ކިއުބާގެ އާއްމު ހާލަތު ދަނީ ގޯސްވަމުން، ދިވެހި ދަރިވަރުންގެ ހާލު އަދި ރަނގަޅު

ކިއުބާގެ އާއްމު ހާލަތާމެދު އދ އިން ކަންބޮޑުވުން ފާޅުކޮށްފިއެވެ.

ކިއުބާއަށް ތެއޮ ފޯރުކޮށްދޭ ފަރާތްތަކަށް ފިޔަވަޅު އެޅުމަށް އެމެރިކާއިން ނިންމުމާ ގުޅިގެން އެޤައުމުގެ އާއްމު ހާލަތު ވަނީ ކަންބޮޑުވާފަދަ ދަރަޖައަކަށް ގޮސްފައެވެ. އެގޮތުން ތެލުގެ ސްޓޮކް ދަށްވެ، ކިއުބާއަށް ހަކަތައިގެ ކާރިސާއެއް ކުރިމަތިވެދާނެކަމުގެ އިންޒާރު އދ އިން ވަނީ ދީފައެވެ.

މިކަމާ ގުޅިގެން ދ. ގެ ތަރުޖަމާނު ސްޓެފަން ޑުޖާރިކް ބޭއްވެވި ނޫސްވެރިންގެ ބައްދަލުވުމުގައި ވިދާޅުވެފައިވަނީ، ކިއުބާގެ ހާލަތު ވަރަށް ގާތުން ބަލަމުންދާ ކަމަށާއި، ކާބޯތަކެއްޗާއި، ސާފް ބޯފެނާއި އަދި އެނޫންވެސް ރައްޔިތުންނަށް ބޭނުންވާ ސާމާނު ފޯރުކޮށްދިނުމަށް ސަރުކާރާ ގުޅިގެން ކުރިއަށްދާކަމަށެވެ. ސްޓެފަން ވިދާޅުވީ، ކިއުބާއަށް ތެލުގެ ދަތިކަން ވަރަށްބޮޑަށް ކުރިމަތިވެފައިވާކަމަށާއި، އާއްމު ރައްޔިތުންނަށް އެކަމުގެ ނޭދެވޭ އަސަރުތައް ކުރަމުންދާކަމަށެވެ.

ތެއޮ ނުލިބުމުގެ ސަބަބުން ބާޒާރުގައި ތަކެތީގެ އަގުތައް ވަރަށްބޮޑަށް މައްޗަށްދާކަން ފާހަގަކުރަމުން އޭނާ ވިދާޅުވީ، އެމެރިކާއިން އެޅި ފިޔަވަޅު އަނބުރާ ނުގެންގޮސްފިނަމަ، ކިއުބާއަށް ހައިޕާ އިންފްލޭޝަނެއް އައުމުގެ ފުރުސަތު ބޮޑުކަމަށެވެ.

ކިއުބާގެ އާއްމު ހާލަތު މިފަހުން އެހާބޮޑަށް ގޯސްވެފައިމިވަނީ އެޤައުމަށް ކުރިމަތިވި ތޫފާން މެލީސާގެ ސަބަބުންނެވެ. އެ ތޫފާނުގެ ސަބަބުން ކިއުބާގެ މަގުތަކާއި، ގެތަކަށް ބޮދެތި ގެއްލުންތަކެއް ލިބުނުއިރު، ބައެއް ސަރަހައްދުތަކުން ސާފް ބޯފެނާއި އެނޫންވެސް ވަސީލަތްތަ ލިބުން ވަނީ ހުއްޓުމަކަށް އަތުވެފައެވެ.

ކިއުބާގެ އާއްމު ހާލަތު ގޯސްވަމުން އަންނައިރު، އެޤައުމުގެ ހަވާނާ ޔުނިވަރސިޓީގައި ދިވެހި ދަރިވަރުންވެސް ކިޔަވަމުންދެެވެ. ވޮއިސްއަށް މައުލޫމާތު ހިއްސާކުރި ދިވެހި ދަރިވަރަކު ބުނީ، ކިއުބާގައި ތަކެތީގެ އަގުތައް މިވަގުތު ހުރީ އެޤައުމުގެ އާއްމުރައްޔިތުންނަށް އަތްފޯރާވަރަށްވުރެ ބޮޑު އަގުތަކެއްގައިކަަށެވެ. ޔުނިވަރސިޓީގައި ތިބި ދިވެހި ދަރިވަރުންގެ ހާލަތު ރަނގަޅުއިރު، އަދި އެއްވެސްކަހަލަ މައްސަލައެއް ކުރިމަތިނުވާކަމަށް ވަނީ ބުނެފައެވެ.

ކިއުބާގައި އަބަދުވެސް ދިވެހި ދަރިވަރުން ކިޔަވަންގޮސް ތިބޭއިރު، މީގެ ތެރޭގައި ބޭސްވެރިކަމުގެ ރޮނގުންނާއި، އުމްރާނީ ތަރައްޤީގެ ރޮނގުން ދަރިވަރުން ތައުލީމް ހާސިލްކުރަމުންދާކަން ފާހަގަކޮށްލެވެއެވެ. ކިއުބާއަށް އެންމެ ފުރަތަމަ ދިވެހި ދަރިވަރުން ކިޔަވަންދާން ފަށާފައިވަނީ ކުރީގެ ރައީސް މައުމޫނުގެ ވެރިކަމުގެ ތެރޭގައެވެ.