ބަންކަރިންގެ ހިދުމަތަށް ބޭނުންވާ ޕައިލެޓް ބޯޓާއި ޓަގް ބޯޓް ކުޅުދުއްފުއްޓަށް ގެންގޮސްފި

ރާއްޖޭގެ އެންމެ އުތުރުގައި ބަންކަރިންގެ ހިދުމަތް ފެށުމަށް ތައްޔާރުވުމުގެ ގޮތުން އެކަމަށް ބޭނުންވާ ޕައިލެޓް ބޯޓާއި ޓަގްބޯޓު ކުޅުދުއްފުއްޓަށް ގެންގޮސްފިއެވެ.

މިކަމާ ގުޅޭގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނީ، އުތުރުގައި ބަންކަރިން ފެށުމަށް ތައްޔާރުވުމުގެ ގޮތުން އެ ހިދުމަތަށް ބޭނުންވާ ޕައިލެޓް ބޯޓާއި ޓަގްބޯޓު، އިއްޔެގެ ވަގުތެއްގައި ކުޅުދުއްފުށީގައި ހުންނަ އެމްޕީއެލް ބަނދަރަށް ގެންގޮސްފައިވާކަމަށެވެ. އެމްޕީއެލްއިން ބުނީ، ބަންކަރިންގެ ހިދުމަތް ފެށުމަށްޓަކައި އެ އެކުންފުނިން ތާވަލްކޮށްފައިވާ ކަންކަން ހަމަޖެހިފައިވާ ގޮތަށް ކުރިއަށްދާކަމަށެވެ.

ރާއްޖޭގެ އުތުރުގައި ބަންކަރިންގެ ހިދުމަތް ފެށުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އިޤްތިސާދީ ސިޔާސަތުގެ ތެރޭގައި ހިމެނޭޢ ވަރަށް މުހިއްމު ހިދުމަތެކެވެ. މިއީ ރާއްޖޭގެ އިޤްތިސާދު ޑައިވަރސިފައިކުރުމަށް ކުރަމުންގެންދާ މަސައްކަތުގެ ވަރަށް މުހިއްމު ބައެއްކަމަށް ސަރުކާރުން ވަނީ ބުނެފައެވެ.

ބަންކަރިންގެ ހިދުމަތާ ގުޅޭގޮތުން މިދިޔަ ޖުލައިމަހު ޕީއެންސީ މައި ހަރުގޭގައި ބޭއްވި ޖަލްސާގައި ވާހަކަދައްކަވަމުން އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު ވިދާޅުވެފައިވަނީ، ސަރުކާރުގެ އަމާޒަކީ ކުރިއަށްއޮތް މަސްދުވަހުގެ ތެރޭގައި ބަންކަރިންގެ ހިދުމަތް ފެށުން ކަމަށެވެ. މި ހިދުމަތް ފެށުމަށްޓަކައި ވޭތުވެދިޔަ ދުވަސްތަކުގައި މުހިއްމު ބައެއް މަސައްކަތްތައް ކުރިއަށްގެންގޮސްފައިވާކަން މިނިސްޓަރު ވަނީ ފާހަގަކުރައްވާފައެވެ.

މިގޮތުން އެސްޓީއޯއިން ބޮޑު 2 ޓޭންކަރު ގެނެސްފައިވާއިރު، އެމްއެންޑީއެފާއި އެކު އެސްޓީއޯއިން ޗާޓު އަޕްޑޭޓް ކުރުމުގެ މަސައްކަތްތައް ކުރަމުން އަންނަ ކަމަށްވެސް ސައީދު ވިދާޅުވިއެވެ. މީގެ އިތުރުންވެސް ބަންކަރިން ފެށުމަށްޓަކައި ކަސްޓަމާއި އިމިގްރޭޝަނުންވެސް މުހިންމު ބައެއް މަސައްކަތްތައް މިހާރު ނިމުމަކާ ހަމަޔަށް އައިސްފައިވާކަން މިނިސްޓަރު ވަނީ ފާހަގަކުރައްވާފައެވެ.

ރާއްޖޭގައި ބަންކަރިންގެ ހިދުމަތް ފެށި އެކަމުން ދައުލަތުގެ ބައިތުލްމާލަށް އާމްދަނީ ވަންނަން ފެށުމާއެކު، ޤައުމީ އުފެއްދުންތެރިކަމުގެ ނިސްބަތް މިހާރު އޮތް 6.5 ބިލިއަން ޑޮލަރުގެ ތެރެއަށް 400 މިލިއަން ޑޮލަރު އިތުރުވާނޭކަމަށް ސަރުކާރުން ބުނެއެވެ.

މޯލްޑިވްސް އިކޮނޮމިކް ގޭޓްވޭ ޕްރޮޖެކްޓްގެ ދަށުން އިހަވަންދިއްޕޮޅުގައި ބައިނަލްއަގުވާމީ ބަންކަރިންގެ ހިދުމަތް ފެށުމަށް އެސްޓީއޯއާއި ވިޓޯލް ގުރޫޕާ ދެމެދު ޓާރމް ޝީޓް އެއްބަސްވުމުގައި ސޮއިކޮށްފައިވަނީ، މިއަހަރުގެ މާޗުމަހުގެ ތެރޭގައެވެ.