ހައި އެޗީވާސް ސްކޮލަރޝިޕާއި ލޯނު ދިނުމުގައި އިންޖިނޭރިންގ ދާއިރާއަށް އިސްކަންދޭނަން: ރައީސް މުޢިއްޒު

އިންޖިނޭރުންގެ ދުވަހާ ގުޅިގެން އެ ދާއިރާއިން މަތީ ތަޢުލީމު ހާސިލުކުރަމުންދާ ދަރިވަރުންނާ މިއަދު މުލީއާގޭގައި ބައްދަލުކުރައްވައި ހައި އެޗީވާސް ސްކޮލަރޝިޕާއި ލޯނު ދިނުމުގައި އިންޖިނޭރިންގ ދާއިރާއަށް އިސްކަން ދެއްވާނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލޮޖީގެ ދަރިވަރުންނާ އެކު ބޭއްވެވި މި ބައްދަލުވުމުގައި ދަރިވަރުން ވަނީ ތަޢުލީމީ ދާއިރާގައާއި ވަޒީފާގެ މައިދާނުގައި ކުރިމަތިވެފައިވާ ހުރަސްތައް ރައީސުލްޖުމްހޫރިއްޔާއާ ހިއްސާކޮށްފައެވެ.

ލެބޯޓަރީއާއި ޒަމާނީ އާލާތްތައް ނެތުމުން ޢަމަލީ ތަޖުރިބާ ލިބުމުގެ މަގު ހަނިވެފައިވާ ކަމާއި އާކިޓެކްޗަރ ދަރިވަރުންނަށް ޚާއްޞަ ސްޓޫޑިއޯ ނެތް މައްސަލައާއި ރާއްޖޭގައި އެ ދާއިރާއިން މާސްޓަރސް ފެންވަރަށް ކިޔެވޭނެ ގޮތެއް ނެތުމުގެ ކަންބޮޑުވުން ދަރިވަރުން ފާޅުކޮށްފައިވެއެވެ. ހަމައެހެންމެ ޤަވާއިދާ ޚިލާފަށް ބިދޭސީންނަށް ވަޒީފާ ލިބެމުންދާތީ ސަނަދު ހާސިލުކޮށްފައިވާ ދިވެހި އިންޖިނޭރުންނަށް ވަޒީފާގެ ފުރުސަތު ގެއްލެމުންދާ މައްސަލަ ވެސް ދަރިވަރުން ފާހަގަކޮށްފައިވެއެވެ.

ރައީސުލްޖުމްހޫރިއްޔާ ވިދާޅުވީ ރާއްޖޭގެ އުމްރާނީ އަދި އިޤްތިޞާދީ ކުރިއެރުމަށް ދިވެހި އިންޖިނޭރުންގެ ދައުރު ވަރަށް މުހިންމު ކަމަށާއި އެ ދާއިރާއަކީ ހަމައެކަނި ދިވެހިން ޙަރަކާތްތެރިވާ ދާއިރާއަކަށް ހައްދަވަން ބޭނުންފުޅުވާ ކަމަށެވެ. ޒުވާން ދިވެހިން ތަޢުލީމު ހާސިލުކޮށްގެން ނުކުންނައިރު ވަޒީފާ ނުލިބެންވީ ސަބަބެއް ނެތް ކަމަށާއި ބިދޭސީންގެ ބަދަލުގައި ދިވެހި އިންޖިނޭރުންނަށް ވަޒީފާ ލިބޭނެ މަގު ތަނަވަސްކޮށްދެއްވާނެ ކަމަށް ވެސް އެމަނިކުފާނު ވިދާޅުވިއެވެ.

މީގެ އިތުރުން ޔުނިވަރސިޓީ ތެރެއިން ރަނގަޅު ތަޢުލީމީ ފުރުސަތުތަކާއި ވަސީލަތްތައް ފޯރުކޮށްދެއްވައި ދާއިރާގެ ޤަވާއިދުތައް ހަރުދަނާކޮށް ތަންފީޒުކުރައްވާނެ ކަމުގެ ޔަޤީންކަން ދެއްވިއެވެ.

ސިޔާސަތެއްގެ ގޮތުގައި އިންޖިނޭރުންގެ ދުވަހެއް ކަނޑައެޅުއްވީ ވެސް މި ދާއިރާއަށް ގިނަ ދިވެހިން ޝައުޤުވެރިކުރުވައި ނެރުމުގެ ބޭނުމުގައި ކަމަށް ރައީސުލްޖުމްހޫރިއްޔާ ފާހަގަކުރެއްވިއެވެ. ކޮންމެ އަހަރެއްގެ އޮގަސްޓް 30 ވަނަ ދުވަސް "ދިވެހިރާއްޖޭގެ އިންޖިނޭރުންގެ ދުވަސް" ގެ ގޮތުގައި ފާހަގަކުރެއްވުމަށް ރައީސުލްޖުމްހޫރިއްޔާ ނިންމެވީ 2025 ވަނަ އަހަރުއެވެ. ރާއްޖޭގެ ތާރީޚުގައި ހިންގި އެންމެ ބިޔަ އުމްރާނީ މަޝްރޫޢު ކަމުގައިވާ ސިނަމާލެ ބުރިޖު އިފްތިތާޙުކުރެވުނީ އޮގަސްޓް 30 ވަނަ ދުވަހު ކަމަށް ވާތީ އެ ދުވަސް އެކަމަށް އެންމެ އެކަށީގެންވާ ދުވަހެއް ކަމަށް ރައީސުލްޖުމްހޫރިއްޔާ ކަނޑައެޅުއްވީއެވެ.