އަލީ ޒާހިރު, އެމްސީބީއަށް 2.3 މިލިއަން ރުފިޔާ ދައްކަން ޖެހޭ ކަމަށް ސުޕްރީމް ކޯޓުން ވެސް ހުކުމްކޮށްފި

ރައީސް އޮފީހުގެ ކުރީގެ ޗީފް އޮފް ސްޓާފް އަލީ ޒާހިރު، މޮރިޝަސް ކޮމާޝަލް ބޭންކް (އެމްސީބީ) އަށް 2.3 މިލިއަން ރުފިޔާ ދައްކަންޖެހޭ ކަމަށް ސުޕްރީމް ކޯޓުން ޙުކުމް ކޮށްފިއެވެ.

މި މައްސަލައަކީ 2018 ވަނަ އަހަރު އަލީ ޒާހިރު، އެކައުންޓުގައި ފައިސާ ނެތި 2.3 މިލިއަން ރުފިޔާގެ ޗެކެއް ދޫކުރުމުން، ބޭންކުން މި އަދަދު އޯވަޑްރާފްޓްގެ ގޮތުގައި ދޫކުރުމަށްފަހު، އެކައުންޓަށް ފައިސާ ޖަމާނުކުރުމާ ގުޅިގެން، އެ އަދަދު ދެއްކުމަށް ބޭންކުން އަލީ ޒާހިރަށް އެންގުމުން އަލީ ޒާހިރު ކޯޓަށް ހުށަހެޅި މައްސަލައެކެވެ.

އެމްސީބީގެ އެންގުން ބާޠިލުކުރުމަށް އެދި އަލީ ޒާހިރު ކޯޓަށް މައްސަލަ ހުށަހެޅުމުން، ސިވިލް ކޯޓާއި ހައިކޯޓުން ވެސް ނިންމެވީ މިއީ ބޭންކަށް އަލީ ޒާހިރު ދައްކަންޖެހޭ ފައިސާއެއް ކަމަށެވެ. އަދި އެހެންކަމުން، އަލީ ޒާހިރު މި މައްސަލަ ސުޕްރީމް ކޯޓުގައި އިސްތިއުނާފު ކުރެއްވިއެވެ.

ސުޕްރީމް ކޯޓުގައި މައްސަލަ ބެއްލެވި ތިން ފަނޑިޔާރުންގެ ތެރެއިން ދެ ފަނޑިޔާރުންގެ އަޣުލަބިއްޔަތުން މިއަދު ނެރުއްވި ޙުކުމުގައި ވިދާޅުވެފައިވަނީ، ބޭންކުތަކުގެ ޤާނޫނުގެ ދަށުން، އެކައުންޓުގައި ފައިސާ ނެތަސް ޗެކެއް ދޫކުރުމުން އެކައުންޓް އޯވަޑްރާފްޓްވާ ގޮތަށް ފައިސާ ދޫކުރެވޭ ކަން ޤާނޫނުން އެނގޭކަމަށާއި، އަދި މިގޮތަށް ދޫކުރެވޭ ފައިސާއަކީ އެކައުންޓަށް ޖަމާކުރަން ނުވަތަ ބޭންކަށް ދައްކަންޖެހޭނެ ފައިސާއެއް ކަމަށް ކަނޑައަޅާފައި ވާކަމަށެވެ.