މިނިސްޓްރީ އާ ހަވާލުވިއިރު އެސްޓީއޯއަށް ދައްކަން ޖެހޭ 300 މިލިއަން ރުފިޔާ ހުރި: ޑރ.ޚަލީލް

މިނިސްޓްރީ ހިންގުމާ ހަވާލުވިއިރު ސިއްހީ އެކި ޚިދުމަތްތަކަށް ސްޓޭޓް ޓްރޭޑް ޓްރޭޑިން އޮގަނައިޒޭޝަން (އެސްޓީއޯ) އަށް ދައްކަން ޖެހޭ 300 މިލިއަން ރުފިޔާ އޮތް ކަމަށް ސިއްހަތާބެހޭ ވުޒާރާގެ ވަޒީރު ޑރ. އަބްދުالله ޚަލީލް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު ވަނީ ހޮސްޕިޓަލުތަކާއި ސިއްހީ މަރުކަޒުތަކަށް ބޭނުންވާ ކޮންޒިއުމަބަލްސް ލިބުމުގައިވާ ދަތިތައް ކުރިމަތިވާކަން ފާހަގަކުރައްވައި އެކަން ހައްލުކުރަން ކުރާ މަސައްކަތާ ގުޅޭގޮތުން ސުވާލުކުރައްވާފައެވެ.

އެ ސުވާލަށް ޖަވާބު ދެއްވަމުން ވަޒީރު ޚަލީލް ވިދާޅުވީ ކޮންސިއުމެބަލްސް ހުސްވުމުގެ މައްސަލަ ހައްލުކޮށް، މެދުނުކެނޑި ކޮންސިއުމެބަލްސް ލިބޭނެ މަގުފަހި ކުރުމަށްޓަކައި އެސްޓިއޯއާ ގުޅިގެން މަސައްކަތް ކުރަމުން އަންނަ ކަމަށެވެ.

އެކަން ހައްލު ކުރުމުގެ މަސައްކަތް ކުރަމުންދާއިރު، ހޮސއޕިޓާތަކަށް ކޮންސިޔުމަބަލް ފޯރުކޮށްދިނުމުގެ މަސައްކަތްކުރާ، އެސްޓީއޯއަށް ދައްކަންޖެހޭ ފައިސާ ތަކެއް ހުރިކަންވެސް ވަޒީރު ފާހަގަކުރެއްވިއެވެ.

އަޅުގަނޑުމެން ސަރުކާރާ ހަވާލުވިއިރު އެސްޓީއޯއަށް ދައްކަންޖެހޭ ގާތްގަނޑަކަށް 300 އެއްހާ މިލިއަން ރުފިޔާ އޮތް. އެއީ ކޮންސިއުމަބަލްސް ރީއޭޖެންސްޓްސް. އަދިވެސް އެހެން ސިއްހީ ދާއިރާއާ ގުޅުންހުރި ބައެއް ޚަރަދުތަކުގެ. ނަމަވެސް މިހާރު ބޮޑުބައެއް ދައްކައިފިން.

ސިއްހަތާބެހޭ ވުޒާރާގެ ވަޒީރު ޑރ. އަބްދުالله ޚަލީލް

މިނިސްޓަރު ވިދާޅުވީ އެސްޓީއޯއަށް ދައްކަން ޖެހޭ ފައިސާގެ ބޮޑުބައި ދެއްކުމުންވެސް ކޮންސިއުމެބަލްސް ފޯރުކޮށްދިނުމަށް އެސްޓީއޯއަށް މިހާރު ފަސޭހަ ވެގެންދާނެ ކަމަށެވެ.

މީގެއިތުރުން، މިނިސްޓަރު ވިދާޅުވީ އެ ކޮންސިޔުމަބަލްސް ލިބުމަށް ދަތިވުމުގެ މައްސަލައަށް ދެމެހެއްޓެނިވި ހައްލެއް ގެނައުމަށް ޚާއްސަ ސޮފްޓްވެއާއެއް ޑިވެލޮޕް ކުރުމުގެ މަސައްކަތް ފަށާފައިވާ ކަމަށެވެ. އަދި އެ ސޮފްޓްވެއާ މެދުވެރިކޮށް ހޮސްޕިޓަލުތަކާއި ސިއްހީ ޚިދުމަތް ފޯރުކޮށްދޭ އެހެނިހެން ތަންތަނުން ހުސްވާ ސާމާނުތަކާއި އިތުރަށް ބޭނުންވާ ތަކެތި ދެނެގަނެވޭނެ ކަމަށްވެސް ވިދާޅުވިއެވެ.