އަބްރާރު ގުރޫޕުން އުމްރާ ދަތުރު ކެންސަލްކުރީ އުސޫލާ ޚިލާފަށް؛ ހުއްދަ ބާތިލްކޮށްފި

އަލްއަބްރާރު ޙައްޖު އެންޑް ޢުމްރާ ކުންފުނިން ދިވެހިރާއްޖެއިން ޢުމްރާއަށް މީހުން ގެންދިޔުމާބެހޭ އުޞޫލާ ޚިލާފުވެފައިވާ ކަމަށާ އެ މައްސަލައާ ގުޅިގެން ޢުމްރާއަށް މީހުން ގެންދިޔުމަށް އެ ކުންފުންޏަށް ދޫކޮށްފައިވާ ހުއްދަ ބާތިލް ކޮށްފައިވާ ކަމަށް އިސްލާމިކް މިނިސްޓްރީން ބުނެފިއެވެ.

މިކަމާ ގުޅިގެން އިސްލާމިކް މިނިސްޓްރީން ނެރުނު ބަޔާނެއްގައި ބުނީ، އެ ކުންފުނިން 03 މާރިޗް އިން 26 މާރިޗްގެ ނިޔަލަށް (ރަމަޟާން) ޢުމްރާ ކުރުމަށް ހަމަޖައްސާފައިވާ ޢުމްރާ ދަތުރަށް ސަޢޫދީ ޢަރަބިއްޔާއަށް ފުރުމަށް، ފައިސާ ދެއްކި މީހުން އެންމެ ފަހުގެ ތައްޔާރީތައް ވަމުންދަނިކޮށް އެ ދަތުރު ކެންސަލް ކޮށްފައިވާ ކަމުގެ ޝަކުވާ މިނިސްޓްރީއަށް ލިބިފައިވާ ކަމަށެވެ.

”މި މައްސަލާގައި، މި މިނިސްޓްރީން މިހާތަނަށް ސާފުކުރި މަޢުލޫމާތުތަކަށް ބަލާއިރު، މި ކުންފުނިން އިސްވެ ބަޔާންކުރެވުނު މުއްދަތުގައި ކުރަން އޮތް ޢުމްރާ ދަތުރު ކެންސަލްކޮށްފައިވަނީ، މަޤުބޫލު އެއްވެސް ސަބަބެއް ނެތި އަދި ދިވެހިރާއްޖެއިން ޢުމްރާއަށް މީހުން ގެންދިޔުމާބެހޭ އުސޫލާ (09 އޮކްޓޯބަރ 2024) ޚިލާފަށެވެ.“ މިނިސްޓްރީގެ ބަޔާނުގައި ވެއެވެ.

މި ސަބަބަށްޓަކައި، އެ ކުންފުންޏަށް ދޫކުރެވިފައިވާ ދިވެހިރާއްޖެއިން މީހުން ޢުމްރާއަށް ގެންދިޔުމާބެހޭ ހުއްދަ ވަގުތީގޮތުން ހިފަހައްޓާފައިވާ ކަމަށާ، އެކަން ކުންފުންޏަށް މިހާރު އަންގާފައިވާ ކަމަށް މިނިސްޓްރީން ބުންޏެވެ.

އަދި މި ކަމާގުޅޭގޮތުން އިތުރަށް ސާފުކުރަންޖެހޭ މަޢުލޫމާތުތަކާއި ބަލަންޖެހޭ ކަންކަން ބެލުމަށްފަހު އުސޫލުގެ ތެރެއިން އަޅަންޖެހޭ ފިޔަވަޅުތައް ކުންފުންޏާ ދެކޮޅަށް އަޅާނެ ކަމަށްވެސް ބުނެފައިވެއެވެ.

އަދި މި މައްސަލައާގުޅިގެން އެ ކުންފުނީގެ ޢުމްރާވެރިންގެ ތެރެއިން މިހާތަނަށް ޢުމްރާގެ އަޅުކަމަށް ނުފުރިތިބި ޢުމްރާވެރިންނަށް އެހީތެރިކަން ފޯރުކޮށްދެވެންހުރި ގޮތްތަކަކީ ކޮބައިތޯ ބަލައި އެ ޚިދުމަތްތައް ފަހިކޮށްދިނުމުގެ މަސައްކަތް މިނިސްޓްރީން ކުރަމުންގެންދާކަން ވެސް މިނިސްޓްރީން ފާހަގަކޮށްފައިވެއެވެ.