އޭޑީއެޗްޑީ ހުންނަ ކުދިންނަށް ދޭންޖެހޭ ބޭހެއް އެތެރެނުކުރެވި އެތައް ދުވަހެއް
ލިޔުންތެރިޔާ
އަބްދުﷲ ހުސައިން
މަސްތުވާތަކެތީގެ ޤާނޫނު އޮތްގޮތުން ހާއްސަ އެހީއަށް ބޭނުންވާ ފަރާތްތަކަށް ދޭ ވަރަށް މުހިއްމު ބޭހެއް އެތެރެ ނުކުރެވޭކަމަށް މޯލްޑިވްސް ފުޑް އެންޑް ޑްރަގް އޮތޯރިޓީން ހާމަކޮށްފިއެވެ.
ނުކުޅެދުންތެރިކަން ހުންނަ ކުދިންނަށް ޤާނޫނީ ގޮތުން ލިބިދޭންޖެހޭ އިނާޔަތްތައް ލިބުމުގައި އިހުމާލުވެފައިވާތީ އެކަމާ ގުޅިގެން ހުށަހަޅާފައިވާ ޕެޓިޝަންއާ ގުޅޭގޮތުން، ރައްޔިތުންގެ މަޖިލީހުގެ ޕެޓިޝަން ކޮމިޓީން މިއަދު ވަނީ މިނިސްޓްރީ އޮފް ހެލްތް އަދި މޯލްޑިވްސް ފުޑް އެންޑް ޑްރަގް އޮތޯރިޓީގެ ބޭފުޅުންނާ ބައްދަލުކޮށްފައެވެ.
މި ބައްދަލުވުމުގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން އެމްއެފްޑީއޭގެ ސީނިއާ ފާމަސިސްޓް އައިޝަތު ޖަލީލާ ވަނީ އޭޑިއެޗްޑީ ހުންނަ ކުދިން ބޭނުންކުރާ ވަރަށް މުހިއްމު ބޭހެއް ރާއްޖެ އެތެރެނުކުރެވޭކަން ފާހަގަކުރައްވާފައެވެ. އެ ބޭހަކީ މިތައިލްފެނިޑޭޓް އެވެ. ޖަލީލާ ވިދާޅުވީ އެ ބޭސް އެތެރެނުކުރެވެނީ މަސްތުވާތަކެތީގެ ޤާނޫނުގެ ޖަދުވަލްގެ މާއްދާއެއްގައި ރާއްޖެ އެތެރެކުރުން މަނާ ބާވަތެއްގެ ގޮތުގައި އޮންނާތީއެވެ. ނަމަވެސް އެ މާއްދާއަށް އިސްލާހް ގެނައުމަށް ޤާނޫނުހަދާ މަޖީލަށް މިދިޔަ ޖުލައިމަހު ހުށަހަޅާފައިވާކަން އޭނާ ފާހަގަކުރެއްވިއެވެ.
އެ ބޭސް ނުލިބޭ ކަމަށް ކަމުގެ ޝަކުވާ އެބަ އޮތް ވަރަށް ބޮޑަށް. ޕޭޝަންޓުންގެ ސައިޑުން ވެސް އަދި ޑޮކްޓަރުންގެ ފަރާތުން ވެސް އަޅުގަނޑުމެންނަށް ލިބެމުންދާ ޝަކުވާއެއް. މިތައިލްފެނިޑޭޓް އޭޑިއެސްޓްރީގެ ފަސް ލައިން ޓްރީޓްމަންޓް ގެ ގޮތުގައި ބޭނުންކުރަން ސައިންޓިފިކް ޕްރޫވަން ހަމަ ރަނގަޅު މެޑިސިނެއް
ޖަލީލާ ވިދާޅުވިއެވެ
ޖަލީލާ ވިދާޅުވީ އެ ބޭހަކީ ރާއްޖޭގެ އަސާސީ ބޭސްތަކުގެ ލިސްޓްގައިވެސް ހިމަނާފައިވާ ބޭހެއްކަމަށެވެ. މިތައިލްފެނިޑޭޓް ނުލިބޭކަމުގެ ޝަކުވާ ވަރަށް ގިނަ ޕޭޝަންޓުންގެ ފަރާތުން އަންނަކަން ފާހަގަކުރައްވަމުން އޭނާ ވިދާޅުވީ އެ ބޭހުގެ އިތުރުންވެސް ހާއްސައެހީއަށް ބޭނުންވާ ބައެއް އެހެނިހެން ބޭސްތައްވެސް ނުލިބޭކަން ފާހަގަކުރެވިފައިވާކަަށެވެ.
ހާއްސަ އެހީއަށް ބޭނުންވާ މީހުންނަށް ދޭންޖެހޭ ބައެއްކަހަލަ ބޭސްތައް ރާއްޖެއިން ނުލިބޭ މައްސަލައަކީ އެފަދަ ފަރާތްތަކުގެ ބެލެނިވެރިން ފާހަގަކުރަމުން އަންނަ ޝަކުވާ ބޮޑު މައްސަލައެކެވެ. އެފަދަ ބޭސްތައް ނުލިބުމުގެ ހާއްސަ އެހީއަށް ބޭނުންވާ ބައެއް ފަރާތްތަކަށް ދޭންޖެހެނީ، އެއާ އެއްފަދަ އެހެން ބޭސްތައްކެވެ. އެކަމުގެ ސަބަބުން އެފަދަ ކުދިން ބެލެހެއްޓުމުގައި އާއިލާތަކަށް އިތުރު ތަކްލީފްތަކެއް ކުރިމަތިވެއެވެ. އޭގެ ތެރޭގައި އެފަދަ ފަރާތްތަކުގެ އުޅުމަށް އަންނަ ބަދަލުތައް ފާހަގަކޮށްލެވެއެވެ.
ހާއްސަ އެހީއަށް ބޭނުންވާ ކުދިންނަށް ބޭނުންވާ ބައެއްކަހަލަ ބޭސްތައް ރާއްޖެއިން ނުލިބޭތީވެ، އެފަދަ ބައެއް ބޭސްތައް ގެންނަނީ ރާއްޖެއިން ބޭރުންނެވެ. ހާއްސަ އެހީއަށް ބޭނުންވާ ފަރާތްތަކުގެ ބައެއް ކަހަލަ ބޭސްތައް ރާއްޖެއިން ލިބުން ދަތިވިނަމަވެސް، އެސްޓީއޯއިން އެފަރާތްތަކަށް ބޭނުންވާ ބޭސްތައް ގެނެސްދޭކަން ފާހަގަކޮށްލެވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
