އިސްރާއީލްގައި ހުންނަ އަލްޖަޒީރާގެ އޮފީސް ބަންދު ކުރުމަށް ފާސްކޮށްފި

އިސްރާއީލްގައި ހުންނަ އަލްޖަޒީރާގެ އޮފީސް ބަންދު ކުރުމަށް ފާސްކޮށްފިއެވެ.

ފަލަސްތީނުގެ ޚަބަރުތައް ގެނެސްދިނުމުގައި އެންމެ މުހިންމު ދަޢުރެއް އަދާކުރަމުންދާ މީޑިޔާ ޗެނަލް އަލްޖަޒީރާ، އިޒްރޭލުގައި ދެއްކުން މަނާކުރުމަށް ވެސް އެޤައުމުގެ ބޮޑުވަޒީރު ބެންޖަމިން ނަަތަންޔާހޫގެ ކެބިނެޓުން ވަނީ ފާސްކޮށްފައެވެ.

މިއަދު އަލްޖަޒިރާގެ އޮޕެރޭޝަންތައް އިސްރާއީލުގައި ހިންގުން ވަގުތީ ގޮތުން ބަންދުކުރަން ފާސްކޮށްފައިވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ކެބިނެޓްގެ ހުރިހާ ވަޒީރުންގެ އިއްތިފާގުންނެވެ.

ނިރުބަވެރި އިސްރާއީލުގެ ކެބިނެޓުން އެކަން ފާސްކޮށްފައިވަނީ ޣައްޒާއާއި ދެކޮޅަށް އިސްރާއީލުން ކުރަމުން އަންނަ ހަނގުރާމައިގައި ޤައުމީ ސަލާމަތަށް ނުރައްކާވާ ކަމަށް ބެލެވޭ ބޭރުގެ ބްރޯޑްކާސްޓަރުން ވަގުތީ ގޮތުން ބަންދު ކުރެވޭ ގޮތަށް އިސްރާއީލުގެ ޤާނޫނު ހަދާ މަޖިލީހުން ޤާނޫނެއް ފާސްކޮށްފައިވަނިކޮށެވެ.

ޣައްޒާގައި އިސްރާއީލުން ހިންގަމުންދާ ޤަތުލުޢާންމު ފޮރުވުމަށް ނިރުބަވެރި އިސްރާއީލުން ދަނީ އެތައް މަސައްކަތްތަކެއް ކުރަމުންނެވެ. އެގޮތުން އިސްރާއީލުން ދަނީ މީޑިއާތަކާއި ނޫސްވެރިންނަށް އަމާޒުކޮށް ހަމަލާ ދެމުންނެވެ. މީގެ ދުވަސްކޮޅެއް ކުރިން ފަލަސްތީނުގައި ހުންނަ މީޑިއާގެ އޮފީހަކަށް ވެސް އިސްރާއީލުން ވަނީ ގެއްލުންދީފައެވެ. މި ހަނގުރާމައިގެ ތެރޭގައި އިސްރާއިލުން ވަނީ100 އަށްވުރެ ގިނަ ނޫސްވެރިން ޝަހީދުކޮށްލާފައެވެ.