5 ބިލިއަނަށްވުރެ ގިނަ ރުފިޔާގެ ދަރަނި ދައްކައި، ބަޖެޓް ސާޕްލަސް ބިލިއަނަކަށްވުރެ މަތީގައި

އަހަރުގެ މިހާތަނަށް ދަރަނިތައް އަދާކުރުމަށް 5 ބިލިއަނަށްވުރެ ގިނަ ރުފިޔާ ދެއްކިނަމަވެސް ދައުލަތުގެ ބަޖެޓް 1.3 ބިލިއަން ރުފިޔާއިން ސަރޕްލަސް ވެފައިވާކަމަށް ފިނޭންސް މިނިސްޓްރީން ބުނެފިއެވެ.

ފިނޭންސުން ބުނީ، ހަރަދުތައް ކުޑަކުރުމަށް ސަރުކާރުން ގެންގުޅެމުން އަންނަ ސިޔާސަތުތައް ތަންފީޒުކުރުމުގެ ނަތިޖާއެއްގެ ގޮތުން ހަރަދުތައް ކުޑަކުރުމާއެކު ދަރަނިތައް ދެއްކުމަށް ކުރެވުނު ހޭދަވެސް ވޭތުވެދިޔަ އަހަރުގެ މި މުއްދަތާ އަޅާބަލާއިރު އިތުރުވެފައިވާކަމަށެވެ.  މާލީވުޒާރާގެ ހިސާބުތަކަށް ބަލާއިރު ދައުލަތުން ނަގާފައިވާ ދަރަންޏަށް ފައިސާ ދައްކާފައިވާ މިންވަރު މިދިޔަ އަހަރުގެ މި މުއްދަތާއި އަޅާބަލާއިރު މިވަނީ 1.8 ބިލިއަން ރުފިޔާއިން އިތުރުވެފައެވެ. އެގޮތުން މިހިނގާ ޖޫންމަހުގެ 12 ވަނަ ދުވަހުގެ ނިޔަލަށް ދަރަނި އަދާކުރުމަށް ވަނީ 5.1 ބިލިއަން ރުފިޔާ ހޭދަކޮށްފައެވެ.

ކުރިއަށްއޮތް އަހަރު ވެގެންދާނީ ރާއްޖޭގެ ތާރީހުގައިވެސް އެންމެ ބޮޑު އަދަދަކުން ދަރަނިތައް ދައްކަންޖެހޭނެ އަހަރަށްކަމަށް މާލީ ވުޒާރާއިން ވަނީ ބުނެފައެވެ. އެގޮތުން ބޭރުގެ އެކި ފަރާތްތަކުން ނަގާފައިވާ ލޯނުތަކުގެ އިންޓަރެސްޓާއެކު 1 ބިލިއަނަށްވުރެ ގިނަ ޑޮލަރު ދައްކަންޖެހޭަނޭކަމަށް މާލީ ވުޒާރާއިން ފާހަގަކުރެއެވެ. އެއީ ދިވެހި ރުފިޔާއިން ބަލާނަމަ 15 ބިލިއަނަށްވުރެ ގިނަ ރުފިޔާއެވެ.

އަންނަ އަހަރު ދައްކަންޖެހޭ 1 ބިލިއަން ޑޮލަރުގެ ތެރޭގައި ހިމެނެނީ 2021 ވަނަ އަހަރު ވިއްކާފައިވާ ސަވަރިން ސުކޫކަށް ދައްކަންޖެހޭ 500 މިލިއަން ޑޮލަރެވެ.