ވިޔަފާރީގެ ދާއިރާއިން ސައުދީއާއެކު ގުޅުން ބަދަހިކުރަން އެއްބަސްވުމަކަށް

ދިވެހިރާއްޖެއާއި ސައުދީ އަރަބިއާއާ ދެމެދު ވިޔަފާރީގެ ގުޅުން އިތުރަށް ބަދަހިކުރުމަށް އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއި ކުރެވުނީ އިކޮނޮމިކް މިނިސްޓަރ މުޙައްމަދު ސަޢީދު ސައުދީ އަރަބިއާއަށް ކުރައްވަމުންދާ ރަސްމީ ދަތުރުފުޅުގެ ތެރެއިންނެވެ.

ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދު އެވެ. ސައުދީ އަރަބިއްޔާ ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ އެ ގައުމުގެ މިނިސްޓާ އޮފް ކޮމާސް މަޖީދު ބިން އަބްދުالله ބިން އުސްމާން އެވެ.

އިކޮނަމިކް މިނިސްޓްރީން ބުނީ މި އެއްބަސްވުމުގެ ސަބަބުން، ދެ ޤައުމު ދެމެދު ވިޔަފާރީގެ ގުޅުން ހަރުދަނާ ކުރެވި، ބޯޑަރ ހުރަސްކޮށް ކުރެވޭ ފޮރިން އިންވެސްޓްމަންޓްތައް އިތުރަށް ފުޅާ ކުރުމަށް މަގުފަހި ވެގެންދާނެ ކަމަށެވެ.

އަދި، ވިޔަފާރިއާއި ފަތުރުވެރިކަން، އަދި އިމާރާތްކުރުން ފަދަ މުހިންމު ދާއިރާތަކުން ދެ ޤައުމު ދެމެދު ގުޅުން އިތުރަށް ބަދަހިވެގެންދާނެ ކަމަށެވެ.

ސަޢޫދީ ޢަރަބިއްޔާގެ މިނިސްޓަރ އޮފް ކޮމާރސް އަދި ޖެނެރަލް އޮތޯރިޓީ އޮފް ފޮރިން ޓްރޭޑްގެ ބޯޑް ޗެއާރމަން، ޑރ. މާޖިދު އަދި ސަޢޫދީ ޢަރަބިއްޔާގެ ސަރުކާރުން ދިވެހިރާއްޖޭގެ ތަރައްޤީއާއި ކުރިއެރުމަށް ދެއްވަމުން ގެންދަވާ އަހައްމިއްޔަތުކަމާއި، ބާއްވަވާ ގާތް ގުޅުން ފާހަގަކުރައްވައި، އެކަމަށް މިނިސްޓަރ ސަޢީދު ޝުކުރު އަދާކުރައްވާފައިވެއެވެ.

އަދި ސޮއިކުރި އެއްބަސްވުމަކީ، ދެ ޤައުމު ދެމެދު ޒަމާނުއްސުރެ ޤާއިމްކުރެވިފައިވާ ގާތް ގުޅުމުގެ ރަމްޒެއް ކަމުގައާއި، މި އެއްބަސްވުމުގެ އެހީގައި، ރައީސް ޑރ. މުޙައްމަދު މުޢިއްޒުގެ ދުރުރާސްތާ އިޤްތިޞާދީ ވިސްނުންފުޅު ހާސިލްކުރުމަށް އިތުރު ބާރަކަށް މިކަން ވެގެންދާނެކަން ފާހަގަކުރެއްވިއެވެ.

އެއްބަސްވުމާއި ގުޅޭގޮތުން އެކްސްގައި ކުރެއްވި ޕޯސްޓެއްގައި ސަޢީދު ވިދާޅުވި ގޮތުގައި، ސައުދީ އަރަބިއާގެ ވިޔަފާރި މިނިސްޓަރ ޑރ. މަޖިދް އަލް ޤަސަބީއާ އެކު ބޭއްވުނު ބައްދަލުވުމުގައި ދެ ޤައުމުގެ ދެމެދުގައި ވިޔަފާރިއާއި އިންވެސްޓްމަންޓް އިތުރުކުރުމާ ގުޅޭގޮތުން މަޝްވަރާކުރެވުނެވެ.

މީގެ އިތުރުން، މިނިސްޓަރ ސަޢީދު ވަނީ ސައުދީ އަރަބިއާގެ އިންވެސްޓްމަންޓް މިނިސްޓަރ އިބްރާހިމް އަލްމުބާރަކްއާވެސް ބައްދަލުކުރައްވާފައެވެ.

މި ބައްދަލުވުމުގައި ދެ ޤައުމުގެ ދެމެދުގައި އައު އިންވެސްޓްމަންޓް ފުރުސަތުތައް ހޯދުމާއި، ދެ ޤައުމަށް ފައިދާވާނެ ގޮތަށް އިޤްތިޞާދީ ގުޅުން އިތުރަށް ވަރުގަދަކުރުމާ ބެހޭގޮތުން މަޝްވަރާކުރެވުނު ކަމަށް ވަޒީރު ވިދާޅުވިއެވެ.

މިނިސްޓަރ ސަޢީދު ވިދާޅުވި ގޮތުގައި، މި ދަތުރުފުޅުގައި ކުރެވުނު މަޝްވަރާތަކަކީ ވަރަށް އުފެއްދުންތެރި މަޝްވަރާތަކެކެވެ. އަދި ދެ ޤައުމުގެ ދެމެދުގައި ކުރިއްސުރެ އޮތް ރަޙްމަތްތެރިކަމުގެ ގުޅުމުގެ މައްޗަށް ބިނާކޮށް، އިތުރު ވިޔަފާރީގެ ފުރުސަތުތައް ހޯދުމަށް ދެ ޤައުމުންވެސް ޝައުޤުވެރިކަން ފާޅުކުރިކަން ފާހަގަކުރެއްވިއެވެ.