ހައިވޭގައި ވޭނަކާއި ސައިކަލެއްޖެހި ހިނގި ނުރައްކާތެރި އެކްސިޑެންޓެއްގައި ކުޑަކުއްޖަކަށް ފަރުވާދެނީ!
ލިޔުންތެރިޔާ
އަބްދުﷲ ހުސައިން
މިއަދު އިރުއޮއްސެން އުޅެނިކޮށް ހައިވޭގައި ވޭނަކާއި ސައިކަލެއްޖެ ހިނގި ނުރައްކާތެރި އެކްސިޑެންޓެއްގައި ކުޑަކުއްޖަކަށް ހޮސްޕިޓަލުގައި ފަރުވާދޭން ފަށައިފިއެވެ.
ފުލުހުން ބުނީ މި އެކްސިޑެންޓް ހިނގިކަމުގެ ރިޕޯޓް ފުލުހުންނަށް ލިބުނީހަވީރު 17:53 ހައިރުކަމަށެވެ. އެކްސިޑެންޓް ހިނގާފައިވަނީ ސީޕްލޭން ޓާމިނަލް ސަރަހައްދުން ނިކުތް ވޭނަކާއި މާލޭކޮޅުން ހުޅުމާލެއަށް ދުއްވާފައިދިޔަ ސައިކަލެއް ޖެހިގެންކަމަށް ފުލުހުން ބުންޏެވެ.
މި އެކްސިޑެންޓްގައި ސައިކަލް ދުއްވަން އިން މީހާއަށް ހުޅުމާލޭ ހޮސްޕިޓަލުގައި ފަރުވާދެމުން އަންނައިރު، ސައިކަލުގައި އިން 6 އަހަރުގެ އަންހެން ކުއްޖާއަށް ޓްރީ ޓޮޕް ހޮސްޕިޓަލުގައި ދަނީ ފަރުވާދެމުންނެވެ. އެމީހުންނަށް ލިބުނު އަނިޔާގެ ތަފްސީލެއް އަދި ސާފެއް ނުވެއެވެ.
މި އެކްސިޑެންޓް ހިނގާފައިއޮތް ސަރަހައްދު ފެނުނު މީހަކު ވޮއިސްއާ ވާހަކަދައްކަމުން ބުނީ އެކްސިޑެންޓް ހިނގިތާ ގަޑިއިރެއްވި އިރުވެސް އެކްސިޑެންޓް ހިނގި ތަނުގައި ކުއްޖާގެ ދަބަހާއި އިންޓަވަލް ފުޅި އަދި ކުއްޖާ އާއި ސައިކަލް ދުއްވަން އިން މީހާގެ ހެލްމެޓް އޮތްކަމަށެވެ. ހެލްމެޓް ސައިކަލާ ދުރުގައި އޮތްއިރު، ދަބަސްއޮތީ ސައިކަލް ކައިރީގައެވެ.
"ހީވަނީ ވަރަށް ސީރިއަސް އަނިޔާތަކެއް ލިބުނީމަހެން މަންޒަރު އެގޮތަށް އެއޮތީ. ކުއްޖާގެ ފޮތްދަބަސް ހައިވޭއަށް ދޫކޮށްލާފައި ދާނީ ސީރިއަސް އަނިޔާތަކެއް ލިބުމުންކަމަށް ބެލެވެނީ" ވޮއިސްއަށް މައުލޫމާތު ހިއްސާކުރި މީހާ ބުންޏެވެ. އެމީހާ ބުނީ ހައިވޭ އެކްސިޑެންޓް ހިނގި ތަނުގައި ލޭވެސް ފެންނަން ހުރިކަމަށެވެ.
ފުލުހުން ބުނީ މި އެކްސިޑެންޓް ތަހުގީގުކުރަމުން އަންނަ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
