މިދިޔަ އަހަރު އެކަނިވެސް މަސްދޯނިތަކަށް 56 ރެސްކިއު ޑައިވަރުން ތަމްރީނު ކުރެވުނު: ޝިޔާމް

އަދުގެ ސަރުކާރުގެ ސިޔާސަތުތަކުގެ ތެރޭ ހިމެނިގެން މިދިޔަ އަހަރު އެކަނިވެސް މަސްދޯނިތަކަށް 56 ރެސްކިއު ޑައިވަރުން ތަމްރީނުކުރެވުނުކަމަށް މަސްވެރިކަމާއި މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

މަސްވެރިންނަށް ހާއްސަކޮށް ތ.ގުރައިދޫގައި ހުޅުވިގެންދިޔަ ސެނެހިޔާގެ ހައިޕަރބެރިކް ސެންޓަރާ ގުޅޭގޮތުން އެކްސްގައި ކުރެއްވި ޕޯސްޓެއްގައި ޝިޔާމް ވިދާޅުވީ މިއީ ދިވެހިރާއްޖޭގެ ތާރީޚުގައިވެސް ސަރުކާރުން މަސްވެރިންނަށް ޚާއްސަކޮށްގެން ހުޅުވި މިފަދަ ފުރަތަމަ ސެންޓަރުކަމަށެވެ. ވަޒީރު ވިދާޅުވީ ކުރިއަށް އޮތް ދުވަސްތަކުގެ ތެރޭގައި މިފަދަ އިތުރު ސެންޓަރުތައް ހުޅުވުމަކީ ރައީސުލްޖުމްހޫރިއްޔާ ވަރަށް ބޮޑު އިސްކަމެއް ދެއްވައިގެން ކުރައްވާ މަސައްކަތްޕުޅެއް ކަމަށެވެ.

ޝިޔާމް ވިދާޅުވީ ރާއްޖޭގައި މަސްވެރިކަން ކުރާ ކޮންމެ އޮޑިއެއްގައި އެންމެ މަދުވެގެން އެއް ރެސްކިއު ޑައިވަރު ބެހެއްޓުމަށް ރައީސް ކަނޑައެޅުއްވި ޕްރޮގްރާމްގެ ތެރެއިން މިދިޔަ އަހަރު އެކަނިވެސްވަނީ 56 ޑައިވަރުން ތަމްރީނުކޮށްފައިވާކަމަށެވެ. އިތުރު ޑައިވަރުން ތަމްރީނުކުރުމުގެ މަސައްކަތް މިއަހަރުގެ ތެރޭގައިވެސް ކުރިއަށްދާނެކަމަށާއި، މީގެ ކުރިން އެއްވެސް ސަރުކާރަކުން މަސްވެރިންގެ ސަލާމަތާއި ރައްކާތެރިކަމަށް ނުކުރާ މުހިއްމު އެތައް މަސައްކަތްތަކެއް މިސަރުކާރުން ކުރަމުންދާކަމަށެވެ.

ސަރުކާރުގެ ފުރަތަމަ ދުވަހުން ފެށިގެން، މަސްވެރިންގެ ސަލާމަތާއި ރައްކާތެރިކަމަށްޓަކައި އެމަނިކުފާނު ގެންދަވަނީ ވަރަށް ބޮޑު އަހައްމިއްޔަތުކަމެއް ދެއްވައި، އެކަމަށް ޚާއްސަ ސިޔާސަތުތައް އެކުލަވާލައްވައި ތަންފީޒުކުރައްވަމުން

ވަޒީރު ވިދާޅުވިއެވެ

ތ.އަތޮޅު ގުރައިދޫގައި އިއްޔެ ގާއިމްކުރި ޑީކޯ ސެންޓަރަކީ 100 މީޓަރު އަޑިން ޑައިވްކުރަނިކޮށް ޑީކޯވި ނަމަވެސް ފަރުވާދިނުމުގެ ގާބިލްކަން ލިބިގެންވާ ސެންޓަރެކެވެ.

ޑީކޮމްޕްރެޝަން ޗެމްބަރުތައް ގާއިމްކުރުމަކީ ރާއްޖެފަދަ ޤައުމަކަށް ވަރަށް މުހިންމުކަމެއްކަމަށް ސަރުކާރުން ވަނީ މީގެ ކުރިންވެސް ފާހަގަކޮށްފައެވެ. އެގޮތުން މިއީ ރައީސް ޑރ.މުހައްމަދު މުއިއްޒުގެ ރިޔާސީ ވައުދުފުޅުގެ ތެރޭގައިވެސް ހިމެނޭ ވައުދެކެވެ. ރައީސްގެ ވައުދުފުޅާ އެއްގޮތަށް ރާއްޖޭގެ އެކި ސަރަހައްދުތަކުގައި ޑީކޮމްޕްރެޝަން ޗެމްބަރުތައް ބެހެއްޓުމަށް ކުރަމުންގެންދާ މަސައްކަތްތައް ކުރިއަށްއޮތް 6 މަސްދުވަހުގެ ތެރޭގައި ނިންމާލެވޭނޭކަމަށް ސަރުކާރުން ބުނެއެވެ.