ޝިމާ ހޯދުމަށް ދެ ފަޅުރަށެއް ބަލައިފި

ލ. ކައްދޫއިން އެ އަތޮޅު މާމެންދޫއަށް ދަތުރުކުރަމުން ދަނިކޮށް ޑިންގީ ބަންޑުން ޖަހާލުމުގެ ސަބަބުން ވީނުވީއެއް ނޭގި ގެއްލިފައިވާ އައިމިނަތު ޝިމާ ނާފިޒު ހޯދަން ދެ ފަޅުރަށެއް މިއަދު ބަލައިފިއެވެ.

ޝިމާ ހޯދުމަށް ކުރުމަންދާ މަސައްކަތްތަކާއި ގުޅިގެން މާމެންދޫ ކައުންސިލުން ބުނެފައިވަނީ ޝިމާ އަދި އޭނާ ދަތުރުކުރަމުންދިޔަ ޑިންގީ ހޯދުމަށް ކުރަމުން އަންނަ މަސައްކަތްތަކަށް އެއްވެސް ކުރިއެރުމެއް ލިބިފައިނުވާކަމަށެވެ.

އަދި އޭނާ ހޯދުމަށްޓަކައި މާމެންދޫ ކައިރީގައި އޮންނަ ފަޅުރަށެއްކަމަށްވާ ހުޅިމެންދޫގެ އިތުރުން ގާދޫވެސް ބަލާފައިވާކަމަށާއި އަދި އެދެރަށް ބަލާފައިވަނީ ސިފައިންނާއި މާމެންދޫ ރައްޔިތުންގެ އެކުގައި ކަމަށްވެސް އެރަށު ކައުންސިލުން ބުނެފައިވެއެވެ.

ކައްދޫ އިން ފުރައިގެން މާމެންދޫއަށް ދާން ދަތުރުކުރި ޑިންގީގައި އޭނާއާއެކު ދެން ދަތުރުކޮށްފައިވަނީ ޑިންގީ ދުއްވަން އިން ސައުވީސް އަހަރުގެ ފިރިހެނެކެވެ. އޭނާވަނީ އެހާދިސާއިން ސަލާމަތްވެފައެވެ. އޭނާ ބުނާގޮތުން ޑިންގީ ބަންޑުން ޖަހާލީ ޑިންގީއިން ތެޔޮހުސްވެ ތޮޔޮއަޅަން މަޑުކޮށްގެން ތިއްބާ ޖެހި ރާޅަކާއެކުގައެވެ. އަދި އެއާއެކު ޝިމާގެ އަތަށް ހަމަކާއި ފޯނެއް ދިނުމަށްފަހު އޭނާ ދިޔައީ އެހީއެއް ހޯދުމަށް ކަމަށެވެ. އެގޮތުން އޭނާއަށް ފަތާފައި ގޮސް އަރާފައިވަނީ ސިކްސް ސެންސް ލާމް ރިސޯޓަށެވެ. އަދި އޭނާގެ ފަރާތުން ޝިމާގެ މައުލޫމާތު ލިބުމާއި އެކު އޭނާ ހޯދުމުގެ މަސައްކަތް މާމެންދޫ ރައްޔިތުން ފަށާފައިވާކަމަށް ކައުންސިލުން ބުނެފައިވެއެވެ. އަދި އޭގެ އިތުރުން ސިފައިންވެސް އަންނަނީ މިހާރުވެސް ޝީމާ ހޯދުމުގެ މަސައްކަތް ކުރަމުންނެވެ. އެގޮތުން މިހާހިސާބަށް ބެލިބެލުމުން ޑިންގީގެ ބައެއްވެސް އަދި ޝިމާގެ އެއްވެސް ކަހަލަ ނިޝާނެއް ފެނިފައި ނުވާކަމަށް މާމެންދޫ ކައުންސިލުން ބުނެފައިވެއެވެ.

މާމެންދޫ ކައުންސިލުން ބުނެފައިވަނީ ޝިމާ ދަތުރުކުރި ޑިންގީއަކީ އެފަދަ ދަތުރުތައް ކުރުމަށް އެކަށީގެންވާ އެއްޗެއް ނޫންކަމަށާއި، މީގެ ކުރިންވެސް އެޑިންގީގައި ކުރި ބައެއް ދަތުރުތަކުގެ ހިތާމަވެރި ހާދިސާތަކެއް ހިނގާފައިވާކަމަށެވެ.

މިހާ ހިސާބަށް ޝިމާ ހޯދުމަށް ކުރި މަސައްކަތް ނާކާމިޔާބް ވެފައިވި ނަމަވެސް އޭނާ ހޯދުމުގެ މަސައްކަތް އެމްއެންޑީއެފުންނާއި އަދި މާމެންދޫގެ ރައްޔިތުންވެސް އަންނީ ކުރަމުންނެވެ.