ދިރާސީ އާ އަހަރަށް ކުދިންތަކަކަށް އެހީވަމާ!

ސްކޫލް ޗުއްޓީގެ އެންމެ ފަހު މަހަށް އަޅާފައިވުމާއި އެކު ހުރިހާ ބެލެނިވެރިންވެސް މަޑުމަޑުން ދާނީ ދިރާސީ އާ އަހަރުގެ ތައްޔާރީތައް ވަމުންނެވެ. ނުވަތަ އެ ތައްޔާރީތައް ވުމާއި މެދު ވިސްނަމުންނެވެ. މާލީ ހާލަތު ތަންދޭ މިންވަރަކުން ކޮންމެ ބެލެނިވެރިޔަކުވެސް އެދޭނީ އެފަރާތުގެ ކުދިންނަށް އެންމެ ފުރިހަމަ ސާމާނާއި އެކު ދިރާސީ އާ އަހަރަށް ސްކޫލަށް ކިޔަވަން ދިޔުމެވެ.

ނަމަވެސް ބައެއް ފަހަރަށް މާލީ ހާލަތު ހުރިގޮތުން އެންމެ އެކަށީގެންވާ މިންވަރަށް ބައެއް ކުދިންނަށް ދިރާސީ އަހަރަށް ތައްޔާރު ނުވެވިވެސްދެއެވެ. މިފަދަ ކުދިންނަށް އެހީވުމަށް މިވަނީ ރަނުގެ ފުރުސަތެއް ހުޅުވިގެން ގޮސްފައެވެ. މަމްސް ޖަމިއްޔާއާއި އެހީ ޖަމިއްޔާއިން ދިރާސީ އާ އަަހަރަށް އަމާޒުކޮށް ހިންގާ "ބެކް ޓު ސްކޫލް" ޕްެރޮޖެކްޓްގެ ދަށުންނެވެ.

އެ ޖަމިއްޔާތަކުން މައުލޫމާތުދޭ ގޮތުގައި އެހީތެރިކަމަށް ބޭނުން ވެފައިވާ 40 އާއިލާއަކުން 90 ކުދިންނަށް ހާއްސަކޮށްގެން މި ބާއްްވާ ކެމްޕޭންގެ މަޤްޞަދަކީ އޭގެ ތެރެއިން ކޮންމެ ކުއްޖަކުވެސް ދިރާސީ އާ އަހަރުގެ ފުރަތަމަ ދުވަހު ސުކޫލަށް ދާއިރު އެހެން ކުދިންނޭ އެއްގޮތަށް ޔުނިފޯމް، ދަބަސް، ބޫޓް ފަދަ ތަކެތި ހަމަވެފައިވުމެވެ.

މި ކެމްޕެއިނަށް ދެގޮތަކަށް އެހީތެރިވެވިދާނެއެެވެ. އެއީ އެކުދިންނަށް ބޭނުންވާ ތަކެތި ގަތުން ނުވަތަ އެތަކެތި ގަތުމަށް މަމްސް ޖަމްއިއްޔާއަށް ފައިސާ ހަދިޔާކުރުމެވެ. މި ފައިސާ ހަދިޔާކުރާނީ މަމްސްގެ ބޭންކް އެކައުންޓްތަކަށެވެ.

ރުފިޔާ: 7730000294482

ޑޮލަރު: 7730000294483، މިއެވެ.

މި ކެމްޕެއިންގެ ލަނޑުދަނޑިތައް މިމަހުގެ 15ވަނަ ދުވަހުގެ ކުރިން ހާސިލްކުރަން ވަނީ އަމާޒުހިފާފައެވެ. އެހެންކަމުން އެހީގެ އައިޓަމްތަކާއި ފައިސާ އޭގެ ކުރިން ޖަމާކޮށްދިނުމަށް ވަނީ އެދިފައެވެ.