މިރުސް ކެއުމަކީ ހަށިގަނޑަށް ސިއްހީ އެތައް ފައިދާއެއް ލިއްބައިދޭ ކަމެއް!

ގިނަ ފަހަރަށް ގިނަ މީހުންނަށް ހީވެފައި އޮންނަ ގޮތުގައި ކުޅިކޮށް ކެއުމުން ހަށިގަނޑަށް އެކަމުގެ ނޭދެވޭ އަސަރު ކުރެއެވެ. އެހެންނަމަވެސް ކުޅިކޮށް ކެއުމަކީ، ނުވަތަ މިރުސް ކެއުމަކީ ހަށިގަނޑަށް ސިއްހީ ގޮތުން އެތައް ފައިދާއެއް ލިއްބައިދޭ ކަމެއްކަން އެންމެ ފަހުގެ ދިރާސާތަކުން މިވަނީ ދައްކާފައެވެ.

މި ލިޔުމުގައި މިހިމަނާލަނީ މިރުސް ކެއުމުން ހަށިގަނޑަށް ލިބޭ ބައެއް ފައިދާތަކެވެ.

މިރުސް ކެއުމަކީ ބަރުދަން ލުއި ކުރުމަށް އެހީތެރިވެދޭ ކަމެކެވެ. އެގޮތުން މިރުސް ކެއުމުން، މެޓަބޮލިޒްމް އަވަަސްކޮށްދެއެވެ. އަދި މިކަމުގެ ސަބަބުން ބަރުދަން ލުއިކުރުމަށް އިތުރު އެހީއެއް ލިބިގެންދެއެވެ. އެހެންކަމުން ބަރުދަން ލުއި ކުރަން ބޭނުންވާނަމަ، މިރުސް ކެއުން ގިނަކޮށްލާށެވެ. އެހެންނަމަވެސް މާ ގިނައިން މިރުސް ކެއުމަކީ ހަށިގަނޑަށް ގެއްލުން ލިބިދާނެ ކަމެއްކަން ހަނދާނުގައި ބެހެއްޓުމަކީވެސް މުހިއްމު ކަމެކެވެ.

އާދަކޮށް މިރުސް ކެއުމަކީ، ހިތުގެ ބަލިތަކުން ރައްކާތެރިކޮށްދޭ ކަމެކެވެ. އެގޮތުން އާއްމުކޮށް މިރުސް ކާނަމަ، ހާޓް އެޓޭކް އަދި ހާޓް ސްޓްރޯކް ޖެހުމުގެ ފުރުސަތު ކުޑަކޮށްދޭ ކަމަށް ސިއްހީ މާހިރުން ވިދާޅުވެއެވެ.

އެމެރިކަން އެސޯސިއޭޝަން ފޮރ ކެންސަރ ރިސާޗްއިން ދާދި ފަހުން ކޮށްފައިވާ ދިރާސާއަކުން ދައްކާގޮތުގައި، މިރުސް ކާ މީހުންނަށް ކެންސަރު ޖެހުމުގެ ފުރުސަތު ކުޑައެވެ. މިރުހުގައި ހުންނަ ބައެއް މާއްދާތަކަކީ ކެންސަރ ސެލްތައް މަރާލާ އެއްޗެއްކަން އެދިރާސާއިން ވަނީ ދައްކާފައެވެ.

ލޭގެ ޕްރެޝަރ މަތިވާ މައްސަލައަކީ ރާއްޖޭގައި އެކި އުމުރުގެ މީހުންނަށް ކުރިމަތިވަމުން އަންނަ ސިއްހީ މައްސަލައެކެވެ. މިރުހަކީ، ލޭގެ ޕްރެޝަރ ދަށްކޮށްދިނުމަށް އެހީތެރިވެދޭ އެއްޗެކެވެ. މިރުހުގައި ގިނަ އަދަދަކަށް ވިޓަމިން އޭ އަދި ވިޓަމިން ސީ އެކުލެވިގެންވެއެވެ.

މިރުހުގެ އެކި ބާވަތްތަކުގެ ތެރެއިން ސިއްހީ ގޮތުން އެންމެ ގިނަ ފައިދާތައް ހަށިގަނޑަށް ލިއްބައިދެނީ ފެހި މިރުހުންނެވެ. އެހެންކަމުން ކެއުން އެންމެ ރަނގަޅީ ފެހި މިރުހެވެ. ފެހި މިރުހުގައި ގިނަ އަދަދަކަށް ވިޓަމިސް ސީ އެކުލެވިގެންވެއެވެ. އޭގެ ސަބަބުން، ލޮލުގެ ފެނުން ރަނގަޅުކޮށްދެއެވެ. އަދި ގައިގެ ހަން ރީތި ކޮށްދިނުމުގެ އިތުރަށް، ހަށިގަނޑުގެ ދިފާއީ ނިޒާމް ވަރުގަދަ ކޮށްދިނުމަށްވެސް ފެހި މިރުސް އެހީތެރި ވެދެއެވެ.

މީގެ އިތުރުން، ފެހި މިރުހުގައި އެކުލެވިގެންވާ އެންޓިބެކްޓީރިއަލް މާއްދާތަކުގެ ސަބަބުން، ހަމަށް ޖެހޭ އިންފެކްޝަންތަކުން މީހާ ސަލާމަތް ކޮށްދެއެވެ. މިނޫނަސް ގިނަ ފައިދާތަކެއް މިރުސް ކެއުމުން ހަށިގަނޑަށް ލިބެއެވެ. އެހެންކަމުން އާއްމުކޮށް މިރުސް ކެއުމަކީ، ކުރެވޭ ވަރަށް ރަނގަޅު ކަމަކަށް ވާނެއެވެ. އަދިވެސް އެއްފަހަރު ހަނދާންކޮށްދެމެވެ. މާގިނައިން ކުޅިކޮށް ކެއުމަކީ އެހާ އެދެވިގެންވާ ކަމެއް ނޫނެވެ.