ނަޝީދަށް ފިޔަވަޅުއެޅުމަށް ސަލަފުން އިސްލާމިކް މިނިސްޓްރީއަށް

މަޖިލިސް ރައީސް މުހައްމަދު ނަޝީދަށް އަދަބުދިނުމަށް އެދި ސަލަފް ޖަމިއްޔާއިން އިސްލާމިކް މިނިސްޓްރީގައި އެދިލައްވަފިއެވެ.

މިމަހު 10 ވަނަދުވަހު ސަލަފްއިން ފޮނުވާފައިވާ މިސިޓީގައި ބުނެފައިވާގޮތުގައި މަދަނީ ޖަމާޢިއްޔާއެއް ކަމަށްވާ މޯލްޑިވިއަން ޑިމޮކްރެސީ ނެޓްވޯކްގެ ފަރާތުން “ޕްރީލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސް" މި ނަމުގައި ޝާއިޢުކޮށްފައިވާ ރިޕޯޓުގައި އިސްލާމްދީނަށާއި ރަސޫލާއަށް ފުރައްސާރަކޮށް ގަދަރުކުޑަކޮށް، ޤުރުއާނުގައި ﷲ ދެއްވާފައިވާ ޚަބަރުތަކަކީ ފުލޯކުކަމުގައި ދައްކުވަދީފައިވާ މި ރިޕޯޓް، މައްޗަންގޮޅި މެދު ދާއިރާގެ މެންބަރު މުހައްމަދު ނަޝީދު އެކި މުނާސަބަތުތަކުގައި ރަސޫލާއާށް ފުރައްސާރަކުރުމަކީ އާދައިގެ ކަމެއްކަމަށް ގޮތަށް ވާހަކަދައްކައި މުޖުތަމައުގެ ހަމަޖެހުން ގެއްލިގެންދާފަދަ ވާހަކަ ދައްކަމުންދާތީ އެކަން ހުއްޓުވައި ފިޔަވަޅުއެޅުމަށް ގޮވާލައްވާފައިވެއެވެ.

"... ރައްޔިތުން މަޖިލީހުގެ މައްޗަންގޮޅީ މެދު ދާއިރާގެ މެންބަރު، ގ. ކެނެރީގޭ މުހައްމަދު ނަޝީދު، ތަފާތު އެކި މަގާމުތަކުގައި އަނބުރާ ހޭރިޔާ ކޮށްގެން ހީލަތްތެރި، މަކަރުވެރި އަންދާޒެއްގައި އިސްލާމްދީނާ ރަސޫލާއަށް ފުރައްސާރަ ކުރުމަކީ އާދައިގެ ކަމެއްކަމުގައި ދައްކާ، މި ދިވެހި އިސްލާމީ މުޖްތަމައުގެ ހަމަޖެހުން ހުރިހާ ގޮތަކުން ގެއްލިދާ ފަދައިން ވާހަކަ ދައްކަމުންދާތީ އެކަން ހުއްޓުވައި ދެއްވައި، ދިވެހި ރައްޔިތުންގެ ދީނީ އެއްބައިވަންތަކަން ނަގާލަން މަސައްކަތް ކުރުމުގެ ކުށަށް ގާނޫނީ ގޮތުން ދެވެންޖެހޭ ހައްގު އަދަބު ދެއްވުމަށް އެދި ހުށައަޅަމެވެ." ސަލަފްގެ ސިޓީގައި ވެއެވެ.

ރައީސް ނަޝީދުވަނީ މިރިޕޯޓުގައި ދީނަށް ފުރައްސާރަކޮށްފައިނުވާކަމަށް ވިދާޅުވެފައެވެ. އެގޮތުން ހުސައިން ރަޝީދު އަހުމަދު ލިޔުއްވާފައިވާ "ޞަހީހު މުސްލިމްގެ ދިވެހި ތަރުޖަމާ އާއި ޝަރަހަ" އިގެ 10 ވަނަ ބައި ނެެރެން ބޭއްވި ރަސްމިއްޔާތު ޝަރަފްވެރި ކޮށްދެއްވާ ވާހަކަފުޅު ދައްކަވަމުން ރައީސް ނަޝީދު ވިދާޅުވެފައިވަނީ މި ރިޕޯޓުގައި ފާހަގަކުރެވުނު ހަމައެކަނި މައްސަލައަކީ ރަސޫލާއަށް ސަލަވާތްކިޔާފައިނުވުންކަމަށެވެ.

" ކީރިތި ރަސޫލާއަށް އަޅުގަނޑުމެން ބަހައްޓާން ޖެހޭ، ދޭން ޖެހޭ ގަދަރާ އިހްތިރާމް އެ ރިޕޯޓުގައި، ރަސޫލާގެ ނަންފުޅާ ގުޅިގެން އައިސްފާ ނުވާކަން. އެއީ ކީރިތި ރަސޫލާގެ އަބުރުފުޅާ، ޝަހްސިއްޔަތާ، އަދި ގަދަރާއި ކަރާމާތަށް އުނިކަމެއް އަންނަ ކަމެއް ކަމުގައި، ހަމަ ގައިމުވެސް އިއްޒަތްތެރި ގިނަ މެމްބަރުންނަށް ބަލައިގަނެވޭ." ނަޝީދު ވިދާޅުވިއެވެ.

މީގެ އިތުރުން އަހްމަދިއްޔާ ސްކޫލްގެ އިނާމު ދިނުމުގެ ޖަލްސާ ޝަރަފްވެރިކޮށްދެއްވައި ވާހަކަދައްކަވަމުން ނަޝީދު ވިދާޅުވެފައިވާގޮތުގައި އެމްޑީއެންގެ ރިޕޯޓްގައި ޖެހުނު މައްސަލައަކީ އިނގިރޭސި ބަހުން ރިޕޯޓް ލިޔުންކަމުގައި ވިދާޅުވެފައެވެ.

"އެއްވެސް ހާލެއްގައި އެބަސްތައް ބޭނުންކޮށްފައި ވަނީ އެމާނައިގައި ކަމަަކަށް އަޅުގަނޑަކަށެއް، އެ ރިޕޯޓު ކިޔައިގެން ނުފެނުނު. އެއީ އިނގެރޭސި ބަހުން އެއްޗެއް ލިޔާން ވެގެން އުޅެނިކޮށް ވެފައި ހުރި ގޮތެއް." ނަޝީދު ވިދާޅުވިއެވެ.