ކުރިއަށް އޮތް ކައުންސިލް އިންތިޚާބުގެ ޕީއެންސީ ކެންޕެއިން މެނޭޖަރަކަށް ފަލާޙް

‏2026 ވަނަ އަހަރުގެ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގައި ވެރިކަންކުރާ ޕީއެންސީގެ ކެމްޕެއިން މެނޭޖަރ އަކަށް އެޕާޓީގެ ޕީޖީ ގްރޫޕްގެ ލީޑަރ އިބްރާހިމް ފަލާޙް ހަމަޖައްސައިފިއެވެ.

މިކަން ޕީއެންސީން ވަނީ ރޭ އިއުލާން ކޮށްފައެވެ.

ޕީއެންސީން މީގެ ކުރިން ބުނެފައިވާގޮތުން، އެ އިންތިޚާބުގައި، އެ ޕާޓީގެ އަމާޒަކީ ވީހާވެސް ގިނަ ގޮނޑި ކާމިޔާބުކޮށް މެޖޯރިޓީ ނެގުމެވެ.

ކުރިއަށްއޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބު ބޭއްވުމަށް މިހާރު ތާވަލުކޮށްފައިވަނީ އަންނަ މާރިޗުމަހުގެ 28 ވަނަ ދުވަހަށްކަމަށް އިލެކްޝަންސް ކޮމިޝަން (އީސީ)އިން ވަނީ ބުނެފައެވެ.

އަދި އިންތިޚާބުގެ ކެންޑިޑެސީއަށް ހުޅުވާލުމަށް ހަމަޖެހިފައިވަނީ އަންނަ ޖެނުއަރީމަހުގެ 17 ވަނަ ދުވަހުކަމަށެވެ.

އީސީން ބުނެފައިވާ ގޮތުން މިފަހަރުގެ އިންތިޚާބުގެ އިދާރީ ކަންކަމަށް 270 ވަރަކަށް މުވައްޒަފުން ބޭނުންވާނެއެވެ. އަދި، އިންތިޚާބުގެ ޓާސްކްފޯހަށް ބޭނުންވާ މުވައްޒަފުން ހޯދުމުގެ ކަންކަން މިހާރުވެސް ކުރިއަށްދާކަމަށްވެސް ބުނެފައިވެއެވެ.

ކައުންސިލް އިންތިޚާބު ބޭއްވުމަށްޓަކާ 70 ނުވަތަ 80 މިލިޔަނެއްހާ ރުފިޔާ ޚަރަދުވާނެކަމަށް އީސީން ލަފާކުރެއެވެ.