ދިވެހި ޒުވާނުންގެ ގައުމީ ލަފާދޭ ކޮމިޓީ އިފްތިތާހްކޮށްފި

ދިވެހި ޒުވާނުންގެ ގައުމީ ލަފާދޭ ކޮމިޓީ އިފްތިތާހްކޮށްފިއެވެ.

މިއީ ސަރުކާރުގެ މެނިފެސްޓޯއާއި މުހިންމު ސިޔާސަތުތައް ތަންފީޒުކުރުމުގައި ޒުވާނުންގެ ހިޔާލާއި މަޝްވަރާ ހޯދައި، މިކަންކަމުގައި ކުރިއަށްދާންވީ ގޮތްތަކާއި ގުޅޭގޮތުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށް ލަފާ އެރުވުމާއި ތަފާތު އެކި ދާއިރާތަކުން ޒުވާނުންނަށް ކުރިއެރުމަށް ހުރި ހުރަސްތަކާއި ގޮންޖެހުންތައް ދެނެގަނެ، އެކަންކަމާއި މެދު ފުޅާ ދާއިރާއެއްގައި މަޝްވަރާކޮށް، ހައުމީ ފެންވަރުގައި އަދި ސަރަހައްދީ ފެންވަރުގައި ހައްލު ހޯދުމަށް މަސައްކަތް ކުރެވޭނެ ގޮތްތަކާއި ގުޅޭގޮތުން ލަފާ ދިނުމުގެ މަގްސަދުގައި އުފައްދާފައިވާ ކޮމިޓީއެކެވެ.

އެކި ދާއިރާތަކުން ގާތްގަނޑަކަށް 15 މެމްބަރުން ހިމެނޭ މި ކޮމިޓީ އަށް ރައީސުލްޖުމްހޫރިއްޔާ އައްޔަނުކުރައްވާ ދެ ބޭފުޅުންނަކީ:

1) ކޮމިޓީގެ ރައީސް - ދާއޫދު އަހުމަދު

2) ފާތިމަތު ނަޒާހާ ނަޒީމް

މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ޔޫތު އެމްޕަވަމެންޓް، އިންފޮމޭޝަން އެންޑް އާޓްސް އިބްރާހިމް ވަހީދު ވިދާޅުވީ، މިއީ އަލަށް ކުރެވޭ ކަމެއް ކަމަށެވެ.

"މީގެ ކުރިންވެސް ބޯޑުތައް އޮވޭ. ޒުވާނުންގެ ލަފާ ދޭ ބޯޑުތައް، ޒުވާނުންގެ މަޝްވަރާދޭ ބޯޑުތައް އޮވޭ. އެހެންނަމަވެސް ރައީސުލްޖުމްހޫރިއްޔާ އަށް ލަފާ ދޭ ޒުވާނުންގެ ހާއްސަ ބޯޑެއް މިއީ ދިވެހި ރާއްޖޭގައި އަލަށް ކުރެވޭ ކަމެއް."

ވަޒީރު އިބްރާހިމް ވަހީދު ވިދާޅުވިއެވެ.

ވަޒީރު ވިދާޅުވީ ދިވެހި ޒުވާނުންނަށް ބަސް ނުބުނެވޭ އެއްވެސް ކަމެއް ދިވެހި އުދަރެހުގައި ނޯންނާނެ ކަމަށާއި، ދިވެހި ގައުމާއި ގުޅޭގޮތުން ރައީސް ޑރ.މުޢިއްޒު ދައްކަވާ ކޮންމެ ވާހަކައަކީ މިއަދު އިފްތިތާހް ކުރެވިގެންދިޔަ ބޯޑަށް ބަސް ބުނެވޭނެ ކަންކަން ކަމަށެވެ.