ވަކި މީހަކަށް ވީތީ ވަކި ގޮތަކަށް އެމީހަކާ ދޭތެރޭ ސަރުކާރުން އަމަލެއް ނުކުރާނެ: ވަޒީރު އިހްސާން

ވަކި މީހަކަށް ވީތީ ވަކި ގޮތަކަށް އެމީހަކާ ދޭތެރޭ ސަރުކާރަކުން އަމަލެއް ނުކުރާނެ ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.

މިނިސްޓަރު މި ފަދައިން ވިދާޅުވީ މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި ހިޔާނާތުގެ ކުށް ސާބިތުވެ، 11  އަހަރަށް ޖަލަށް ލާފައި ހުރި، ކުރީގެ ރައީސް އަބްދުالله ޔާމީން އަބްދުލްގައްޔޫމަށް އެއްވެސް ލުޔެއް ދިނުމަށް ސަރުކާރުން މަސައްކަތް ކުރޭތޯ ނޫސްވެރިއަކު ސުވާލު ކުރުމުންނެވެ.

މިގޮތުން މިނިސްޓަރު ވިދާޅުވީ ވަކި ހައިސިއްޔަތެއްގެ ވަކި މީހަކަށް ވާތީ ޖަލަށް ކޮށްފައި އޮންނަ ހުކުމަކަށް މި ސަރުކާރުން އެއްވެސް ލުޔެއް ނުދޭނެ ކަމަށެވެ. އަދި ވަކި މީހަކަށް ވާތީ  ހާއްސަ އުސޫލަކުން އަމަލު ކުރުމުގެ ސިޔާސަތަކީ ގާނޫނާ ގަވާއިދުގެ ތެރެއިން  އޮތް ބާރެއް ނޫން ކަމަށް ވެސް އިހްސާން ވިދާޅުވިއެވެ.

"ވަކި ބޭފުޅަކަށް ވީތީވެ ހާއްސަ އުސޫލަކުން އަމަލު ކުރުމުގެ ސިޔާސަތެއް، އެއީ ގާނޫނާ ގަވާއިދުގެ ތެރެއިން އަޅުގަނޑުމެންނަށް ލިބިދޭ ބާރެއް ނޫން. އަޅުގަނޑުމެން ސަރުކާރުން ނުކުރާނެ ކަމަކީ ވަކި މީހަކަށް ވީތީ ވަކި ގޮތަކަށް އެމީހަކާ ދޭތެރޭ އަމަލެއް ނުކުރާނެ"

މިނިސްޓަރު އިހުސާން ވިދާޅުވިއެވެ.

މީގެ އިތުރުންވެސް މިނިސްޓަރު ވިދާޅުވީ ކުރިންވެސް ރައީސް ޑރ.މުއިއްޒު ވިދާޅުވެފައިވާ ފަދައިން މި ސަރުކާރަކީ ކޯޓުތަކަށް އަތްބޭނުމާއި ނުފޫޒު ފޯރުވާނެ ސަރުކާރެއް ނޫންކަމަށާއި، ގާނޫނުން ލިބިދޭ ރައްކާތެރިކަމާ ހިމާޔަތް ކޮންމެ މީހަކަށް ވެސް ލިބިގެންދާނެ ކަމަށެވެ. އަދި ކޮށްފައި އޮންނަ ޖަލު ހުކުމަކަށް ލުޔެއް ނުދެވޭނެ ކަމަށާއި، ލުއި ދެވޭނީ ހަމައެކަނި  ކްލިމެންސީ ބޯޑާ، ޕެރޯލް ބޯޑާ، ރައީސުލްޖުމްހޫރިއްޔާގެ މައާފުން ކަމަށް ވެސް އިހްސާން ފާހަގަ ކުރެއްވިއެވެ.

ރައީސް ޑރ.މުއިއްޒު ރައީސް ކަމަށް އިންތިހާބު ވެވަޑައިގަތުމަށް ފަހު ރައީސް ޔާމީން ގޭ ބަންދަށް ވަނީ ބަދަލު ކުރައްވާފައެވެ. އެހެންނަމަވެސް ރައީސް ޔާމީންގެ ޝަރީއަތްތައް ނުހިނގުމާއި، އެމަނިކުފާނުގެ ޖަލު ހުކުމެއް ލުޔެއް ނުދޭތީ ސަރުކާރަށް ފާޑުކިޔުންތައް ވަނީ އަމާޒުވެފައެވެ.