ނަރުހުން އެ ކުރަނީ ޤައުމު ފަހުރުވެރިވާފަދަ މަސައްކަތެއް: ރައީސް ޑރ.މުއިއްޒު

ސިއްހީ ހިދުމަތްތެރިންގެ ތެރެއިން ބަލިމީހުންނަށް ފަރުވާދިނުމުގައި ނަރުހުން ކުރަމުންގެންދަނީ ޤައުމު ފަހުރުވެރިވާފަދަ މަސައްކަތްތަކެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ފާހަގަކުރަމުންދާ ބައިނަލްއަޤްވާމީ ނަރުހުންގެ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައެވެ. ނަރުހުންގެ ދުވަހާ ގުޅުވައިގެން ރައީސް ކުރެއްވި ޕޯސްޓުގައި ވިދާޅުވެފައިވަނީ، ފަރުވާ ދިނުމަށް ހަސްފަތާލުތަކުން މަރްޙަބާ ކިޔަނީ، އަދި ބަލި ފަސޭހަވެ އެނބުރި ދިއުމާއި ހަމަޔަށް ޚިދުމަތުގައި ދެމި ތިބެނީ މުރާލި ނަރުހުންކަމަށެވެ. އެގޮތުން ކޮންމެ ދުވަހަކު އެތައް ބަޔަކަށް އޯގާތެރިވުމުގައި، ހިނިތުންވުމާއި އެކު ނަރުހުން ކުރަމުންގެންދަނީ މުޅި ޤައުމު ފަޚުރުވެރިވާ މަސައްކަތެއްކަމަށް ރައީސް ވިދާޅުވިއެވެ.

ރައީސް ޑރ.މުއިއްޒުގެ ޕޯސްޓްގައި ވަނީ ދިވެހި ނަރުހުންނަށް އިތުރު ކުރިއެރުމާއި ކާމިޔާބީ އެދެމުން، މި އުފާވެރި ދުވަހުގެ ހެޔޮ އެދުންތައް ނަރުހުންނަށް އަރިސްކޮށްފައެވެ.

ބައިނަލްއަޤްވާމީގޮތުން ކޮންމެ އަހަރެއްގެވެސް މެއިމަހުގެ 12 ވަނަ ދުވަސް ފާހަގަކުރަމުންދަނީ ނަރުހުންގެ ދުވަހުގެ ގޮތުގައެވެ. ސިއްހީ ދާއިރާގެ ހިދުމަތްތެރިންނަށް ބަލާއިރު ނަރުހުން ފާހަގަކުރެވެނީ އެ ދާއިރާގެ މައިބަދައިގެ ގޮތުގައެވެ. އެއީ ބަލިމީހުންނާއި ޑޮކްޓަރުންގެ މަސައްކަތްތަކަށް އެހީވުމުގައި ނަރުހުން އަދާކުރާ ދައުރުގެ ސަބަބުންނެވެ.

ދުނިޔޭގެ ސިއްހަތު ޖަމިއްޔާއިން ކުރި ދިރާސާއަކުން ދައްކާގޮތުގައި ސިއްހީ ނިޒާމަށް ބޮޑު ލޮޅުމެއް އަންނައިރު އެކަމުގެ އެންމެބޮޑު ތަކްލީފެއް އުފުލާ އެއް ބަޔަކީ ނަރުހުންނެވެ.