ޒަކީ އަވަހާރަވުމާއި ގުޅިގެން އެއާއިލާއަށް ރައީސް މުޢިއްޒު ތައުޒިޔާ ވިދާޅުވެއްޖެ

ދިވެހި ދައުލަތަށް 47 އަހަރަށްވުރެ ގިނަ ދުވަހު ޚިދުމަތް ކުރެއްވި މުޙައްމަދު ޒަކީ އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.

ޒަކީގެ އާއިލާއަށް ތައުޒިޔާ ފޮނުއްވައި، ރައީސް ޑރ.މުޢިއްޒު އެކްސް ގައި ކުރެއްވި ޕޯސްޓެއްގައި އެމަނިކުފާނު ވަނީ، ޒަކީއަށް ކީރިތި الله ހެޔޮ ރަޙްމަތްލައްވައި، ސުވަރުގޭގެ ދާއިމީ ނިޢުމަތް މިންވަރުކުރެއްވުމަށް އެދި ދުއާ ކުރައްވާފައެވެ.

ޒަކީގެ މައްޗަށް ކަށު ނަމާދު ކުރުން އޮތީ މިއަދު މެންދުރު ނަމާދަށް ފަހު ހުޅުމާލޭ ސަހަރާ މިސްކިތުގައެވެ.

ރޭގެ ވަގުތެއްގައި އައިޖީއެމްއެޗްގައި، ނިޔާވި އުމުރުފުޅުން 68 ގެ  ޒަކީ އަކީ ދިވެހި ދައުލަތަށް 47 އަހަށްވުރެ ގިނަ ދުވަހު ހިދުމަތް ކުރައްވައި، އެކަމުގެ އަގު ދައުލަތުން ވަޒަން ކުރައްވާ 2023 ވަނަ އަހަރު ދިވެހި ދައުލަތަށް ހިދުމަތްކުރުމުގެ އިނާމު ދެއްވަވާފައިވާ ހިދުމަތްތެރިއެކެވެ.

65 އަހަރުވުމާއި ގުޅިގެން 2020 ވަނަ އަހަރު ރިޓަޔަރ ކުރެއްވި ޒަކީ ދިވެހި ދައުލަތަށް ހިދުމަތް ކުރައްވަން ފެއްޓެވީ 1973 ވަނަ އަހަރުއެވެ.

މިނިސްޓްރީ އޮފް އެޑިޔުކޭޝަންގެ ޕިޔޯނުކަމާއި އެޑިޔުކޭޝަނަލް ޕްރޮޖެކްޓް އޮފީހުގެ ޕިޔޯނުކަން ކުރެއްވި އެވެ. އަދި އެ އޮފީހުގެ ޕްރިންޓަރުކަމާއި، އެޑިޔުކޭޝަނަލް ޑިވެލޮޕްމަންޓް ސެންޓަރުގެ ޕްރިންޓަރު ކަމާއި، ދިވެހިރާއްޖޭގެ ތަޢުލީމު ކުރިއަރުވާ މަރުކަޒުގެ ސީނިއާ ޕްރިންޓަރުކަންވެސް ކުރެއްވި ޒަކީ ރިޓަޔަރ ކުރެއްވި އިރު ހުންނެވީ ޑިޕާޓްމެންޓް އޮފް ޕަބްލިކް އެގްޒަމިނޭޝަންސްގެ ސީނިއާ ޕްރިންޓިން ސުޕަވައިޒަރެއްގެ މަގާމުގައެވެ.