އެމްޓީސީސީގެ އަހަރީ އާއްމުޖަލްސާ ފަސްކޮށްފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ މިދިޔަ އަހަރުގެ އަހަރީ އާއްމުޖަލްސާ ފަސްކޮށްފިއެވެ.

މިކަމާ ގުޅޭގޮތުން ހިއްސާދާރުންގެ މައުލޫމާތައްޓަކައި އެމްޓީސީސީން އާއްމުކުރި ބަޔާނެއްގައި ބުނެފައިވަނީ، 2024 ވަނަ އަހަރުގެ އޮޑިޓުކޮށްފައިވާ މާލީ ހިސާބުތަކާއި އަހަރީ ރިޕޯޓް ނިންމުމުގައި ލަސްތަކެއް ދިމާވެފައިވާކަމަށެވެ.

ކެޕިޓަލް މާކެޓް ޑިވެލޮޕްމަންޓް އޮތޯރިޓީގެ ސެކިއުރިޓީޒް ދޫކުރާ ފަރާތްތަކުގެ މަޢުލޫމާތު ހާމަކުރުމުގެ ޒިންމާއާބެހޭ ގަވާއިދުގެ 19 ވަނަ މާއްދާގެ (ހ) އަދި މޯލްޑިވްސް ސްޓޮކް އެކްސްޗޭންޖުގެ ލިސްޓިންގ ރޫލްސްގެ 77 ވަނަ މާއްދާގެ (a) ގައި ބަޔާންކުރާގޮތުން، އަހަރީ ޢާންމު ޖަލްސާ މާލީ އަހަރުނިމޭތާ ފަސް މަހުގެ ތެރޭގައި ކުންފުނީގެ އަހަރީ އާއްމު ޖަލްސާ ބާއްވަން ޖެހެއެވެ. އެމްޓީސީސީން ބުނީ ކުންފުނީގެ މިދިޔަ އަހަރުގެ އަހަރީ ޢާންމު ޖަލްސާ ބާއްވާނެ ތާރީޚު، ވީ އެންމެ އަވަސް ފުރުޞަތެއްގައި އިޢުލާން ކުރާނޭކަމަށެވެ.

އެމްޓީސީސީ އަކީ ދިވެހި ރައްޔިތުންނަށް އެންމެ ފުރަތަމަ ހިއްސާވިއްކަންފެށި ދިވެހި ކުންފުންޏެވެ. އެމްޓީސީސީއަށް 2024 ވަނަ އަހަރު އާމްދަނީގެ ގޮތުގައި ވަނީ 2.1 ބިލިއަން ރުފިޔާ ލިބިފައެވެ. ސާފްފައިދާގެ ގޮތުގައި އެކުންފުންޏަށް ވަނީ 84.2 މިލިއަން ރުފިޔާ ލިބިފައެވެ.

އެމްޓީސީސީގެ މިއަހަރުގެ ފުރަތަމަ ކުއާޓަރުގެ މާލީ ބަޔާނަށް ބަލާއިރު، މި ކުއާޓަރުގައި އާމްދަނީގެ ގޮތުގައި އެކުންފުންޏަށް ވަނީ، 418 މިލިއަނަށްވުރެ ގިނަ ރުފިޔާ ލިބިފައެވެ. ޖުމްލަ ފައިދާގެ ގޮތުގައި ލިބިފައިވަނީ، 43.3 މިލިއަން ރުފިޔާއެވެ.