މެލޭޝިއާގައި ދިވެހި އައިޑީކާޑާއި ޕާސްޕޯޓް ހަދައިދިނުމުގެ ހިދުމަތް ފަށައިފި
ލިޔުންތެރިޔާ
އަބްދުﷲ ހުސައިން
މެލޭޝިއާގައި ދިވެހި އައިޑީކާޑާއި ޕާސްޕޯޓް ހައްދައިދިނުމުގެ ހިދުމަތް މިއަދު އިފްތިތާހްކޮށްފިއެވެ.
މެލޭޝިއާގައި އެ ހިދުމަތް މިއަދު އިފްތިތާހްކޮށްފައިވަނީ، ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިހާރު މެލޭޝިއާއަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިންނެވެ. މިކަމަށްޓަކައި މިއަދު ކުއަލަލަމްޕޫރުގައި ބޭއްވި ރަސްމިއްޔާތެއްގައި މި ހިދުމަތް އިފްތިތާހްކޮށްދެއްވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
މެލޭޝިއާގައި މި ހިދުމަތް މިއަދު ފެށުމުގެ ގޮތުން ހެދި ޕާސްޕޯޓްތައް ވަނީ ދެ ފަރާތަކާ ހަވާލުކޮށްފައެވެ. އެފަރާތްތަކާ އައިޑީ އަދި ޕާސްޕޯޓް ހަވާލުކޮށްދެއްވީ ދާހިލީ ވަޒީރު އަލީ އިހްސާނެވެ. މެލެޝިއާއަކީ އެކި ބޭނުންތަކުގައި ދިވެހިން ވަރަށްގިނައިން ދިރިއުޅެމުން އަންނަ ޤައުމެކެވެ. މެލޭޝިއާ ހިމެނެނީ ރާއްޖެ ފިޔަވައި ދިވެހި އައިޑީކާޑާއި ޕާސްޕޯޓް ހައްދައިދޭން ފެށި ފުރަތަމަ ޤައުމަށެވެ. މި ހިދުމަތް މާދަމައިން ފެށިގެން ދިވެހިންނަށް ދެމުންދާނޭކަމަށް ސަރުކާރުން ވަނީ ބުނެފައެވެ.
ދިވެހިން އާންމުކޮށް ދަތުރުކުރާ ބޭރު ޤައުމުތަކުގައި ދިވެހި އައިޑީ ކާޑު ހެއްދުމުގެ ޚިދުމަތް ފޯރުކޮށްދިނުމަށް ތައްޔާރުވަމުންދާ ހޯމް މިނިސްޓްރީން މީގެ ކުރިން ވަނީ ބުނެފައެވެ. މެލޭޝިއާގެ އިތުރުން ދެން އެ ހިދުމަތްތައް ދިނުމަށް ތައްޔާރުވަމުންދަނީ ސްރީ ލަންކާ، އިންޑިއާ އަދި އިނގިރޭސިވިލާތުގައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
