ފިރިހެން ދަރިވަރުންގެ ނަތީޖާ ދަށްވާ ސަބަބުތައް ދެނެގަންނަންޖެހޭ: އެދިއުކޭޝަން މިނިސްޓަރު

އިމްތިޙާނުތަކުން އަންހެން ދަރިވަރުންނަށްވުރެ ފިރިހެން ދަރިވަރުންގެ ނަތީޖާ ދަށްވާން ދިމާވާ ސަބަބުތައް ދެނެގަންނަންޖެހޭ ކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

މަތީ އަރުތަވެރިންގެ އިނާމުގެ ދިނުމުގެ ޖަލްސާގެ 2 ވަނަ ދަންފަޅީގައި ވާހަކަފުޅުދައްކަވަމުން ވަޒީރު ޑރ. އިސްމާޢީލް ޝަފީޢު ވިދާޅުވީ އޯލެވެލް އިމްތިޙާނުގައި ޖުމުލަ 3804 ފިރިހެން ދަރިވަރުން ބައިވެރިވެފައިވާއިރު، އޭގެ ތެރެއިން އިމްތިޙާނުން ފާސްވެފައިވަނީ %44 ފިރިހެން ދަރިވަރުންކަމަށެވެ. އަދި 3868 އަންހެން ދަރިވަރުން އޯލެވެލް އިމްތިޙާނު ހަދާފައިވާއިރު އޭގެ ތެރެއިން އިމްތިޙާނުން ފާސްވެފައިވަނީ %56 އަންހެން ދަރިވަރުން ކަމަށް ވަޒީރު ވިދާޅުވިއެވެ.

އަދިހަމަ އެހެންމެ، އޭލެވެލް އިމްތިޙާނުގައި ބައިވެރިވީ ދަރިވަރުންގެ ތެރެއިން ފާސްވެފައިވަނީ %46 ފިރިހެން ދަރިވަރުންކަމަށާއި އޭލެވެލް އިމްތިޙާނުގައި ބައިވެރިވީ އަންހެން ދަރިވަރުންގެ ތެރެއިން %54 ދަރިވަރުން ފާސްވެފައިވާކަމަށެވެ. އެހެންކަމުން އިމްތިޙާނުތަކުން ފާސްވާ ދަރިވަރުންގެ ތެރެއިން އަންހެން ދަރިވަރުންގެ ނަތީޖާ ރަނގަޅުކަމަށް ފާހަގަކުރެވޭކަމަށް ވަޒީރު ވިދާޅުވިއެވެ.

"މި އަހަރު ތެރޭ އަޅުގަނޑުމެން އެ ފަދަ ރެޕިޑް އެސެސްމަންޓެއް ހަދާނަން. އެ އެސެސްމަންޓުގެ އަލީގައި އިރާދަ ކުރެއްވިއްޔާ އެކަށީގެންވާ ފިޔަވަޅުތައް އަޅައި، ފިރިހެން ކުދިންނާއި އަންހެން ކުދިންގެ ނަތީޖާއަކީ ހަމަހަމަ ނަތީޖާތަކެއްގެ ގޮތުގައި ބައްޓަން ކުރެވޭތޯ އަޅުގަނޑު މަސައްކަތް ކުރާނަން"

އެޑިއުކޭޝަން މިނިސްޓަރ ޑރ. ޝަފީއު ވިދާޅުވިއެވެ.

ރާއްޖޭގެ ތައުލީމީ ނިޒާމުގެ ތެރެއިން އެއްވެސް ބަޔަކު ފެއިލްވެގެން ނުވާނެކަމަށާއި ރަނގަޅު ނަތީޖާއެއް ހޯދުމަށް ގަދައަޅާ މަސައްކަތް ކުރުމަށް ފިރިހެން ދަރިވަރުންނަށް ވަޒީރުވަނީ ނަސޭހަތްތެރިވެފައެވެ. އަދި ހަމައެހެންމެ، ތަޢުލީމް ފޯރުކޮށްދިނުމުގައި ހުރިހާ ދަރިވަރުންނަށްވެސް ހަމަހަމަ ގޮތްތަކެއް ކަނޑައެޅުމަށް ތަޢުލީމީ ދާއިރާގައި ހަރަކާތްތެރިވާ ފަރާތްތަކަށްވެސް ވަޒީރު ވަނީ ނަސޭޙަތްތެރިވެފައެވެ.