވެ.