ފޮރިން އިންވެސްޓްމަންޓް އައު ޤާނޫނާއެކު ބޭރުގެ ބޭންކުތަކުގެ އިތުބާރު ބޮޑުވެގެންދާނެ: ސައީދު

ފޮރިން އިންވެސްޓްމަންޓާބެހޭ އައު ޤާނޫނާއެކު ރާއްޖެއިން ބޭރުގެ ބޭންކްތަކުގެ އިތުބާރު ރާއްޖެއަށް ބޮޑުވެގެންދާނޭކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ރާއްޖޭގައި މިއަދު މިވަނީ 45 އަހަރަށްވުރެ ގިނަ ދުވަސްފަހުން ބޮޑެތި ބަދަލުތަކާއެކު ފޮރިން އިންވެސްޓްމަންޓާ ބެހޭޤާނޫނު ގެޒެޓްކޮށްފައެވެ. ފޮރިންއިންވެސްޓްމަންޓް އައު ޤާނޫނާ ބެހޭގޮތުން މިއަދު ރައީސް އޮފީހުގައި ބޭއްވި ބައްދަލުވުމުގައި ވާހަކަދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ އައު ފޮރިން އިންވެސްޓްމަންޓް ޤާނޫނު ވުޖޫދަށް އައުމާއެކު މީގެ ކުރިން ބޭރުގެ ބޭންކުތަކަށް ލިބިފައިނެތް އިތުބާރާއި ޔަގީންކަން ލިބިގެންދާނޭކަމަށެވެ.

ސައީދު ވިދާޅުވީ މި ޤާނޫނު ފަރުމާކޮށްފައިވާނީ ރާއްޖެ އަންނަ ބޭރުގެ އިންވެސްޓަރުންގެ ސަބަބުން ދިވެހި ވިޔަފާރިތަކުގެ ހައްޤުތައްވެސް ނުގެއްލޭނޭހެން ކަމަށެވެ. މިގޮތުން މި ޤާނޫނު ފަރުމާކުރުމުގައި ރައީސް ޑރ.މުއިއްޒުގެ އިރުޝާދުގެ ދަށުން އެންމެ އިސްކަމެއް ދީފައިވާނީ ދިވެހިންގެ ހައްގުތައް ނުގެއްލޭ ގޮތަށްކަމަށްވެސް ސައީދު ވިދާޅުވިއެވެ.

މިހާރު މިއޮތް ޤާނޫނަކީ ވަރަށްބޮޑަށް ދިރާސާކުރެވިގެން ބައިނަލްއަޤްވާމީ ބެސްޓް ޕްރެކްޓިސްތަކާ އެއްގޮތްވާގޮތަށް އުފަންކުރެވިފައިވާ ޤާނޫނެއް.

އިކޮނޮމިކް މިނިސްޓަރު ސައީދު ވިދާޅުވިއެވެ

ފޮރިން އިންވެސްޓްމަންޓް އައު ޤާނޫނާ ބެހޭގޮތުން އެޓާނީ ޖެނެރަލް އަހުމަދު އުޝާމް ވިދާޅުވީ، މީގެ ކުރިން ލިބިފައިނެތް ނެތް ޔަގީންކަން މިފަހަރުގެ ފޮރިން އިންވެސްޓްމަންޓް ގާނޫނުން ލިބޭނެކަމަށެވެ.

އުޝާމް ވިދާޅުވީ، ކުރީގެ ހާލަތާއި ބަލާއިރު އޭރުގައި ހަދާފައިވާ ފޮރިން އިންވެސްޓްމަންޓް ގާނޫނަކީ ރަނގަޅު ގާނޫނަކަށްވި ނަމަވެސް، އެ ގާނޫނަކީ މިހާރު ރާއްޖެއަށް އިންވެސްޓް ކުރަން އަންނަން ބޭނުންވާ ފަރާތްތަކަށް ލިބިދޭން ޖެހޭ ހައްގުތަކާއި ރައްކާތެރިކަމަށް ބަލާއިރު އެންމެ ރަނގަޅު ގާނޫނެއް ނޫން ކަމަށެވެ.

މި ގާނޫނާއިއެކު ވިޔަފާރި ރަޖިސްޓްރީ ކުރުމުގެ ގާނޫނަށާއި، މާލީ ސެކިއުރިޓީސް އާއި ބެހޭ ގާނޫނަށް ވެސް އިސްލާހުތަކެއް ގެނެސްފައިވާނެ ކަމަށާއި، ކުރިއަށް އޮތް ތަނުގައި ވެސް މިފަދަ އިންވެސްޓްމަންޓްތަކަށް ފަހި މާހައުލެއް ގާއިމުކޮށްދިނުމަށްޓަކައި އިސްލާހުތައް ގެންނާނެ ކަމަށް އުޝާމް ވިދާޅުވިއެވެ.

ވަރަށް ކުރިއްސުރެ ފޮރިން އިންވެސްޓްމަންޓް ގާނޫނު އިސްލާހުކޮށް، ނުވަތަ އެކަމާއި ގުޅޭ އައު ގާނޫނެއް ހެދުމުގެ މަސައްކަތް ތަފާތު ގިނަ ސަރުކާރުތަކުން އެބަހުރިކޮށްފައި

އުޝާމް ވިދާޅުވިއެވެ.

އުޝާމް ވިދާޅުވީ، ޒަމާނާއި ގުޅޭ ފޮރިން އިންވެސްޓްމަންޓް ގާނޫނެއް ތަސްދީގު ކުރެވިގެންދިޔައީ ވަރަށް ގިނަ އަހަރުތަކެއްގެ އިންތިޒާރަށް ފަހު ކަމަށާއި، މި ގާނޫނަށް 3 މަސް ފަހުން އަމަލު ކުރަން ފެށުމުން މިހާރަށް ވުރެ ބޮޑެތި، ގިނަ އިންވެސްޓްމަންޓްތައް ރާއްޖެއަށް އަންނާނެ ކަމަށް އުންމީދު ކުރައްވާކަމަށެވެ.

މިއަދު ގެޒެޓްކުރި ފޮރިން އިންވެސްޓްމަންޓްތަކާ ބެހޭ ޤާނޫނަކީ މިހާރު 45 އަހަރުވެފައިވާ ފޮރިން އިންވެސްޓްމެންޓްގެ އުސޫލުތައް ހަރުދަނާކޮށް، އިންވެސްޓަރުންނަށް މިހާރަށް ވުރެ ފަހި ފުރުސަތުތަކެއް ގާނޫނީ ގޮތުން ލިބޭނެ ގޮތަށް އެކުލަވައިލާފައިވާ ގާނޫނެކެވެ.

މި ގާނޫނުގައިވާ ގޮތުން، ރާއްޖޭގައި އެކި ދާއިރާތަކުން ހުރި ވިޔަފާރީގެ ފުރުސަތުތަކާ ގުޅޭ ގޮތުން ބޭނުންވާ އިންވެސްޓްމެންޓްތައް ދެނެގަނެ، ދިރާސާކުރުމާއި ފީޒިބިލިޓީ ރިޕޯޓުތައް ހެދުމާއި، ގާނޫނުގައި ކަނޑައަޅާ ދާއިރާތަކުން، ހުއްދަ ހޯދައިގެން ބޭރުގެ އިންވެސްޓަރުންނަށް ރާއްޖޭގައި އިންވެސްޓްކުރުމުގެ ފުރުސަތު ލިބޭނެއެވެ. މި ގާނޫނުގައި، ބޭރުގެ އިންވެސްޓަރުންނަށް ރާއްޖޭގައި އިންވެސްޓްކުރުމުގެ ފުރުސަތު ލިބޭނެ ދާއިރާތަކާއި ޝަރުތުތަކާ އެކު އިންވެސްޓްކުރެވޭނެ ދާއިރާތައް ވެސް ކަނޑައަޅާފައިވެއެވެ.

މި ގާނޫނު ބުނާގޮތުން، އެ ފަރާތްތަކަށް ފޮރިން އިންވެސްޓްމަންޓް ގެ ލައިންސަންސެއް އިކޮނޮމިކް މިނިސްޓްރީން ދޫކުރާއިރު، އެ ލައިސަންސް ދޫކުރެވޭ ފަރާތުގެ މައުލޫމާތު މިނިސްޓްރީން ދަފްތަރުކޮށް ބަލަހައްޓަން ޖެހެއެވެ.

އިންވެސްޓަރުން އިންވެސްޓް ކުރާނެ ދާއިރާތައް ކަނޑައަޅާނީ، ވަޒީރުންގެ މަޖިލީހުގެ މަޝްވަރާއާ އެކު އެވެ. އިންވެސްޓްކުރުމުގެ ހުއްދައަށް އެދި ހުށަހަޅާ ހުށަހެޅުމެއްގައި ގާނޫނުގައި ބަޔާންވެފައިވާ އެންމެހާ ކަންކަން ފުރިހަމަވެފައިވާ ނަމަ އެ ހުށަހެޅުން މިނިސްޓްރީއަށް ލިބޭތާ 30 ދުވަހުގެ ތެރޭގައި އެ ހުށަހެޅުމާ މެދު ގޮތެއް ކަނޑައަޅަން ވާނެ އެވެ.

ހަމައެއާއިއެކު، އެ އިންވެސްޓްމަންޓަކީ ހުއްދަ ދީފައިނުވާ އިންވެސްޓްމަންޓެއް ނަމަ، މުޅި ވިޔަފާރީގެ އަގުގެ 30 ޕަސެންޓަށް ވުރެ ބޮޑު ނޫން އަދަދަކުން ޖޫރިމަނާ ކުރާނެ ކަމަށާއި، ފޮރިން އިންވެސްޓްމެންޓް ލައިސެންސް ހޯދުމުގައި ސައްހަ ނޫން މައުލޫމާތު ހުށަހަޅާފައިވާ ކަން ސާބިތުވެއްޖެ ނަމަ އެއް ލައްކަ އާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރާނެ ކަމަށް ވެސް އާ ގާނޫނުގައި ވެއެވެ.