އަމާޒު ހިފާފައިވަނީ އަންނަ އަހަރުގެ ފިނި މޫސުމަށް ހދ.ނާގޯށި ނިންމަން: ނިޔާޒް

އެމްޓީޑީސީގެ އަމާޒަކީ އަންނަ އަހަރުގެ ފިނި މޫސުމަށް ހދ.ނާގޯށީގެ މަސައްކަތް ނިންމައި އޮޕަރޭޝަނަށް ގެނައުމަށްކަމަށް އެކުންފުނީގެ މެނޭޖިންގ ޑިރެކްޓަރު އަހުމަދު ނިޔާޒް ވިދާޅުވެއްޖެއެވެ.

އެމްޓީޑީސީން މިރޭ ހޮޓެލް ޖެންގައި ކުރިއަށްދިޔަ 2024 އަހަރުގެ އަހަރީ އާއްމު ޖަލްސާގައި އެކުންފުނީގެ ކުރިމަގާ ބެހޭގޮތުން ވާހަކަދައްކަވަމުން ނިޔާޒް ވިދާޅުވީ، އުއްމީދަނީ އަންނަ އަހަރުގެ ފަހުކޮޅު ނާގޯށީގެ އޮޕަރޭޝަންތައް ފެށުންކަމަށެވެ. ނާގޯށި ތަރައްޤީ ކުރުމުގެ ޕްލޭނާ ގުޅޭގޮތުން ނިޔާޒް ވިދާޅުވީ، ހުއްޓިފައިވާ ނާގޯށީގެ މަސައްކަތް ކުރިއަށްއޮތް ޖޫން ނުވަތަ ޖުލައިމަހުގެ ތެރޭގައި ފެށުމަށް ތައްޔާރުވަމުންދާކަމަށެވެ.

ނިޔާޒް ވިދާޅުވީ މިހާރު ކުރިއަށްދަނީ ނާގޯށި ތަރައްޤީކުރުމަށް ބޭނުންވާ ފައިނޭންސް ހޯދުމުގެ މަސައްކަތްކަމަށެވެ. މި މަސައްކަތަށް ސަރުކާރުގެ އެއްބާރުލުން ލިބެމުންދާކަން އޭނާ ވަނީ ފާހަގަކުރައްވާފައެވެ. ނާގޯށި ތަރައްޤީކުރުމަށް ފައިނޭންސް ހަމަޖެހުނުހާ އަވަހަކަށް ކޮންޓްރަކްޓަރާ މަސައްކަތް ހަވާލުކުރެވިގެންދާނޭކަމަށް ނިޔާޒް ވިދާޅުވިއެވެ.

ނާގޯށީގެ 33 އިންސައްތަ މަސައްކަތް ނިމިފައިވާއިރު، އެމްޓީޑީސީން ކުރިއަށްއޮތް ތަނުގައި ނާގޯށި ތަރައްޤީކުރުމަށް ނިންމާފައިވަނީ ދެ ފިޔަވައްސަކަށް ބަހާލައިގެންނެވެ. އެގޮތުން ނާގޯށި ފުރަތަމަ ހުޅުވިގެންދާއިރު 183 ކޮޓަރި ހުންނައިރު އޭގެ ތެރޭގައި ހިމެނެނީ 100 ވޯޓަރ ވިލާ އާއި 83 ބީޗް ވިލާއެވެ.

ނިޔާޒް ވިދާޅުވީ ނާގޯށީގެ ފުރަތަމަ ފިޔަވަހި ތަރައްޤީކުރުމަށް 37 މިލިއަން ޑޮލަރު ހަރަދުވާނޭކަމަށެވެ. މިހާރު ކޮށްފައިހުރި ކޮންސްޓްރަކްޝަން މަސައްކަތްތަކަށް ވަނީ 15 މިލިއަން ޑޮލަރު ހޭދަކޮށްފައެވެ.

އެމްޓީޑީސީން ނާގޯށި ތަރައްޤީ ކުރަމުން އަންނަތާ 15 އަހަރު ވެފައިވާއިރު، ނާގޯއްޓަކީ ސަރުކާރުން އެމްޓީޑީސީއަށް އެންމެ ފުރަތަމަ ރިސޯޓް ތަރައްޤީކުރުމަށް ދިން ރަށްތަކުގެ ތެރޭގައި ހިމެނޭ ރަށެކެވެ. އެމްޓީޑީސީން ނާގޯށި ތަރައްޤީކުރުމުގެ މަސައްކަތް މީގެކުރިން ރަޝިއާ އަދި ދުބާއީގެ ކުންފުންޏަކާވެސް ހަވާލުކޮށްގެން ކުރިއަށްގެންދިޔައެވެ. ނަމަވެސް ފައިސާ ލިބުމުގައި ހުރި ގޮންޖެހުންތަކުގެ ސަބަބުން އެރަށުގެ މަސައްކަތް ކުރިއަށްގޮސްފައެއް ނުވެއެވެ.

އެމްޓީޑިސީއަކީ ފަތުރުވެރިކަމުގެ މަންފާ ދިވެހި ރައްޔިތުންނަށް ސީދާ ގޮތެއްގައި ހޯދައިދިނުމަށް ރައީސް މައުމޫންގެ ވެރިކަމުގައި 2006 ވަނަ އަހަރު ވުޖޫދަށް ގެނައި ކުންފުންޏެކެވެ.