އުއްތަމަ ފަނޑިޔާރާއެކު ސުޕްރީމް ކޯޓުގެ ތިން ފަނޑިޔާރެއްގެ މައްސަލަ ބަލަން ނިންމައިފި

އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ އާއެކު ސުޕްރީމް ކޯޓުގެ ތިން ފަނޑިޔާރެއްގެ މައްސަލަ ބަލަން ޖުޑިޝަލް ސާވިސް ކޮމިޝަން (ޖޭއެސްސީ) އިން މިއަދު ނިންމައިފިއެވެ.

ޖޭއެސްސީން މިއަދު ބުނީ އުއްތަމަ ފަނޑިޔާރުގެ އިތުރުން ދެން ބަލަނީ ސުޕްރީމް ކޯޓުގެ ފަނޑިޔާރު އަބްދުﷲ އަރީފާއި ފަނޑިޔާރު އާދަމް މުހައްމަދު އަބްދުﷲ އާ ގުޅޭ ދެ ޝަކުވާއެއް ބަލަން ކޮމިޝަނުގެ މިއަދުގެ ބައްދަލުވުމުގައި ނިންމާފައިވާކަމަށެވެ.

އަދި ތިން ފަނޑިޔާރުންގެ މައްސަލަތައް ބެލުމަށް ހަތް މެންބަރުންގެ ކޮމެޓީއެއް މިހާރު އެކުލަވައިލާފައިވާ ކަމަށް ވެސް ޖޭއެސްސީން ބުންޏެވެ.

ސުޕްރީމް ކޯޓުގައި ތިއްބަވަނީ ޖުމްލަ ފަސް ފަނޑިޔާރުންނެވެ. އޭގެ ތެރެއިން އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީއާއި ފަނޑިޔާރު އަބްދުﷲ އަރީފާއި ފަނޑިޔާރު އާދަމް މުހައްމަދު އަބްދުﷲ ގެ މައްސަލަ ބަލަމުންދާއިރު، އެކޯޓުގެ ފަނޑިޔާރު އަބްދުﷲ ދީދީގެ މައްސަލަވެސް ޖޭއެސްސީން އެކުލަވައިލި ތަހުގީގު ކޮމެޓީން ބެލުމަށްފަހު މިހާރު ވަނީ ފަނޑިޔާރު ދީދީ މަގާމުން ވަކިކުރުމަށް ރައްޔިތުންގެ މަޖަިލީހަށް ފޮނުވާފައެވެ.

އެހެންކަމުން ދެން ސުޕްރީމް ކޯޓުގައި ހުންނަވާނީ ހަމައެކަނި ފަނޑިޔާރު އަބްދުލްޣަނީ މުހައްމަދެވެ.

ފަނޑިޔާރުންނާ ބެހޭ ގޮތުން ހުށަހަޅާފައިވާ ޝަކުވާތަކަކީ ކޮބައިކަމެއް ޖޭއެސްސީ އަކުން ހާމައެއް ނުކުރެ އެވެ. ނަމަވެސް މި ފަނޑިޔާރުންނަކީ، މިދިޔަ އަހަރުގެ ފެބްރުއަރީ އެކެއްގައި، އޭރު ޖަލުގައި ހައްޔަރުކޮށްފައި ތިބި ސިޔާސީ ބޭފުޅުންނާއި އިތުރު އެތައް ބަޔަކު މިނިވަންކުރުމަށް ސުޕްރީމް ކޯޓުން ނެރުނު އަމުރު ފަހުން ބާތިލްކުރެއްވި ބޭފުޅުންނެވެ.

އެއަމުރު ނެރުނުނު އިރު އުއްތަމަ ފަނޑިޔާރަކަށް ހުންނެވީ އަބްދުﷲ ސައީދެވެ. ހުކުމް ބާތިލުކުރުމަށްފަހު އަބްދުﷲ ސައީދާއި ފަނޑިޔާރު އަލީ ހަމީދުގެ މައްޗަށް ދައުވާ ކޮށް ކުށް ސާބިތުވުމުން އެބޭފުޅުން މަގާމު ވަނީ ގެއްލިފައެވެ.