ރައީސް ޔާމީންއާ ގުޅިގެންވެސް މަސައްކަތް ކުރެވޭނެ؛ އަޅުގަނޑުމެންނަށް އެ މަގު ހޯދޭނެ: ޞާލިޙާއި ނަޝީދު

ގައުމު މިހާރު އޮތް ޙާލަތު ބަދަލު ކުރަން ކުރީގެ ރައީސް އަބްދުالله ޔާމީން އަބްދުލްޤައްޔޫމު އާއި އެކު ވެސް މަސައްކަތް ކުރެއްވޭނެ ކަމަށް ކުރީގެ ރައީސް މުޙައްމަދު ނަޝީދު އާއި ރައީސް އިބްރާހިމް ޞާލިޙް ވިދާޅުވެއްޖެއެވެ.

ރިޔާސީ ޕްރައިމަރީގެ ކެންޕެއިންގެ ތެރެއިން އުފެދުނު ބޮޑު ދެބަސްވުންތަކާއި ގުޅިގެން ދުރުވެވަޑައިގެންނެވި ރައީސް ނަޝީދާއި ޞާލިޙް ދެބޭފުޅުންގެ ދެބަސްވުންތައް ފަހަތަށް ޖައްސަވައި މިއަދު ވަނީ ބައްދަލުކުރައްވާފައެވެ.

އެ ބައްދަލުކުރެއްވުމަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ޞާލިޙް ވަނީ ގައުމުގެ ހާލަތު ބަދަލު ކުރައްވަން، ކުރީގެ ރައީސުންނާއެކުވެސް މަސައްކަތް ކުރައްވަން ތައްޔާރަށް ހުންނެވި ކަމަށެވެ.

އެވާހަކައާއި ގުޅިގެން ނޫސްވެރިއަކު ވަނީ ކުރީގެ ރައީސް ޔާމީނާއެކުވެސް ސިޔާސީ މަސައްކަތް ކުރައްވާނެތޯ ސުވާލު ކޮށްފައެވެ. އެ ސުވާލަށް ޖަވާބުދެއްވަމުން ރައީސް ނަޝީދު ވަނީ އެކަން ކުރެވޭނެ ކަމަށާ، ”ރައީސް މައުމޫނާއެކުވެސް މަސައްކަތް ކުރިން“ ކަމަށް ވިދާޅުވެފައެވެ.

އެއާއެކު ރައީސް ޞާލިޙްވެސް ޔާމީނާއެކު މަސައްކަތް ކުރަން ތައްޔާރަށް ހުންނެވި ކަމަށް ވިދާޅުވެފައެވެ.

”ޔާމީންއާ އެކީގައިވެސް އަޅުގަނޑުމެންނަށް މަސައްކަތް ކުރެވޭނެ. އަޅުގަނޑަށް ފެންނަނީ އަޅުގަނޑުމެންނަށް އެ ހައްލު، އެ މަގު، ހޯދޭނެ ކަމަށް. އެކީގައި މަސައްކަތް ކުރެވޭނެއޭ. މިހާރު ގައުމު މިއޮތް ހާލަތުން ކުރަންޖެހޭ ވަރަށް ގިނަ މަސައްކަތްތަކެއް އެބަހުރި. އެހެންވީމާ އެކަންތައްތައް ކުރުމުގައި ރައީސް ޔާމީންގެ ހިއްސާއެއް މީގެތެރެއަށް އައުމަކީ އަޅުގަނޑުމެން އެދޭ ކަމެއް“ ނަޝީދާއި ޞާލިޙް ވިދާޅުވިއެވެ.

ރައީސް ޞާލިޙް

ނަޝީދުއާއި ޞާލިޙް ޔާމީނާއެކު މަސައްކަތް ކުރައްވަން ތައްޔާރަށް ހުންނެވި ކަމަށް ވިދާޅުވިއިރު، މިދިޔަ އަހަރު ޔާމީން ރާއްޖެ ޓީވީގެ ޕްރޮގްރާމެއްގައި ވާހަކަދައްކަވަމުން އެމަނިކުފާނު ވަނީ، އެމްޑީޕީއާއެކު މަަސައްކަތް ކުރުމަކީ ވާނެ ކަމެއް ނޫން ކަމަށާއި، އެ ޕާޓީއާ އެމަނިކުފާނުގެ ފިކުރު ތަފާތު ކަމަށް ވިދާޅުވެފައެވެ.