7 ދާއިރާއަކުން ތަމްރީނުވުމަށް އެޗްޑީސީ އިން އެޕްރެންޓިސްޝިޕް ފުރުސަތުތަކެއް ހުޅުވާލައިފި

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން 7 ދާއިރާއަކުން ތަމްރީނުވުމަށް އެޕްރެންޓިސްޝިޕް ފުރުސަތުތަކެއް ހުޅުވާލައިފިއެވެ.

އެޗްޑީސީ އިން ބުނީ ތަފާތު ދާއިރާތަކުން ހުނަރުވެރި ދިވެހިން ތަމްރީންކުރުމަށް ސަރުކާރުން ކުރިއަށް ގެންދާ ހުނަރު ޕްރޮގްރާމްގެ ދަށުން އެ ކޯޕަރޭޝަނުން ކުރިއަށް ގެންދާ "ނެޝަނަލް އެޕްރެންޓިސްޝިޕް ޕްރޮގްރާމް" ގައި ބައިވެރިވުމުގެ ފުރުސަތު ހުޅުވާލައިފައިވާ ކަމަށެވެ.

ތަފާތު 7 ދާއިރާއަކުން މަސައްކަތްތެރިން ތަމްރީނުކުރުމުގެ މަގްސަދުގައި 6 މަސް ދުވަހުގެ މުއްދަތަށް ކުރިއަށްގެންދާ މި ޕްރޮގްރާމްގެ އަމަލީ ތަޖުރިބާ ކުރިއަށް ގެންދާނީ މި ކޯޕަރޭޝަންގެ ފަންނީ މުވައްޒަފުންގެ ބެލުމުގެ ދަށުންކަމަށާއި، މި ޕްރޮގްރާމް ފުރިހަމަކުރާ ބައިވެރިންނަށް މޯލްޑިވްސް ކޮލިފިކޭޝަން އޮތޯރިޓީން އެކްރެޑިޓް ކުރާ ނެޝަނަލް ލެވެލް 3 ގެ ސެޓްފިކެޓެއް ލިބޭނެކަމަށް އެޗްޑީސީން މައުލޫމާތު ދެއެވެ.

މީގެ އިތުރުން 6 މަސްދުވަހުގެ ޕްރޮގްރާމަށް ފަހު، ފުރުސަތު އޮތް މިންވަރަކުން، ޕްރޮގްރާމްގެ ބައިވެރިންނަށް ވަޒީފާގެ ފުރުސަތު ހޯދައިދިނުމަށް މަސައްކަތް ކުރާނެ ކަމަށް އެ ކޯޕަރޭޝަނުން ބުނެއެވެ.

އެޗްޑީސީ އިން މި ޕްރޮގްރާމްގައި ތަމްރީނުކުރާ 7 ދާއިރާ އާއި އެދާއިރާތަކުން ކޯސް ފުރިހަމަ ކުރުމުން ލިބޭނެ ސެޓްފިކެޓްތައްވެސް އެޗްޑީސީއިން ވަނީ ހާމަކޮށްފައެވެ. ތިރީގައި އެވަނީ އެދާއިރާތަކާއި، އެދާއިރާތަކުން ހާޞިލް ކުރެވޭނެ ސެޓްފިކެޓް ތަކެވެ.

1. ނޭޝަނަލް ސެޓްފިކެޓް 3 ކޮމްޕިއުޓަރ ހާރޑްވެއަރ އެންޑް ނެޓްވޯކިންގ

2. ނޭޝަނަލް ސެޓްފިކެޓް 3 ހެލްތް އެންޑް ސޭފްޓީ އިން ކޮންސްޓްރަކްޝަން

3. ގައުމީ ސެޓްފިކެޓް 3 ފްރޮންޓް އޮފީހުގައި

4. ޤައުމީ ސެޓްފިކެޓް 3 އިން ގާޑަނިންގ

5. ނޭޝަނަލް ސެޓްފިކެޓް 3 އިން ކޮންސްޓްރަކްޝަން ސައިޓް ސުޕަވައިޒަން

6. ނޭޝަނަލް ސެޓްފިކެޓް 3 އިން މެސަންރީ

7. ޤައުމީ ސެޓްފިކެޓް 3 އިލެކްޓްރިކަލް އިންސްޓޯލްކުރުން

މިކޯސްތަކަށް އެޕްލައިކުރުމުގެ ސުންގަޑިއަކީ 20 ޖޫން 2024، 15:30 އެވެ.

އެޗްޑީސީން 18 އަހަރާއި 35 އަހަރާ ދެމެދުގެ މީހުންނަށް ހުޅުވާލައިގެން ކުރިއަށް ގެންދާ މި ޕްރޮގްރާމްގައި ބައިވެރިވެވޭނީ ގްރޭޑް 10 ނިންމާފައިވާ ނުވަތަ ލެވެލް 2 ގެ ސެޓްފިކެޓް ހާސިލްކޮށްފައިވާ ފަރާތްތަކަށް ކަމަށާއި، ޕްރޮގްރާމްގެ މުއްދަތުގައި، ޕްރޮގްރާމްގެ ބައިވެރިންނަށް މަހަކު 6،000 ރުފިޔާގެ އެލަވަންސެއް ލިބޭނެކަމަށް ވެސް އެ ކޯޕަރޭޝަނުން ބުނެއެވެ.

އެޗްޑީސީން ބުނީ މިއީ ރާއްޖޭގައި ބިދޭސީ މުވައްޒަފުން މަސައްކަތް ކުރާ ނިސްބަތް މަދުކުރުމަށާއި، ތަފާތު ދާއިރާތަކުން ހުނަރުވެރި ދިވެހިން ތަމްރީންކުރުމުގެ ބޭނުމުގައި މިނިސްޓްރީ އޮފް ޔޫތް އެންޕަވަރމެންޓް އިންފޮމޭޝަން އެންޑް އާޓްސް އާއި، މޯލްޑިވްސް ނެޝަނަލް ސްކިލް ޑިވެލޮޕްމެންޓް އޮތޯރިޓީ އާއި، ހަޔަރ އެޑިއުކޭޝަން ގުޅިގެން ކުރިއަށް ގެންދާ ޕްރޮގްރާމެއް ކަމަށެވެ.