8 ގައުމެއްގެ އައު ސަފީރުންގެ ސަފީރުކަމުގެ ފަތްކޮޅު ރައީސް ޑރ.މުޢިއްޒަށް އަރުވައިފި

ގައުމުތަކުން ރާއްޖެ އަށް ކަނޑައަޅާ އައު 8 ސަފީރުންގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަށް އަރުވައިފިއެވެ.

ވަކިވަކިން ބޭއްވި މި ރަސްމިއްޔާތު ތަކުގައި ކޮންމެ ސަފީރަކުވެސް ޖުމްހޫރީ މައިދާނުން ފެށިގެން ރައީސުލްޖުމްހޫރިއްޔާގެ އޮފީހާއި ހަމައަށް ވަޑައިގެންނެވީ ހަތްކޮޅުގައި ރަސްމީ އިއްޒަތުގައި ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާއެކު ހިންގަވައިފައެވެ.

ސަފީރުކަމުގެ ފަތްކޮޅު ރައީސް ޑރ.މުޢިއްޒު އަށް އެރުއްވީ:

1) ސްލޮވާކް ރިޕަބްލިކްގެ އައު ސަފީރު، ރޮބަޓް މެކްސިއަން

2) އަޔަލެންޑްގެ އައު ސަފީރު، ކެވިން ކެލީ

3) ޗިލޭގެ އައު ސަފީރު، ހުއަން އެންގުލޯ

4) އޮމާންގެ އައު ސަފީރު، އަޙްމަދު ޢަލީ ސާޢިދު އަލް ރަޝްދީ

5) ކެމްބޯޑިއާގެ އައު ސަފީރު، ކޮއީ ކުންގް

6) ޕެރޫގެ އައު ސަފީރު، ހާވިއެރ މެނުއެލް ޕައުލިނިކް ވެލަރޑެ

7) ލާއޯ ޕީޕަލްސް ޑިމޮކްރެޓިކް ރިޕަބްލިކްގެ އައު ސަފީރު، ބުންމީ ވަންމަނީ

8) ފިންލޭންޑްގެއައު ސަފީރު، ކިއްމޯ ލަހްޑެވީރްތަ

އައު ސަފީރުން، ސަފީރުކަމުގެ ފަތްކޮޅު ރައީސް ޑރ.މުޢިއްޒު އަށް އެރުވުމުން، އެމަނިކުފާނު ވަނީ ތަހުނިޔާ ވިދާޅުވެ، ދިވެހިރާއްޖެއަށް ވަޑައިގެންނެވިކަމަށްޓަކައި މަރްޙަބާ ވިދާޅުވެފައެވެ.

އެއަށްފަހު ރައީސް ޑރ.މުޢިއްޒު ވަނީ އައު ސަފީރުންނާއި އެކު ވަކި ވަކިން ބޭއްވި މި ރަސްމިއްޔާތުގެ ތެރޭގައި، ކޮންމެ ސަފީރަކާއި އެކުވެސް، ދެޤައުމުގެ ގުޅުން އިތުރަށް ބަދަހިކުރެވިދާނެ ދާއިރާތަކާ ގުޅޭގޮތުން މަޝްވަރާކުރައްވާފައެވެ.