އޮފްސައިޓް ޑޭޓާ ސިސްޓަމް ގާއިމުކުރުމުގެ މަސައްކަތް ހަފްތާއެއްގެ ތެރޭގައި ނިންމާލެވޭނެ: މަލީހު

ނޭޝަނަލް ޑޭޓާ ސެންޓަރުގެ ހިދުމަތް ފުޅާކުރުމަށް ޓަކައި ގާއިމުކުރާ އޮފްސައިޓް ޑޭޓާ ސިސްޓަމުގެ މަސައްކަތް ހަފްތާއެއްގެ ތެރޭގައި ނިންމާލެވޭނެ ކަމަށް ކޮމިއުނިކޭޝަން މިނިސްޓަރު މުހައްމަދު މަލީހު ޖަމާލު ވިދާޅުވެއްޖެއެވެ.

މިނިސްޓަރު މަލީހު މިހެން ވިދާޅުވީ، އޮފްސައިޓް ޑޭޓާ ސިސްޓަމުގެ މަސައްކަތް ކޮމިއުނިކޭޝަން މިނިސްޓްރީން ނެޝަނަލް ސެންޓާ ފޮ އިންފޮމޭޝަން ޓެކްނޮލިޖީއާ ހަވާލުކުރުމަށްފަހު މިއަދު ހަވީރު ބޭއްވި ނޫސްވެރިންގެ ބައްދަލުވުމުގައެވެ.

މިނިސްޓަރު މަލީހު ވިދާޅުވި ގޮތުގައި ސަރުކާރުގެ މުހިންމު މައުލޫމާތުތަކާއި ޑޭޓާ ލީކުވާ މައްސަލައިގެ ޝަކުވާ ކުރިން ލިބެމުން އައެވެ. ނަމަވެސް އެކަން ހަރުދަނާ ކުރުމަށް ކޮމިއުނިކޭޝަން މިނިސްޓްރީން މިހާރު މަސައްކަތްތަކެއް ކޮށްފައިވާ ކަމަށް ވިދާޅުވިއެވެ.

އެގޮތުން އައިއެސްއޯ މިންގަނޑަށް ފެއްތުމަށް ޓަކައި ކުރަން ޖެހޭ މުހިންމު މަސައްކަތްތަކެއް މިނިސްޓްރީން ފަށާފައިވާނެ ކަމަށް މިނިސްޓަރު ވިދާޅުވިއެވެ.

އޮފްސައިޓް ޑޭޓާ ސިސްޓަމް ގާއިމުކުރަން ނެޝަނަލް ސެންޓާ ފޮ އިންފޮމޭޝަން ޓެކްނޮލިޖީއާ ހަވާލުކުރި އިރު، އެ މަޝްރޫއަށް ހަރަދުވާނީ ޖުމުލަ 1.5 މިލިއަން ރުފިޔާ ކަމަށް ވެސް މިނިސްޓަރު ވިދާޅުވިއެވެ.

މިނިސްޓަރު ވިދާޅުވި ގޮތުގައި މިއަދު އިތުރު ކުރި މި ޑޭޓާ ސިސްޓަމްގެ ކެޕޭސިޓީއަކީ 100 ޓެރަބައިޓެވެ. މި މަސައްކަތުގެ ސަބަބުން ސަރުކާރުގެ މައުލޫމާތު ބެލެހެއްޓުމުގެ ނިޒާމު މިހާރަށްވުރެ ހަރުދަނާވެގެން ދާނެ ކަމަށް ވިދާޅުވިއެވެ. މަލީހު ވިދާޅުވި ގޮތުގައި ސަރުކާރުން ބަލަހައްޓާ މައުލޫމާތުތަކަކީ ހާއްސަކޮށް ޑޭޓާ އަކީ މިހާރަށްވުރެ ރައްކާތެރި އެއްޗަކަށް ހެދުމަކީ މިނިސްޓްރީގެ އަމާޒެކެވެ.