އިމަޖެންސީ ހެލިކޮޕްޓަރުގެ ހިދުމަތް ފެށުމާއި ގުޅޭ ކަންކަމަށް ގާނޫނީ ލަފާދޭނެ ބަޔަކު ހޯދަނީ

އަލުން  ރާއްޖޭގައި އިމަޖެންސީ ހެލިކޮޕްޓަރުގެ ހިދުމަތް ފެށުމާއި ގުޅޭ ކަންކަމަށް ގާނޫނީ ލަފާދޭނެ ބަޔަކު ހޯދުމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން އިއުލާން ކޮށްފިއެވެ.

މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ގެޒެޓް ކުރި އިއުލާނެއްގައި ވަނީ މިކަމަށް ޝައުޤުވެރިވާ ފަރާތްތަކުން 13 މާރޗު 2024 ގެ ކުރިން ޕްރޮޕޯސަލް ހުށަހެޅުމުގެ ފުރުސަތު ހުޅުވާލެވިފައިވާ ކަމަށް ބުނެފައެވެ. މި އިއުލާނާއިއެކު މަސައްކަތަށް ބޭނުންވާ "ޓާމްސް އޮފް ރިފަރެންސް" ވެސް ވަނީ ހިމަނާފައެވެ.

ވަޒީރުންގެ މަޖިލީހުގެ ލަފާއާއެކު ރާއްޖޭގައި ސަލާމަތާއި ރައްކާތެރިކަމާއެކު، އަލުން ހެލިކޮޕްޓަރު އުދުއްސުމުގެ ޚިދުމަތް ތައާރަފުކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމަވާފައިވާކަން އިއުލާނުކުރީ މިއަހަރުގެ ޖެނުއަރީ މަހުއެވެ.

ސަރުކާރުން އިމަޖެންސީ ހެލިކޮޕްޓަރުގެ ހިދުމަތް ފެށުމަށް ނިންމާފައިވާއިރު، އިއްޔެ ވަނީ އެއާ އެމްބިއުލެންސް ގެ ހިދުމަތް ވެސް ރާއްޖޭގައި ފަށާފައެވެ.