އެފްއޭމްގެ މައްޗަށް އަނެއްކާވެސް ހުކުމެއް؛ 3 ދުވަހުގެ ތެރޭގައި ވެމްކޯއަށް 39،000 ރުފިޔާ ދައްކަން ޖެހިއްޖެ

ކޮރަޕްޝަންފަދަ ގިނަ ތުހުމަތުތަކެއް މިހާރުވެސް ކުރެވިފައިވާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އަށް 39،000 އަށް ވުރެ ގިނަ ރުފިޔާ ދައްކަން ސިވިލް ކޯޓުން ހުކުމްކޮށްފިއެވެ.

މިއީ ވިލިމާލެ ފުޓްބޯޅަ ދަނޑުގެ ކުނި ނަގައިދިނުމަށް އެފްއޭއެމުން ވެމްކޯއަށް ހުށަހެޅުމުން، ވެމްކޯއިން ދިން ހިދުމަތްތަކަށް ބިލު ކޮށްފައިވާ އިންވޮއިސްތަކަށް ފައިސާ ދައްކާފައިނުވާތީ ޖުމުލަ 39،108 ރުފިޔާ އެއްފަހަރާ ހޯދުމަށް އެދި ވެމްކޯ ގެ ފަރާތުން ހުށަހެޅި މައްސަލައެކެވެ.

އެފްއޭއެމަށް މި މައްސަލައިގެ ދައުވާގެ ލިޔެކިޔުންތައް ރައްދުކުރި ނަމަވެސް، އެކަމަށް އެ އެސޯސިއޭޝަނުން ރައްދުދީފައިނުވާތީ އެފްއޭއެމްގެ ޣައިރު ހާޒިރުގައި ސިވިލް ކޯޓުން ކުރި ހުކުމްގައި ވަނީ، އެފްއޭއެމުން ވެމްކޯއަށް ދައްކަން ޖެހޭ 39،108 ރުފިޔާ ދައްކަން ޖެހޭ ކަން ސާބިތުވާކަމަށް ކަނޑައަޅައި، 4 ޖުލައި އިން ފެށިގެން ރަސްމީ ތިން ދުވަހުގެ ތެރޭގައި މިފައިސާ ދެއްކުމަށް އަމުރުކޮށްފައެވެ.

މިދިޔަ ހަފްތާގެ ތެރޭގައި ވެސް އެފްއޭއެމުން މީހަކަށް 3 ލައްކަ އަށް ވުރެ ގިނަ ރުފިޔާ ދައްކަން ހުކުމްކޮށްފައިވާއިރު، ހަމަ އެ ހަފްތާގެ ތެރޭގައި، ޗެކް ރިޓާންވި މައްސަލައެއްގައި އެމްއެސް ފައިނޭންސް ކަރަންސީ އެކްސްޗޭންޖް ޕްރައިވެޓް ލިމިޓެޑަށް 30 ދުވަހުގެ ތެރޭގައި، އެފްއޭއެމުން ދައްކަން ޖެހޭ 771،000 ރުފިޔާ އާއި ޝަރީއަތުގެ ހަރަދަށް ހިނގި 5،000 ރުފިޔާ ދެއްކުމަށް ވަނީ އަމުރުކޮށްފައެވެ.

މި ދެ މައްސަލައިގައި ވެސް ސިވިލް ކޯޓުން ހުކުމްކޮށްފައިވަނީ އެފްއޭއެމްގެ ޣައިރު ހާޒިރުގައެވެ.