ޕީއެންއެފް އުފެއްދުމަށް ބޭނުންވާ އަދަދަށް އީސީއަށް ފޯމު ހުށަހަޅައިފި!

ކުރީގެ ރައިސް އަބްދުالله ޔާމީން އިސްވެ ހުންނަވައި އުފެއްދެވަން މަސައްކަތް ކުރައްވާ ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް ޓަކައި މެންބަރުންގެ ފޯމު އިލެކްޝަން ކޮމިޝަނަށް މިއަދު ހުށަހަޅައިފި އެވެ.

މިކަމާއި ގުޅިގެން، ޕީއެންއެފް އުފެއްދުމުގައި އިސްކޮށް އުޅުއްވާ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހް ޖަމާލް ވިދާޅުވީ އީސީއަށް ފޯމުތައް ހުށަހެޅުމާއެކު އަވަހަށް ޕާޓީ އުފައްދާ ޖަލްސާ ބޭއްވުމުގެ ހުއްދަ ލިބިގެންދާނެ ކަމަށް އުންމީދު ކުރައްވާ ކަމަށެވެ.

މީގެ އިތުރުން މަލީހު ވިދާޅުވީ، އަލަށް ސިޔާސީ ޕާޓީގެ މެމްބަރަކަށް ވުމަށް އެދޭ ފޯމް ދެން ނުފުރާނެ ކަމަށެވެ.

އަލަށް އުފެއްދުމަށް އެދި ހުށަހަޅާ ސިޔާސީ ޕާޓީގެ މެމްބަރަކަށް ވުމަށް އެދޭ ފޯމް ދެން ޕީއެންއެފްގެ ފަރާތުން ނުފުރާނެ. މިހާތަނަށް ފުރާފައިވާ ފޯމު އެއްމެ ލަސްވެގެން 29 ފެބުރުއަރީ ވާބުރާސްފަތި ދުވަހު 2ގެ ކުރީން ޕާޓީ އޮފީހަށް ހުށަހެޅުއްވުން އެދެން.

މަލީހު

މިކަމާއި ގުޅިގެން އިލެކްޝަން ކޮމިޝަނުގެ ނައިބު ރައީސް އިސްމާއީލް ހަބީބު ވިދާޅުވީ ޕީއެންއެފްގެ ނަމުގައި، ސިޔާސީ ޕާޓީއެއް އުފެއްދުމަށް ޒެއިން އަބްދުالله ޔާމީން ގެ ފަރާތްޕުޅުން، ސިޔާސީ ޕާޓީގެ ގާނޫނުގައި ބަޔާން ކުުރާ މުއްދަތުގައި، އެ އަދަދަށް (3060) ފޯމު އިލެކްޝަންސް ކޮމިޝަނަށް ހުށަހަޅާފައިވާ ކަމަށެވެ.

އަދި އެ ފޯމުތަކުގެ ސައްހަކަން ކަށަވަރު ކުރުމުގެ މަސައްކަތް މިހާރު ފަށާފައިވާ ކަމަށާއި މަދުވެގެން 3000 މެންބަރުންގެ ފޯމުގެ ސައްހަކަން ކަށަވަރުވުމުން، ޕީއެންއެފް އުފެއްދުމަށްޓަކައި ޖަލްސާ ބޭއްވުމުގެ ހުއްދަ ޒެއިން އަށް ދޭނެ ކަމަށެވެ.