އަދީބު ބޯޓަށް އެރީ ދަތުރުގެ މެދު ތެރެއިން؟

ކުރީގެ ނައިބު ރައީސް އަހުމަދު އަދީބު އިންޑިޔާއަށް ދަތުރުކުރެއްވި ޓަގްބޯޓަށް އަރާވަޑައިގެންނެވީ އެ ބޯޓުގެ ދަތުރުގެ މެދުތެރެއިންކަމަށް މީޑިޔާތަކުން ރިޕޯޓްކޮށްފިއެވެ.

ޓައިމްސް އޮފް އިންޑިޔާ ނޫހުން ރިޕޯޓްކުރާ ގޮތުގައި ޖުލައިމަހުގެ 28ވަނަ ދުވަހު އެ ބޯޓުގެ ދަތުރުގެ މެދުތެރެއިން އަދީބު އަރާފައިވަނީ، ބޭސްފަރުވާއަށް އިންޑިޔާއަށް ދިއުމަށް ކަމަށް ބުނެއެވެ.

އެ ބޯޓުގައި ފަޅުވެރިންގެ ގޮތުގައި ތިބީ ނުވަ މީހުންނެވެ. އެއީ އިންޑިޔާގެ މީހަކާއި އިންޑޮނީޝިޔާގެ އަށް މީހެކެވެ. ވަރގޯ9 ނަމަކަށް ކިޔާ މި ޓަގްބޯޓަކީ ސިންގަޕޫރުގެ ދިދަ ޖެހި ބޯޓެކެވެ.

އަދީބު އަދިއެއް އިންޑިޔާގެ ކަމާއިބެހޭ އިދާރާތަކުން ހައްޔަރުކޮށްފައެއް ނުވެއެވެ. އޭނާ ހުރީ އެބޯޓުގައި އިންޑިޔާގެ ކަމާއިބެހޭ އިދާރާތަކުގެ ބެލުމުގެ ދަށުގައެވެ.

އަދީބުގެ ބައިނަލްއަގްވާމީ ވަކީލުންކަމުގައިވާ ގުއަރނިކާ އިންޓަރނޭޝަނަލް ޖަސްޓިސް ޗެމްބަރސްއިން ނެރުނު ބަޔާނެއްގައި ބުނެފައިވަނީ އަދީބުގެ ހުރިހާ ހުކުމްތައް މިއަހަރުގެ ތެރޭގައި ކޯޓުން ބާތިލްކުރުމުން، އޭނާ މިނިވަންވެފައި ވަނިކޮށް ޕީޖީ އޮފީހުން އެ މައްސަލަތައް އިސްތިއުނާފު ކުރުމުން އޭނާ ގޭބަންދުގައި ހުންނަން ޖެހުނު ކަމަށެވެ.

އަދި އެއަށްފަހު ބޭސްފަރުވާ ހޯދުމަށް އަދީބު ލައްވައި އެއްބަސްވުމެއްގައި ސޮއިކުރުމަށް ބައިނަލްއަގްވާމީ ގާނޫނީ ވަކީލުންގެ ޓީމުން ވަނީ ފާހަަގަކޮށްފައެވެ. އަދި މި މުއްދަތުގެ ތެރޭގައި އަދީބުގެ މައްޗަށް ސިޔާސީ ނުފޫޒު ފޯރުވައި، އަދީބާއި އާއިލާއަށް ނުރައްކާވެ ނުކުރާ ކުށަކަށް އިއުތިރާފް ވާން ޖެހިދާނެފަދަ އެއްބަސްވުމެއްގައި ސޮއިކުރުވަން މަސައްކަތް ކުރުވިކަމަށް ވަނީ ބުނެފައެވެ.

މިގޮތަށް އަމަލުކޮށްފައިވަނީ ރާއްޖޭގެ ސަލާމަތީ ބާރުތަކުންކަމަށް ވަނީ ބަޔާނުގައި ބުނެފައެވެ.

އެ ބަޔާނުގައި އިތުރަށް ހާާމަކޮށްފައިވާ ގޮތުގައި މިކަންކަމާއި ގުޅިގެން އަދީބު ވަނީ އިންޑިޔާގެ ހިމާޔަތަށް އެދިފައެވެ. މިހެންވުމުން، އިންޑިޔާގެ ފަރާތުން ބައިނަލްއަގްވާމީ އުސޫލުތަކުގެ މައްޗަށް ރިއާޔަތްކޮށް، އދ.އަށް ހުށައަޅާފައިވާ އަދީބުގެ ރެފިއުޖީ އެޕްލިކޭޝަން ބަލައި ނުގަންނަނީސް ރާއްޖެއަށް އަނބުރާ ނުފޮނުވުމަށް ވަނީ އެދިފައެވެ.