ހޯރަފުށީ ފަޅު ހިއްކައިގެން ބޮޑު ކޮންޓައިނާ ޓާމިނަލެއް އަޅަނީ

ހޯރަފުށީ ފަޅު ހިއްކައިގެން ބޮޑު ކޮންޓައިނާ ޓާމިނަލެއް އަޅަން ސަރުކާރުން ނިންމައިފިއެވެ.

ހއ. ހޯރަފުށީ ފަޅުން ހިއްކާ ބިމުގައި ބޮޑު ކޮންޓެއިނަރ ޓާމިނަލެއް ހަދާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުޙައްމަދު ވަޖީހު ވިދާޅުވީ އިހަވަންދިއްޕޮޅުގައި އިންޓަނޭޝަނަލް ބަންކަރިންގ ޚިދުމަތް ރަސްމީކޮށް ފެށުމުގެ ރަސްމިއްޔާތުގައެވެ.

ވަޖީހު ވިދާޅުވި ގޮތުގައި ހޯރަފުށީ ފަޅު ހިއްކައިގެން އޮއިލް ޓާމިނަލެއް، ކޮންޓެއިނަރ ޓާމިނަލެއް އަދި ފްރީ ޒޯނެއް ސަރުކާރުން ތަރައްޤީކުރާނެއެވެ. މީގެ އިތުރުން، އުތުރުގައި އެމްޕީއެލްއިން 14 މެރިޓައިމް ޚިދުމަތެއް ދޭނެ ކަމަށްވެސް އޭނާ ވިދާޅުވިއެވެ.

"ހޯރަފުށީގެ ފަޅު ހިއްކައިގެން އެތާނގައި ބިމެއް އުފައްދައި އެއްގަމުން ބަންކަރިން ހިދުމަތް ދެވޭނެ ގޮތަށް އޮއިލް ޓާމިނަލް ތައްޔާރުކުރާނެ. ބިން ހިއްކައިގެން އޮއިލް ޓާމިނަލް ގާއިމުކޮށްފައި ބޮޑެތި ޓޭންކަރުތައް ބަހައްޓާނެ. ކޮންޓެއިނާ ޓާމިނަލް ގާއިމުކުރާނެ.،"

ވަޖީހު ވިދާޅުވި އެވެ.

މި މަޝްރޫޢުގެ ބަންކަރިންގ ޚިދުމަތުގެ ދަށުން ބޯޓުތަކަށް ތެޔޮ ފޯރުކޮށްދޭނީ އެސްޓީއޯއިންނެވެ. އެސްޓީއޯއިން ވަނީ ދުނިޔޭގެ އެންމެ ބޮޑު އަމިއްލަ ހަކަތައިގެ ވިޔަފާރިކުރާ ކުންފުނި ކަމަށްވާ ވިޓޯލްއާއެކު ބަންކަރިންގ މަޝްރޫޢު ހިންގުމުގެ އެމްއޯޔޫގައި ސޮއިކޮށްފައެވެ.

ވިޓޯލްއަކީ ހަކަތައިގެ ވިޔަފާރީގައި ދުނިޔޭގައި އެންމެ ބޮޑު އެއް ކުންފުންޏެވެ. ވިޓޯލްގެ އޮފީސްތައް ދުނިޔޭގެ 40 ގައުމެއްގައި ހުންނައިރު މި ކުންފުނިން އަހަރަކު 12 މިލިއަން ޓަނު ތެޔޮ ބަންކާ ފިއުލްގެ ގޮތުގައި ވިއްކަ އެވެ.

މި މަޝްރޫޢަކީ ރާއްޖޭގެ އިޤްތިޞާދު އެއް ސިނާޢަތަކަށް ބަރޯސާވެފައި އޮތް އޮތުން ނިމުމަކަށް ގެނައުމަށް ކުރެވޭ މުހިންމު މަސައްކަތެއްގެ ބައެއް ކަމުގައި ސަރުކާރުން ބުނެއެވެ. އަދި މި މަޝްރޫޢުން ޤައުމުގެ އިޤްތިޞާދަށް ބޮޑެތި ފައިދާތަކެއް ލިބޭނެ ކަމަށް ވެސް ސަރުކާރުގެ އިސް ފަރާތްތަކުން ހާމަކުރައްވައެވެ.