ދެ ދައުލަތުގެ ހައްލާއި ގުޅޭ ގަރާރު ބަލައިގަތުމުން ރައީސް މަރުހަބާ ވިދާޅުވެއްޖެ

ސުލްޙަވެރިގޮތުގައި ފަލަސްޠީނުގެ މައްސަލަ ޙައްލުކުރުމާއި ދެ ދައުލަތުގެ ޙައްލު ތަންފީޒުކުރުމާ ގުޅޭ ޤަރާރު، "ނިއުޔޯކް ޑެކްލެރޭޝަން" ބަލައިގަތުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުހަބާ ވިދާޅުވެ ރަސްމީ ބަޔާނެއް ނެރުއްވައިފި އެވެ.

އެ މަނިކުފާނު ނެރުއްވި ބަޔާނުގައި ވިދާޅުވީ ޖުލައި 28 އިން 30 އަށް، ސަޢޫދީ ޢަރަބިއްޔާ އާއި ފަރަންސޭސިވިލާތުގެ ރިޔާސަތުގައި، އ.ދ ގައި ކުރިއަށްގެންދިޔަ "ހައި-ލެވެލް އިންޓަރނޭޝަނަލް ކޮންފަރަންސް ފޯ ދަ ޕީސްފުލް ސެޓްލްމަންޓް އޮފް ދަ ކުއެސްޝަން އޮފް ޕަލަސްތީން އެންޑް ދި އިންޕްލިމެންޓޭޝަން އޮފް ދަ ޓޫ- ސްޓޭޓް ސޮލިއުޝަން" ގެ ނަތީޖާ ކަރުދާސް ކަމުގައިވާ، ސުލްޙަވެރި ގޮތުގައި ފަލަސްޠީނުގެ މައްސަލަ ޙައްލުކުރުމާއި ދެ ދައުލަތުގެ ޙައްލު ތަންފީޒުކުރުމާ ގުޅޭ ޤަރާރު "ނިއުޔޯކް ޑެކްލެރޭޝަން" ބަލައިގަތުމަކީ ދިވެހި ސަރުކާރުން މަރުޙަބާ ކިޔާ ކަމެއް ކަމަށެވެ.

"ނިއުޔޯކް ޑެކްލެރޭޝަން" އަކީ، ފަލަސްޠީނުގެ ރައްޔިތުންގެ ދާއިމީ ސިޔާދަތަށާއި، ފަލަސްޠީނުގެ ދައުލަތް ބަލައިގަތުމަށާއި، އެ ދައުލަތަށް އ.ދ ގެ ފުރިހަމަ މެންބަރުކަން ދިނުމަށް، ބައިނަލްއަޤުވާމީ މައިދާނުން ދޭ އެއްބާރުލުމުގެ ފާޅުކަން ބޮޑު ހެއްކެއް ކަމަށް ވެސް އެމަނިކުފާނު ވިދާޅުވި އެވެ.

އަދި އެއީ، އިސްރާއީލުން ފަލަސްޠީނަށް ކެނޑިނޭޅި ދެމުންދާ ޙަމަލާތަކުން ލިބޭ ގެއްލުމުން އަރައިގަތުމަށް ދެމެހެއްޓެނިވި ގޮތްތަކެއް ހޯދައިދިނުމުގައްޔާއި، ފަލަސްޠީނުގެ އިޤްތިޞާދީ ޤާބިލުކަމާއި ރައްކާތެރިކަން ކަށަވަރުކުރުމުގައި އެއްބާރުލުން ދިނުމަށް، ބައިނަލްއަޤުވާމީ މައިދާނުން އެކަށައެޅި ވަރުގަދަ އިލްތިޒާމެއް ކަމަށް ވިދާޅުވި އެވެ.

ރައީސްގެ ބަޔާނުގައި 1967 ވަނަ އަހަރުގެ ކުރިން އޮތް ބޯޑަރުތަކާ އެއްގޮތަށް، އިރުމަތީ ޤުދުސް ހިމެނޭހެން، ބައިނަލްއަޤުވާމީ ޤާނޫނުތަކާއި އދ.ގެ ގުޅުންހުރި ޤަރާރުތަކާ އެއްގޮތްވާގޮތުގެ މަތިން ފަލަސްޠީނުގައި މިނިވަން، މުސްތަޤިއްލު ދައުލަތެއް ޤާއިމުކުރުމަށް، ދިވެހި ސަރުކާރާއި ރައްޔިތުން ސާބިތުކަމާއެކު އެއްބާރުލުން ދެމުންގެންދާނެ ކަމަށް ވިދާޅުވި އެވެ.

ފަލަސްތީން-އިޒްރޭލް މައްސަލައަށް އޮތީ ދެ ދައުލަތެއްގެ ހައްލު ކަމަށް ބައިނަލްއަގްވާމީ ދުނިޔެ ވާހަކަ ދައްކާތާ އެތައް އަހަރެއް ވެއްޖެ އެވެ. ނަމަވެސް އިޒްރޭލަށް މަދުދޭ މުސްލިމުންނާ އަދާވާތްތެރި ހުޅަނގުގެ ގައުމުތަކުގެ ވެރީން ދަނީ އެކި ބަހަނާތަކުގައި އެކަމަށް ދެކޮޅު ހަދަމުންނެވެ.

ފަލަސްތީނުގެ ބިންތަކަށް ވެރިވެގަނެގެން ތިބި ޔަހޫދީ އިޒްރޭލުން ދަނީ މުޅި ފަލަސްތީން ނައްތާލާ ހުރިހާ ބިމެއް އެ މީހުންގެ ބާރުގެ ދަށަށް ގެނައުމަށް އިންސާނިއްޔަތާ ހިލާފު އެތައް ޖަރީމާތަކެއް ހިންގަމުންނެވެ. ނަމަވެސް ހިތްވަރުގަދަ މުޖާހިދުންގެ ސަފުތަކުގެ ބަދަހިކަމާއި ގަދަ ހިތްވަރުން މިހާތަނަށް އެކަން ކާމިޔާބުވެފައި ނެތީ އެވެ.