ހުޅުމާލެ ފޭސް ދޭއްގައި މިރޭވެސް އެކްސިޑެންޓެއް

ހުޅުމާލެ ފޭސް ދޭއް ނިރޮޅުމަގުގައި ނުރައްކާތެރި އެކްސިޑެންޓެއް ހިނގައިފިއެވެ.

ދައުރުވަމުންދާ ވީޑިއޯތަކުން ފެންނަ ގޮތުގައި މި އެކްސިޑެންޓް ހިނގާފައިވަނީ ފޭސް ދޭއްގެ އެންމެ ކާރޫބާރު ބޮޑު އެއްމަގު ނިރޮޅުމަގުގައެވެ. އެކްސިޑެންޓްގައި ދެ ސައިކަލް ބިންމަތީ ވެއްޓިފައި އޮތްއިރު ކައިރީގައި އެމްބިއުލާންސެއްވެސް އޮތްކަމަށް ވީޑިއޯއިން ފެނެއެވެ.

މި އެކްސިޑެންޓްގައި ސައިކަލްގައި ތިބި މީހުންނަށް ލިބުނު ގެއްލުމެއް އަދި ސާފެއް ނުވެއެވެ. މިކަމާ ގުޅޭގޮތުން ފުލުހުންވެސް އަދި ވަކި އެއްޗެކޭ ނުބުނެއެވެ.

ފޭސް ދޭއްގެ ނިރޮޅުމަގަކީ އާއްމުކޮށް އެކްސިޑެންޓްތައް ގިނަ މަގެކެވެ. އެކްސިޑެންޓްތައް ގިނަވެ، އެމަގުގެ އެކި ސަރަހައްދުގައި މީގެ ކުރިން ބަމްޕަރުތައް ހަރުކުރިނަމަވެސް ބައެއް މީހުން ޝަކުވާކުރުމާ ގުޅިގެން ފަހުން ވަނީ އެ ބަމްޕަރުތައް ނަގާފައެވެ.

ހުޅުމާލެ ފޭސް ދޭއްގައި މިރޭ އެކްސިޑެންޓެއް ހިނގިއިރު މިއަދު ހަވީރު ދަރުބާރުގެއާ ދިމާލު ބޭރު މަގުގައިވެސް ވަނީ އެކްސިޑެންޓެއް ހިނގައި ބަޔަކަށް އަނިޔާވެފައެވެ.