ޕްރޮސިކިއުޓަރ ޖެނެރަލްގެ އޮފީހުގެ ވިކްޓިމް ސަޕޯޓް ނިއުސްލެޓަރ "ނިޔާވެހި" އިފްތިތާހުކޮށްފި

ޕްރޮސިކިއުޓަރ ޖެނެރަލްގެ އޮފީހުގެ ވިކްޓިމް ސަޕޯޓް ނިއުސްލެޓަރ "ނިޔާވެހި" އިފްތިތާހުކޮށްފިއެވެ.

ޕްރޮސެކިއުޓަރ ޖެނެރަލް ގެ އޮފީހުން މައުލޫމާތު ދެއްވި ގޮތުގައި، "ނިޔާވެހި" ނިއުސްލެޓަރއަކީ އިޖުތިމާއީ ޚިދުމަތުގައި މަސައްކަތްކުރާ ފަންނީ ބޭފުޅުންނަށް އަމާޒުކޮށް ނެރެންފަށާ ނިއުސްލެޓަރއެކެވެ. މިއީ ޕީޖީ އޮފީހުން ނެރެން ފެށި ދެވަނަ ނިއުސްލެޓަރއެވެ.

ޕީޖީ އޮފީހުން ހާމަ ކުރެއްވި ގޮތުގައި މި ނިއުސްލެޓަރ ނެރެންފަށަނީ ޖިނާއީ ޢަދުލުގެ ނިޒާމާއި، ކުޑަކުދިންގެ ޢަދުލުގެ ނިޒާމަށް އަންނަ ބަދަލުތައް، ދާއިރާގެ ފަންނީ ބޭފުޅުންނަށް ދުވަހުން ދުވަހަށް ފެންނާނެ އިންތިޒާމު ހަމަޖެއްސުމުގެ މަގުޞަދުގައެވެ.

"ނިޔާވެހި" ނިއުސްލެޓަރ ނެރުމަށް ހަމަޖެހިފައިވަނީ ކޮންމެ މަހަކު އެއްފަހަރުއެވެ. މި ނިއުސްލެޓަރގައި ލިޔުމުގެ ފުރުޞަތު ވިކްޓިމް ސަޕޯޓް ދާއިރާގެ ފަންނީ ބޭފުޅުންނަށް ވަނީ ހުޅުވާލާފައެވެ.

މި ނިއުސްލެޓަރ ގައި، ވިކްޓިމުން ހިމެނޭ މައްސަލަތަކުގައި ޢަމަލުކުރާ އުޞޫލުތަކަށް އަންނަ ބަދަލުތަކާއި، ކޯޓުތަކުން ނިންމާ ނިންމުންތަކުން ކަނޑައެޅޭ އުޞޫލުތަކާއި، އެ މައްސަލަތަކުގައި ޕީޖީ އޮފީހުން ޢަމަލުކުރާ އުޞޫލުތަކަށް އަންނަ ބަދަލުތައް ނިއުސްލެޓަރގައި ޝާއިޢުކުރާނެ ކަމަށްވެސް ޕީޖީ އޮފީހުން ވިދާޅުވެއެވެ.

މީގެ އިތުރުން ޕީޖީ އޮފީހުން ވިދާޅުވީ، ވިކްޓިމް ސަޕޯޓް ދާއިރާގެ ކަންކަމާބެހޭ މައުލޫމާތު ހިމެނޭ ރަސްމީ ގޮތެއްގައި ޝާޢިއު ކުރެވޭނެ ގޮތެއް ނެތުމަކީ އެ ދާއިރާގައި މަސައްކަތްކުރާ ބޭފުޅުންނަށް އޮތް ހުސްކަމެއް ކަމަށެވެ. އެހެންކަމުން "ނިޔާވެހި" ނިއުސްލެޓަރއަކީ އެކަން ހައްލުކުރުމަށް ޕްރޮސިކިއުޓަރ ޖެނެރަލް އަލްއުސްތާޛް ޙުސައިން ޝަމީމުގެ އިސްނެންގެވުމަކަށް ކުރައްވާ މަސައްކަތެއް ކަމަށް ޕީޖީ އޮފީހުން ވިދާޅުވެއެވެ.

ވިކްޓިމް ސަޕޯޓް ދާއިރާއަކީ، އިޖްތިމާއީ ޚިދުމަތްތެރިންގެ ދާއިރާއާއި، ޖިނާއީ ޢަދުލުގެ ނިޒާމާއި، ކުޑަކުދިންގެ ޢަދުލުގެ ނިޒާމާއި، ޤާނޫނީ ނިޒާމާ ގުޅޭ މަސައްކަތްކުރާ ފަންނީ ބޭފުޅުންވެސް ހިމެނޭ މުހިންމު ދާއިރާއެކެވެ. އެ ބޭފުޅުން، ދާއިރާއިން ދުނިޔޭގެ ފެންވަރުގެ ޚިދުމަތެއްދޭ ބަޔަކަށް ހެދުމުގެ ގޮތުން ދާއިރާއަށް އަންނަ ބަދަލުތަކަށް އަހުލުވެރިވެފައި އޮތުމަކީ ބޭނުންތެރިކަމެއް ކަމަށް ޕީޖީ އޮފީހުން ވަނީ ފާހަގަ ކުރައްވާފައެވެ.