ހަރަމައިން ގްރޫޕްއިން ހައްޖަށްދާ މީހުންގެ އަތުން އިތުރަށް ފައިސާ ނަގަނީ
މިއަހަރުގެ ހައްޖުގެ މަތިވެރި އަޅުކަމަށް ހަރަމައިން ހައްޖު އެންޑް އުމްރާާ ގްރޫޕުގެ ފަރާތުން މީހުން ގެންދިއުމަށް ބިލްކުރާ އަދަދަށްވުރެ ގިނައިން ފައިސާ ނަގާ މައްސަލައެއް ފެންމަތިވެއްޖެއެވެ.
މި މައްސަލަ މިހާރު ބަލަމުންދާކަމަށް އިސްލާމިކް މިނިސްޓްރީން ވަނީ ބުނެފައެވެ.
ހަރަމައިން ގްރޫޕުން ބިލްކުރި އަދަދާއި ޚިލާފަށް މީހުން ހައްޖަށް ގެންދިއުމަށް އެއް ލައްކަ ރުފިޔާ ނަގާކަމަށް ބުނާ ވީޑިޔޯއެއް ދަނީ މީސް މީޑިޔާގައި ދައުރުވަމުންނެވެ. އެ ވީޑިޔޯގައި އަންހެނުންތަކެއް ވަނީ ހަރަމައިންގެ އޮފީހަށް ގޮސް ބިލްކުރި އަދަދަށްވުރެ ގިނައިން ފައިސާ ނަގައިގެން މީހުންނަށް ހައްޖަަށް ދާން ޖާގަ ހަމަޖެހުނުކަމަށް ބުނެފައެވެ.
އެގޮތުން އެމީހުންނަށްވުރެ މާފަހުން ނަންނޯޓުކުރި މީހުން އެއްލައްކަ ރުފިޔާ ދިނުމުން ޖާގަ ހަމަޖެހުނުކަމަށް ވަނީ ބުނެފައެެވެ. މި ވީޑިޔޯގައި ފެންނަ ގޮތުގައި އެ އަންހެނުން މުޚާތަބުކުރަމުންދަނީ މިހާރު ހަރަަމައިންގައި މަސައްކަތް ކުރަމުންދާ މުވައްޒަފެއްކަމުގައިވާ ކުރީގެ ނޫސްވެރިޔާ މުހައްމަދު އަފްޒަލްއަށެވެ.
އެ އަންހެންވެރިން ބުނިގޮތުގައި އެމީހުން އެހެންތަނަކަށް ނުގޮސްތިބީ ހަަރަމައިންއިން އެފަރާތްތަކަށް އުންމީދުތަކެއް ދެމުން ދިއުމުންނެވެ. މިކަމާއި ގުޅިގެން ހަރަމައިން ޖަމާއަތުން އެއްޗެއް ބުނެފައެއް ނުވެއެވެ.
ހައްޖަށް މީހުން ގެންދާ ގްރޫޕްތަކުން ބިލްކުރާ އަދަދަކީ އިސްލާމިކް މިނިސްޓްރީއަށް ހުށައަޅާ ބިޑްގައިވާ އަދަދެވެ. ނަމަވެސް މި އަދަދަށްވުރެ ގިނައިން ބައެއް ޖަމާއަތްތަކުން ނަގާކަމަށް އަބަދުވެސް ތުހުމަތުކުރެއެވެ. ހަރްމައިން ހައްޖު އެންޑް އުމްރާ މޯލްޑިވްސް ޕްރައިވެޓް ލިމިޓެޑުން މީހުން ހައްޖަށް ގެންދިޔުމުގެ ކަންކަން ކުރާނީ 69965 ރުފިޔާ އަށް ކަމަށް ވަނީ ކަނޑައަޅާފަ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
