އެމްޑީޕީގެ މުޒާހަރާގެ މައިގަނޑު މަގްސަދަކީ ރާއްޖޭގެ ހާލަތު ބަދަލުކުރުން: ޝިފާޒް

އެމްޑީޕީން މިމަހުގެ 13 ވަނަ ދުވަހު ބޭއްވުމަށް ހަމަޖެހިފައިވާ މުޒާހަރާގެ މައިގަނޑު އެއް ބޭނުމަކީ ރާއްޖެއަށް މިހާރު ކުރިމަތިވެފައިވާ ގޯސް ހާލަތު ބަދަލުކުރަންކަމަށް އެޕާޓީގެ ކުރީގެ ނައިބު ރައީސް މުޙައްމަދު ޝިފާޒު ވިދާޅުވެއްޖެއެވެ.

އެމްޑީޕީގެ މުޒާހަރާ އާ ބެހޭގޮތުން ނޫސްވެރިންނަށް މައުލޫމާތު ހިއްސާކުރަމުން ޝިފާޒް ވިދާޅުވީ، މި މުޒާހަރާ ކުރުމުގެ އެއް ބޭނުމަކީ މިހާރު ކުރިމަތިވެފައިވާ ހާލަތު ބަދަލުކުރުމަށް ސަރުކާރަށް ޕްރެޝަރ ކުރުންކަމަށެވެ.

ޝިފާޒް ވިދާޅުވީ މުޒާހަރާގައި ސަރުކާރުގެ ކަންކަން ހުރިގޮތް ރައްޔިތުންނާ ހިއްސާކުރާނޭކަމަށެވެ. މިގޮތުން ތަކެތީގެ އަގުތައް ބޮޑުވުމާއި ރައްޔިތުންގެ ދިރިއުޅުމުގެ ހަރަދުބަރަދު ބޮޑުވެފައިވާތީ އެންމެ އިސްކަމެއްދީގެން މުޒާހަރާގައި އެކަމާ ދެކޮޅަށް އިހުތިޖާޖްތައް ކުރިއަށްދާނޭކަން ޝިފާޒް ފާހަގަކުރެއްވިއެވެ. އޭނާ ވިދާޅުވީ ބައެއް ސިޔާސީ ޕާޓީތަކުން މިކަމުގައި އެމްޑީޕީގެ ދައުރު ފުލާކުރަންޖެހޭކަން ފާހަގަކުރަމުންދާ ކަމަށާއި، އެއްވެސް ޕާޓީއަކުން މިކަމުގައި މުޒާހަރާކޮށް ނުހެދިނަމަވެސް އެމްޑީޕީން އެކަން ކުރާނޭކަމަށެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީގެ މަޖިލިސް މެމްބަރު އަބްދުالله ވަހީދު ވިދާޅުވީ މިއަދު ފެނިގެން މިދަނީ ޑިމިކްރެޓިކް ހަމަތަކުން ނެއްޓި ވެރިކަން ކުރަމުންދާ މަންޒަރު ކަމަށާއި، ސަރުކާރުން ރައްޔިތުންނަށް ދައްކަމުންދާ މަންޒަރަކީ ޤާނޫނު އަސާސީއަށް ބަދަލު ގެނެސްގެން ޤާނޫނީ އިމުގެ ތެރެއިން މަސައްކަތް ކުރަމުންދާކަން ކަމަށެވެ. ރާއްޖޭގެ ހާލަތު ދުވަހުން ދުވަހަށް ގޯސްވެގެން ދާއިރު، މި ސަރުކާރުގައި ހަރުދަނާ އެއްވެސް ޕޮލިސީއެއް ނެތްކަން ވައްޑޭ ފާހަގަކުރެއްވިއެވެ. އެގޮތުން ހާރިޖީ ސިޔާސަތުތައްވެސް ކުރިއަށްގެންދަނީ ރައްޔިތުންނަށް މުޅިން އޮޅުވާލައިގެންކަން އޭނާގެ ވާހަކައިގައި ވިދާޅުވިއެވެ.

އެމްޑީޕީން ކުރިއަށްގެންދާ މި މުޒާހަރާ ފެށުމަށް ހަމަޖެހިފައިވަނީ އޮގަސްޓް 13 ވަނަ ދުވަހުގެ ރޭ 20:30 ގައި މަޖީދީމަދު ސޯޝަލް ސެންތަރު ކައިރިން ކަމަށް އެޕާޓީން ވަނީ ބުނެފައެވެ.